18-Feb-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ ): କଣ୍ଟାମାଳ ବ୍ଲକ ଯୋଗିନ୍ଦ୍ରପୁର ପଞ୍ଚାୟତ ସଦର ଉଚ୍ଚ ବିଦ୍ୟାଳୟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି ! ଜଣେ ଦଳିତ ଛାତ୍ର ଖାଦ୍ୟ ଛୁଇଁ ଦେବାରୁ ଜଣେ ଶିକ୍ଷୟତ୍ରୀ ଉକ୍ତ ଖାଦ୍ୟ ଫୋପାଡି ଦେବାରୁ ସ୍କୁଲରେ ଉତ୍ତେଜନା ଲାଗି ରହିଛି ! ସୂଚନା ଅନୁସାରେ ଉକ୍ତ ବିଦ୍ୟାଳୟରେ ସରସ୍ଵତୀ ପୂଜା ଅବସରରେ ଭୋଜି ଚାଲୁଥିବା ବେଳେ ଦଶମ ଶ୍ରେଣୀରେ ପଢୁଥିବା ଯୋଗିନ୍ଦ୍ରପୁର ଗ୍ରାମର ଅନନ୍ତରାମ ହରିପାଲଙ୍କ ପୁଅ ଡାଲି ଓ ଖଟା ବାଲଟି ଛୁଇଁ ଦେବାରୁ ଉକ୍ତ ଖାଦ୍ୟ ଜିନିଷ ବିଦ୍ୟାଳୟର ସଂସ୍କୃତ ଶିକ୍ଷୟତ୍ରୀ ଫୋପାଡି ଦେଇଥିଲେ ! ଉକ୍ତ ଘଟଣାକୁ ନେଇ ବିଦ୍ୟାଳୟରେ ଉତ୍ତେଜନା ଦେଖା ଦେଇଥିଲା ! ପର ଦିନ ଉକ୍ତ ଛାତ୍ରର ବାପା ଅନ୍ତରାମ ହରିପାଲ ବିଦ୍ୟାଳୟକୁ ଆସି ପ୍ରଧାନ ଶିକ୍ଷକଙ୍କ ଠାରେ ଅଭିଯୋଗ କରିଥିଲେ ! ପ୍ରଧାନ ଶିକ୍ଷକ ଏହାର ଆପୋଷ ସମାଧାନ କରିବାକୁ ଚେଷ୍ଟା କରୁଥିବା ବେଳେ ସମ୍ପ୍ରୁକ୍ତ ଶିକ୍ଷୟିତ୍ରୀ ଛାତ୍ରର ବାପାମାଆଙ୍କୁ ଦୁର୍ବ୍ୟବହାର ପ୍ରଦର୍ଶନ କରିବାରୁ ସମ୍ଭବ ହୋଇନଥିଲା ! ସୂଚନାଯୋଗ୍ୟ ଯେ ପୂର୍ବରୁ ଉକ୍ତ ଛାତ୍ରକୁ ସଂସ୍କୃତ ଶିକ୍ଷୟତ୍ରୀ ମାଡ ମାରିଥିବା ଅଭିଯୋଗ ହୋଇଥିଲା ! ବିଦ୍ୟାଳୟ ଭଳି ଭେଦଭାବ ଶୂନ୍ୟ ଅଞ୍ଚଳରେ ଦଳିତ ଛାତ୍ରଙ୍କ ଉପରେ ଏଭଳି ଆଚରଣ ଘଟଣାକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ! ଏହାକୁ ନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି ! ଅନ୍ୟପଟେ ଛାତ୍ରଙ୍କ ବାପାମାଆ ଶିକ୍ଷୟତ୍ରୀଙ୍କୁ ପଚାରିବାରୁ ଓଲଟା ତାଙ୍କୁ ଧମକ ଦେଇଥିବା ଅଭିଯୋଗ ହୋଇଛି ! ଘଟଣା ସମ୍ପର୍କରେ ସଂପୃକ୍ତ ଶିକ୍ଷୟତ୍ରୀଙ୍କୁ ପଚାରିବାରୁ ମୋ ଭାଇ ଅତିରିକ୍ତ ଏସପି ଓ ମୋର ସମ୍ପର୍କୀୟ ମୁଖ୍ୟମନ୍ତ୍ରୀଙ୍କ ଦପ୍ତରରେ କାର୍ଯ୍ୟ କରୁଛନ୍ତି ,ମୋର କେହି କିଛି କରି ପାରିବେ ନାହିଁ ବୋଲି କହିଥିଲେ ! ଉକ୍ତ ଘଟଣାକୁ ନେଇ ଜିଲ୍ଲା ଶିକ୍ଷାଧିକାରୀ ଗେନ୍ଦେରା କୁଜ୍ଜୂରଙ୍କୁ ପଚାରିବାରୁ ଆସନ୍ତାକାଲି ହିଁ ଘଟଣାର ନିରପେକ୍ଷ  ତଦନ୍ତ କରି ଦୋଷୀ ବିରୁଦ୍ଧରେ ଦୃଢ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି !  ଘଟଣାର ତଦନ୍ତ କରି ଦୋଷୀ ଶିକ୍ଷୟତ୍ରୀଙ୍କ ବିରୁଦ୍ଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ନ ନେଲେ ଜିଲ୍ଲା ପାଣ ଗଣ୍ଡା ବିକାଶ ପରିଷଦ ରାଜରାସ୍ତାକୁ ଓହ୍ଲାଇବ ବୋଲି ସମ୍ପାଦକ ସୁଧାଂଶୁ ଡାଙ୍ଗ ଚେତାବନୀ ଦେଇଛନ୍ତି।