19-May-2024

କନେଷ୍ଟବଳ ହତ୍ୟାକାଣ୍ଡର ଭିନ୍ନ ସନ୍ଦେହ !

ହତ୍ୟା ଓ ଲୁଣ୍ଠନ ପଛରେ ' ଡାବୁ '  ?

ବଲାଙ୍ଗୀର  : ( ମଳୟ ମିଶ୍ରଙ୍କ ରିପୋର୍ଟ ) ଗତ  ୧୬ ତାରିଖରେ ବଲାଙ୍ଗୀର ରେଳଷ୍ଟେସନ ନିକଟସ୍ଥ ଇନ୍ଦ୍ରପ୍ରସ୍ଥ ହୋଟେଲ ରୁମ୍ ରେ ସଂଘଟିତ ସୋନପୁର ରିଜର୍ଭ କନେଷ୍ଟବଳ ଶଙ୍କର ଭାନୁ ବେହେରା( ୩୬ )ଙ୍କ ହତ୍ୟାକାଣ୍ଡ ମାମଲାରେ ଏବେ ଭିନ୍ନ ଚର୍ଚ୍ଚା ପ୍ରକାଶ ପାଇଛି ।
ପୂର୍ବରୁ ଏହାପଛରେ ଆନ୍ତଃରାଜ୍ୟ ଚୋରାଗଞ୍ଜେଇ ଚାଲାଣ ରହିଥିବା ଚର୍ଚ୍ଚା ହେଉଥିଲାବେଳେ , ହତ୍ୟାକାଣ୍ଡ ଘଟିଥିବା ଉକ୍ତ ହୋଟେଲ ରୁମ୍ ଭିତରେ ସିରିଞ୍ଜ୍ ବିକ୍ଷିପ୍ତ ହୋଇ ପଡିଥିବା ଖବର ପ୍ରକାଶ ପାଇଥିବାରୁ ଓ  ସୋନପୁର ଜିଲ୍ଲାର ପୁଲିସ୍ ମହଲରୁ ମିଳୁଥିବା ବିଶ୍ବସ୍ତସୂତ୍ରରୁ  ଏହାପଛରେ 'ଡାବୁ ' ବନାମ ହନୁମାନ ପଇସା କାରବାର ହୋଇଥିବା ନୂଆ ଚର୍ଚ୍ଚା ହେଉଛି । ଏହାସହ ଏଭଳି କାରବାରର ଅଭିଜ୍ଞତା ଥିବା କେତେକଙ୍କ ସହ ଆଲୋଚନାରୁ ପ୍ରକାଶ ଯେ , ଏହି ବିରଳ ପୁରାତନ ମୁଦ୍ରାର ଟେଷ୍ଟ୍ କରିବାକୁ ଇଞ୍ଜେକ  ସନ୍ ସିରିଞ୍ଜ୍ ବ୍ୟବହାର କରାଯାଇଥାଏ । ସିରିଞ୍ଜ୍ ରେ ପାଣି ପୁରାଇ ମୁଦ୍ରା ଉପରେ ପକାଇଲେ , ପାଣି ଛିଞ୍ଚାଡି ହେଇ ପଡୁଥିବା ସହ  ସିରିଞ୍ଜ୍ ବା ଏହାର ଛୁଞ୍ଚିରେ ମୁଦ୍ରାଟିକୁ ଝୁଲାଇ ଭାରସାମ୍ୟ ପରୀକ୍ଷା କରାଯାଇଥାଏ । ତେବେ ବୈଜ୍ଞାନିକ ଦୃଷ୍ଟିକୋଣରୁ ଏହା ଠିକ୍ ହେଇଥାଉ ବା ନଥାଉ , ଏହି କାରବାର କରୁଥିବା ଠକଙ୍କର ଏହା ଏକ କୌଶଳ ଅଟେ । 

ତେଣୁ ସମ୍ଭବତଃ ମୃତ କନେଷ୍ଟବଳ ଜଣକ ଏଭଳି କୌଣସି ଭ୍ରମରେ ପଡି ବା ନିଜେ ଠକିବାକୁ ଏଭଳି କିଛି ପ୍ଲଟ୍ ପ୍ରସ୍ତୁତ କରି ଶେଷରେ ଧୋକା ଧରାପଡିଯିବା ଯୋଗୁଁ ହୁଏତ ଗଣ୍ଡଗୋଳରୁ ଏଭଳି ପରିଣାମ ଘଟିଯାଇଥିବା ଅନୁମାନ କରାଯାଉଛି କିମ୍ବା ହତ୍ୟାକାରୀମାନେ ତାଙ୍କଠାରୁ ଏହି ମୁଦ୍ରାଟିକୁ ଲୁଣ୍ଠନ କରି ଫେରାର୍ ହୋଇଯାଇଥାଇ ପାରନ୍ତି ବୋଲି ସନ୍ଦେହରୁ ପ୍ରକାଶ । ସେ ଯାହାହେଉ , ପୁଲିସ୍ ଏହିସବୁ ଦିଗରେ ତଦନ୍ତ ଜାରୀ ରଖିଛି ଓ ଖୁବ୍ ଶୀଘ୍ର ଏହି ହତ୍ୟାକାଣ୍ଡର କାରଣ ଜଣାପଡିବା ସହିତ ଆସାମୀମାନଙ୍କୁ ଗିରଫ କରାଯିବ ବୋଲି ଆଶାକରାଯାଉଛି । 

ତେବେ ଅନ୍ୟକେତେକ ଏହାପଛରେ ହୀରା କାରବାର ମଧ୍ୟ ରହିଥିବା କୁହାଯାଉଛି । କାରଣ ଏଭଳି କାରବାରରେ ଉକ୍ତ ମୃତକନେଷ୍ଟବଳଙ୍କର ସମ୍ପୃକ୍ତି ରହିଥିବା ମଧ୍ୟ ସୋନପୁରର ସାମ୍ବାଦିକମହଲରେ ଚର୍ଚ୍ଚା ହେଉଛି ।

ପ୍ରକାଶ ଯେ , ଗତ ୧୬ ତାରିଖରେ ଉକ୍ତ ହୋଟେଲର ୨୧୨ ନମ୍ବର ରୁମ୍ ଟିକୁ ଝାଡଖଣ୍ଡ ଧାନବାଦର ଉଆସେପୁରର ଜନୈକ ବୀରେନ୍ ସିଂ ବୁକ୍ କରି ଆସି ରହିଥିଲା । କିଛିସମୟ ପରେ ଆଉ ଦୁଇଜଣ ତାକୁ ସେଠାକୁ ଭେଟିବାକୁ ଆସିଥିଲେ ଓ ଏହାର କିଛିସମୟ ପରେ ଉକ୍ତ ମୃତ କନେଷ୍ଟବଳ ମଧ୍ୟ ଆସି ରୁମ୍ କୁ ଯାଇଥିବା ହୋଟେଲର ସିସିଟିଭିରୁ ଜଣାପଡିଛି । ତେବେ ସେହିଦିନ ୧-୪୫ରେ ମୃତକ ତାଙ୍କ ବଡଭାଇଙ୍କ ସହ ଫୋନ୍ ରେ କଥାହେଇଥିଲେ । ଏହାପରେ ସେହିଦିନ ୨-୩୦ ସମୟରେ ସେଠାରୁ ଅଳ୍ପଦୂରସ୍ଥ ଖୁଜେନପାଲି ରାସ୍ତାର ରେଳଫାଟକ ନିକଟରେ   ମୃତ କନେଷ୍ଟବଳ ଜଣକ ସେହିଦିନ ଦିନ ପ୍ରାୟ ୧୧ ଟାବେଳେ ସୋନପୁରର ଘରୁ ଆସିଥିବା ତାଙ୍କର ନିଜ କାର୍ ଟି ଦୁର୍ଘଟଣାଗ୍ରସ୍ତ ହୋଇଥିଲା । ଏହାର ପରଦିନ ହୋଟେଲର ଉକ୍ତ ରୁମ୍ ର ବାଥ୍ ରୁମ୍ ଭିତରେ ମୁହଁରେ ଟେପ୍ ଓ ହାତଗୋଡ ବନ୍ଧା ଅବସ୍ଥାରେ ଉକ୍ତ କନେଷ୍ଟବଳଙ୍କର କ୍ଷତବିକ୍ଷତ ମୃତଦେହ ଉଦ୍ଧାର ହୋଇଥିଲା ।  କାର୍ ଟିକୁ ଉକ୍ତ ରୁମ୍ ବୁକ୍ କରି ରହିଥିବା ଓ ଆସିଥିବା ଦୁଇଜଣ  ଆଗନ୍ତୁକ ହୋଟେଲ ସମ୍ମୁଖରୁ ନେଇ ଯାଇଥିବାର ଫଟୋ ମଧ୍ୟ ସିସିଟିଭିରେ ରେକର୍ଡ ହୋଇଛି । ତେଣୁ ଏହି ତିନିଜଣ ହିଁ ହତ୍ୟାକାରୀ ବୋଲି ଦୃଢ ସନ୍ଦେହ କରାଯାଉଛି । ବଲାଙ୍ଗୀର ଟାଉନ ଥାନା ପୁଲିସ୍ ଏକ ମାମଲା ଋଜୁକରି ଶବବ୍ୟବଚ୍ଛେଦ ପୂର୍ବକ ତଦନ୍ତ କରୁଥିବାବେଳେ , ସଦରଥାନା ପୁଲିସ୍ ଦୁର୍ଘଟଣାଗ୍ରସ୍ତ କାର୍ ଟିକୁ ଜବତ କରିଛି । ଏହି କାର୍ ଭିତରେ ରକ୍ତଛିଟା ଲାଗିଥିବା ଓ ଗାଡିଟି ଏକ ଗଛରେ ଜୋର୍ ରେ ସାମ୍ନାପଟରୁ ଧକ୍କା ହୋଇଥିବା ଦେଖାଯାଇଛି । 

ତେବେ ନିର୍ବାଚନ ମାତ୍ର ଚାରିଦିନ ଥିବାବେଳେ ଏକ ଜନଗହଳିପୂର୍ଣ ସ୍ଥାନର ଉକ୍ତ ବ୍ୟସ୍ତବହୁଳ ରାସ୍ତାକଡର ଉକ୍ତ ହୋଟେଲ ଭିତରେ ସ୍ପଷ୍ଟଦିବାଲୋକରେ ମାତ୍ର ୩୫ ମିନିଟ୍ ମଧ୍ୟରେ ଜଣେ ପୁଲିସ୍ କର୍ମଚାରୀଙ୍କୁ ରାଜ୍ୟବାହାରର ତିନିଜଣ ସନ୍ଦିଗ୍ଧ ହତ୍ୟାକାରୀମାନେ ଏଭଳି ନୃଶଂସ ଭାବରେ ହତ୍ୟାକରି ଫେରାର୍ ହୋଇଯିବା ଚାଞ୍ଚଲ୍ଯ ସୃଷ୍ଟି କରିଛି । ପୁଲିସ୍ କର୍ମଚାରୀଙ୍କର ରାତାରାତି ଧନୀ ହୋଇଯିବା ଆଶାରେ ଏଭଳି ଘଟଣାରେ ଜଡିତ ହୋଇପଡି ଜୀବନ ହରାଇବା ମଧ୍ୟ ଶୋଚନୀୟ ଘଟଣା ବୋଲି ଚର୍ଚ୍ଚା ହେଉଛି । ତେବେ ପ୍ରକୃତରେ ଏହାପଛରେ ଚୋରାଗଞ୍ଜେଇ ଚାଲାଣ , ଡାବୁ ବା ରତ୍ନପଥର କାରବାର ରହିଛି , ତଦନ୍ତ ପରେ ସ୍ପଷ୍ଟ ହୋଇଯିବ । କିନ୍ତୁ ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ଥାନାନ୍ତର୍ଗତ ଶିଆଲବାହାଲି ଗ୍ରାମର ବାସିନ୍ଦା ଓ ସୋନପୁରରେ ସପରିବାର ରହୁଥିବା ଏହି ଯୁବ ରିଜର୍ଭ କନେଷ୍ଟବଳଙ୍କର ଏତାଦୃଶ ହତ୍ୟାକାଣ୍ଡ  ଚର୍ଚ୍ଚିତ ହୋଇପଡିଛି । ସେ ଉକ୍ତଦିନ ସୋନପୁରର ଘରୁ ନିଜକାର୍ ରେ ବଲାଙ୍ଗୀର ସହରର ଉକ୍ତ ଲଜ୍ କୁ କାହିଁକି ଆସିଥିଲେ ଓ ସାଙ୍ଗରେ କଣ ଆଣିଥିଲେ  ଓ ସନ୍ଦିଗ୍ଧ ଆସାମୀମାନଙ୍କ ସହ ଜଣେ ପୁଲିସ୍ କର୍ମଚାରୀଙ୍କର କେବଠୁଁ କି ସମ୍ପର୍କ ଥିଲା , ଏହା ତଦନ୍ତସାପେକ୍ଷ ।