18-May-2024

ବଲାଙ୍ଗିର-ବଲାଙ୍ଗୀରରେ ନିର୍ବାଚନୀ ମାହୋଲ ସରଗରମ ହୋଇଥିବା ବେଳେ ଅପରାଧିଗୋଷ୍ଠୀ ମଧ୍ୟ ସକ୍ରୀୟ ହୋଇଛନ୍ତି । କିଛି ଅପରାଧିକଗୋଷ୍ଠୀକୁ ପୋଲିସ ଗିରଫ କରି ଜେଲରେ ଭରିଛି l କିନ୍ତୁ ଅନେକ ଅପରାଧି ରାଜନୈତିକ ପୃଷ୍ଠପୋଷକତାରେ ପରିଚାଳିତ ହୋଇ ନିର୍ବାଚନ ପାଇଁ ସକ୍ରୀୟ ରହିଛନ୍ତି । ଚଳିତନିର୍ବାଚନରେ ରାଜନେତାମାନେ ତାଙ୍କର ନାମାଙ୍କନ ରାଲି ହେଉ କି ପଡାମାନଙ୍କରେ ପ୍ରଚାର ମିଟିଂ ହେଉ ସବୁଠି ସେହି ଗୋଷ୍ଠୀମାନେ ଉପସ୍ଥିତ ରହୁଥିବା ଲକ୍ଷ୍ୟକରାଯାଇଛି । କିଛି ଜେଲଫେରନ୍ତା ଅପରାଧି, କଫସିରଫ ବ୍ୟବସାୟୀ, ଜମିମାଫିଆ, ମାସିକିଆ ବଟି ଅସୁଲିରେ ଥିବା ପରି କିଛି ଅସାମାଜିକ ଯୁବକମାନେ ହାତରେ ଫୁଲମାଳ ଧରି ଯୁବନେତାଙ୍କୁ ଉତ୍ସାହିତ କରୁଥିଲେ । ନାମାଙ୍କନ ବେଳେ ଯୁବନେତାଙ୍କ ସାଙ୍ଗରେ ଏପରି ଯୁବକଙ୍କୁ ଦେଖି ଲୋକେ ତାଜୁବ ହୋଇ ଦେଖୁଥିଲେ । ସାଗରପଡା ଅଞ୍ଚଳର ଜଣେ ଡକାୟତିମାମଲାର ଅଭିଯୁକ୍ତ ତାଙ୍କର କିଛି ସହଯୋଗିଙ୍କୁ ନେଇ ଯୁବନେତାଙ୍କୁ ଫୁଲମାଳ ଦେଉଥିବା ବେଳେ ଲୋକଙ୍କ ଭୃକୁଞ୍ଚନ ସୃଷ୍ଟି ହୋଇଥିଲା । ତେବେ ସବୁଠୁ ବିଡମ୍ବନା ହେଲା ଜଣେ ଅପରାଧିକ ପୃଷ୍ଠଭୂମୀ ଥିବା ଯୁବକ ଯିଏକି ଆରଟିଆଇରେ ସୂଚନା ମାଗି ଲୋକଙ୍କୁ ବ୍ଲାକମେଲିଂ କରୁଛି ସେହି ଯୁବକକୁ ଲଗାଇ ଲୋକଙ୍କ ନାମରେ ସୋସିଆଲ ମିଡିଆରେ ମିଥ୍ୟା ପୋଷ୍ଠିଂଗୁଡିକ କରାଯାଉଛି ।  କେବଳ ସେତକି ନୁହେଁ ଏକ ନିଦ୍ଦିଷ୍ଟବର୍ଗର ଯୁବକମାନଙ୍କୁ ସଂଗଠିତ କରି ନିର୍ବାଚନରେ ପ୍ରମୁଖ ଭୂମୀକା ଗ୍ରହଣ କରିବାକୁ ଏକ କଲ୍ୟାଣମଣ୍ଡପରେ ବୈଠକ କରି ପରାମର୍ଶ ଦିଆଯାଇଥିବା ସୂଚନା ମିଳିଛି । ସେହିବର୍ଗର ଭୋଟ ସହିତ ଆଗକୁ ଅପରାଧିଗୋଷ୍ଠୀକୁ ଆଇନଗତ ଓ ରାଜନୈତିକ ସୁରକ୍ଷା ଦେବାକୁ ମଧ୍ୟ ଯୁବନେତା ପ୍ରତିଶୃତି ଦେଇଥିବା ଆଲୋଚନାର ବିଷୟ ହୋଇଛି । ବଲାଙ୍ଗୀର ସହରର ଶାନ୍ତି,ମୈତ୍ରୀ କଥା କହି ଲୋକଙ୍କୁ ଭ୍ରମିତ କରୁଥିବା ବେଳେ ସେପଟେ ତାଙ୍କର ପରିବାରବର୍ଗ ଓ ସହଯୋଗୀମାନେ ଲୋକଙ୍କୁ ବିଭିନ୍ନ ପ୍ରକାରେ ହଇରାଣହରକତ କରୁଛନ୍ତି । ଏପରିକି ଜଣେ ବ୍ୟକ୍ତିଙ୍କ ଜମିକୁ ଜବରଦସ୍ତ ହଡପ କରିବାକୁ ଉଦ୍ୟମ କରିବାକୁ ସେହି ବ୍ୟକ୍ତିଙ୍କ ନାମରେ ଏକ ମିଥ୍ୟା ଏଟ୍ରୋସିଟି କେସ କରାଇ ହଇରାଣ କରୁଥିବା ଅଭିଯୋଗ ମଧ୍ୟ ହୋଇଛି । ତେଣୁ ଏଭଳି ନେତାଙ୍କୁ ଚଳିତ ନିର୍ବାଚନରେ ପ୍ରତ୍ୟାଖ୍ୟାନ କରିବାକୁ ବିଭିନ୍ନ ମହଲରୁ ନିବେଦନ କରାଯାଇଛି । ଏବେ ନିର୍ବାଚନକୁ ଆଉ ମାତ୍ର ଦୁଇଦିନ ଥିବା ବେଳେ ରେଳ ଷ୍ଟେସନ, ସାଲେପାଲି, ମାଲପଡା, କଂସାରୀପଡା କଲେଜଛକ,ବିଭୁତିପଡା ଅଞ୍ଚଳର ଅପରାଧିକ ଗୋଷ୍ଠୀ ଦଳ ଦଳ ହୋଇ ନେତାଙ୍କ ପଛେ ବୁଲୁଛନ୍ତି । ବଲାଙ୍ଗୀର ପୋଲିସ ଏହି ଦୁଇଦିନ ସଜାଗ ନହେଲେ ବଲାଙ୍ଗୀର ନିର୍ବାଚନରେ କିଛି ମଧ୍ୟ ଅଘଟଣ ଘଟିପାରେ ବୋଲି ଆଶଂକା କରାଯାଉଛି । ବଲାଙ୍ଗୀର ଜିଲ୍ଲାପାଳ ଓ ଏସପି ଏଦିଗରେ ପଦକ୍ଷେପ ନେବାକୁ ଜନସାଧାରଣରେ ଦାବି ହେଉଛି ।