19-May-2024

ବଲାଙ୍ଗିର(ପ୍ରେରଣା ଖବର ): କବିତାର ସୁମଧୁରପଂକ୍ତି ସଂଗୀତର ମୂର୍ଚ୍ଛନା ଆସରକୁ ଭାବପ୍ରବଣ କରିଥିଲା । ଭକ୍ତି ଓ ଆବେଗର ବର୍ଷାରେ ଭିଜିଥିଲେ ସାହିତ୍ୟ ଓ ସଂଗୀତର ଅନୁରାଗୀ । ଅବସରଥିଲା ଜୟଦେବଭବନର ପ୍ରେକ୍ଷାଳୟରେ ମହ୍ଲାର ନିବେଦିତ ସଂଗୀତସଂଧ୍ୟା । ସୁପ୍ରସିଦ୍ଧ ଗୀତିକବି ଜୟକୃଷ୍ଣ ତ୍ରୀପାଠୀ ରଚିତ ଓଡିଆ ଭଜନମାଳା ଆହ୍ଲାଦିତ ପୁସ୍ତକ ଉନ୍ମୋଚିତ ହୋଇଥିଲା । ବିଶିଷ୍ଟ ସାରସ୍ୱତ ସାଧକ ଇଂ.ଅଭିରାମ ଦାଶ ରଚିତ ଓଡିଆ କବିତାଗୁଚ୍ଛ ଅଭୁଲାସ୍ମୃତି ମଧ୍ୟ ଏହି ମଞ୍ଚରେ ଲୋକାର୍ପିତ ହୋଇଥିଲା । ସାହିତ୍ୟ-ସଂଗୀତର ପରିଣୟରେ ସାରସ୍ୱତ ସାଧନା କାଳଜୟୀ ହୁଏ ବୋଲି ଅତିଥିଗଣ ମତବ୍ୟକ୍ତ କରିଥିଲେ । ଅନନ୍ୟ ସାଧକ କବିଲୋକରତ୍ନ ପଦ୍ମଶ୍ରୀ ହଳଧର ନାଗ,ସୁପ୍ରସିଦ୍ଧ ବ୍ୟଙ୍ଗକବି ଜ୍ଞାନାନନ୍ଦ ହୋତା ଓ ବିଲୁପ୍ତ ଲୋକକଳା-ସଂସ୍କୃତିର ସଂରକ୍ଷକ ତଥା ପୃଷ୍ଠପୋଷକ ଅଧ୍ୟାପକ ରଜତ ପାଣିଗ୍ରାହୀ କବିଦ୍ୱୟଙ୍କୁ ଅଭିନନ୍ଦନ ଜଣାଇବା ସହ ଆସରକୁ ସମ୍ବୋଧିତ କରିଥିଲେ । ପରେ ପରେ ଗୀତିକବି ଜୟକୃଷ୍ଣ ତ୍ରୀପାଠୀଙ୍କ ବଳିଷ୍ଠ ରଚନାକୁ ପୁରାତନ ହିନ୍ଦିଚଳଚିତ୍ର ଗୀତରଛାୟାରେ ବିଶିଷ୍ଟକଣ୍ଠଶୀଲ୍ପୀ ବରଦାପ୍ରସନ୍ନ ପଟ୍ଟନାୟକ,ଅସୀତ ଦାସ,ଲୋଭା ପଢୀଆରୀ,ଅମ୍ବରୀଶ ଦାଶ ଓ ସ୍ୱୟଂ ଇଂ ଅଭିରାମ ଦାଶ ଉପସ୍ଥାପନ କରିଥିଲେ । ଇଂ,ବିଭାସ ମହାନ୍ତି ମାଉଥଅର୍ଗାନରେ ଓଡିଆ ଭଜନ ପରିବେଷଣ ଅତ୍ୟନ୍ତ ମନଛୁଆଁ ଥିଲା । ଓଡିଶାର ଖ୍ୟାତନାମା ସଂଗୀତ ସଂଧ୍ୟାଟି ଖୁବ ଶୃତିମଧୁର ଓ ହୃଦୟସ୍ପର୍ଷ୍ଟି ହୋଇଥିଲା । କାର୍ଯ୍ୟକ୍ରମର ଅନ୍ତିମ ସୋପାନରେ କବି ହଳଧର ନାଗଙ୍କ କୋସଲୀ କବିତାରେ ଦର୍ଶକଗଣ ବିହ୍ୱଳିତ ହୋଇଥିଲେ । ଅଧ୍ୟାପକ ଡ.ମୃତ୍ୟୁଞ୍ଜୟ ରଥଙ୍କ ମଞ୍ଚ ସଂଯୋଜନାରେ ପ୍ରସ୍ତୁତ ସଂଗୀତ ସଂଧ୍ୟାରେ ଆଚ୍ଛାଦିତ ପୁସ୍ତକର ପ୍ରକାଶିକା ଶ୍ରୀମତୀ ମିତ୍ରବିନ୍ଦା ଦାଶ,ପ୍ରେରଣାଦାତ୍ରୀ ନାଗ୍ନାଜୀତି ତ୍ରୀପାଠୀ,ବିଶିଷ୍ଟ ବୃତ୍ତଚିତ୍ର ନିର୍ଦ୍ଦେଶକ ଗୌରହରୀ ବିଶ୍ୱାଳ ଏବଂ ମଞ୍ଚ ସଂଯୋଜକବୃନ୍ଦ ମନସ୍ୱିନୀ ତରାସିଆ,ପ୍ରସନ୍ନ ମହାନ୍ତି, ଗଣେଶ ରାଉତ,ସୌମ୍ୟରଂଜନ ମହାପାତ୍ରଙ୍କର ସହଯୋଗରେ କାର୍ଯ୍ୟକ୍ରମଟି ଅତ୍ୟନ୍ତ ସଫଳ ହୋଇଥିଲା । ଶେଷରେ ପ୍ରଯୋଜକ ଅମ୍ବରୀଶ ଦାଶ ଧନ୍ୟବାଦ ଅର୍ପଣ କରିଥିଲେ ।