27-Nov-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ରାଜପରିବାରର ଶୈଳଶ୍ରୀ ପ୍ୟାଲେସକୁ ନେଇ ବହୁଦିନରୁ ବିବାଦ ଲାଗିରହିଛି । ଏବେ ପୁଣି ଥରେ ଏହାକୁ ନେଇ କନକବର୍ଦ୍ଧନ ସିଂଦେଓ ଓ ତାଙ୍କ ଭାଇ ଶ୍ରବର୍ଦ୍ଧନ ସିଂଦେଓଙ୍କ ମଧ୍ୟରେ ବିବାଦ ଆରମ୍ଭ ହୋଇଛି । ଶୈଳଶ୍ରୀ ପ୍ୟାଲେସର ପଛପଟେ କନକବର୍ଦ୍ଧନ କିଛି ନିର୍ମାଣ କାମ କରାଉଛନ୍ତି । ଏହାକୁ କନକଙ୍କ ଭାଇ ଶ୍ରୀବର୍ଦ୍ଧନ ସିଂଦେଓ ବିରୋଧ କରୁଛନ୍ତି । ଭୁବନେଶ୍ୱର ଅତିରିକ୍ତ ସିଭିଲଜଜଜ୍ ଙ୍କ କୋର୍ଟର ମାମଲା ନମ୍ବର ୭୦/୨୦୦୮ରେ ଗତ ୨୦୦୮ ମସିହାରୁ ପ୍ୟାଲେସରେ ସ୍ଥିତାବସ୍ଥା(ଷ୍ଟାଟସ-କୋ) ବଜାୟ ରଖିବାକୁ କୋର୍ଟଙ୍କ ନିର୍ଦ୍ଦେଶ ରହିଛି । ମାନ୍ୟବର କୋର୍ଟଙ୍କ ନିର୍ଦ୍ଦେଶକୁ କନକବର୍ଦ୍ଧନ ଜବରଦସ୍ତ ଉଲଂଘନ କରୁଥିବା ଶ୍ରୀବର୍ଦ୍ଧନ ଅଭିଯୋଗ କରି ବଲାଙ୍ଗୀର ଟାଉନ୍‌ ଥାନାରେ ଏତଲା ଦେଇ କାମକୁ ବନ୍ଦ କରାଇବାକୁ ଲିଖିତ ଆକାରରେ ଜଣାଇଛନ୍ତି । ଟାଉନ ଥାନାରେ ଏହି ଅଭିଯୋଗକୁ ନେଇ ଗତ ୨୧.୧୧.୨୦୨୩ରେ ଷ୍ଟେସନଡାୟରୀ(ଜିଡି-୦୧୮)ରେ କରାଯାଇଛି । ତେବେ ଏହା ଏକ ଘରୋଇ ସମ୍ପତ୍ତି(ସିଭିଲ କେସ୍ ) ଜନିତ ମାମଲା ହୋଇଥିବାରୁ ଆବେଦନକାରୀ କୋର୍ଟର ପୁଣିଥରେ ଆଶ୍ରୟ ନିଅନ୍ତୁ ବୋଲି ଟାଉନଥାନା ଆଇଆଇସି ବିଶ୍ୱଜିତ ମନବୋଧ ପରାମର୍ଶ ଦେଇଥିବା କହିଛନ୍ତି ।

  ଅଭିଯୋଗରୁ ଜଣାଯାଇଛି ଯେ, ବଲାଙ୍ଗୀର ରାଜପରିବାରର ସମ୍ପତ୍ତିକୁ ନେଇ ମହାରାଜା ରାଜରାଜ ସିଂଦେଓଙ୍କ ପୁଅ କନକବର୍ଦ୍ଧନ ସିଂଦେଓ ଓ ପଟାୟତ ରାଜା ଅନଙ୍ଗଉଦୟ ସିଂଦେଓଙ୍କ ମଧ୍ୟରେ ଭୁବନେଶ୍ୱର ଅତିରିକ୍ତ ସିଭିଲ ଜଜଙ୍କ କୋର୍ଟରେ ମାମଲା ଚାଲିଛି । ଏହାପରେ ରାଜରାଜଙ୍କ ଦୁଇ ପୁଅ କନକବର୍ଦ୍ଧନ ସିଂଦେଓ ଓ ଶ୍ରୀବର୍ଦ୍ଧନ ସିଂଦଓଙ୍କ ମଧ୍ୟରେ ମଧ୍ୟ କୋର୍ଟରେ ମାମଲା ଚାଲିଛି । ମାନ୍ୟବର କୋର୍ଟ ମାମଲାର ଫଇସଲା ନହେବା ପର୍ଯ୍ୟନ୍ତ 

 ଶୈଳଶ୍ରୀ ପ୍ୟାଲେସର ସ୍ଥିତାବସ୍ଥା ବଜାୟ ରଖିବାକୁ ନିର୍ଦ୍ଦେଶ କରିଛନ୍ତି । କିନ୍ତୁ କନକବର୍ଦ୍ଧନ ସିଂଦେଓ ଏହି ନିର୍ଦ୍ଦେଶକୁ ଉଲଂଘନ କରି ପ୍ୟାଲେସରେ ନିର୍ମାଣକାମ କରାଉଥିବା ଶ୍ରୀ ବର୍ଦ୍ଧନ ଅଭିଯୋଗ କରିଛନ୍ତି । ଏହା ସହିତ ସେ କାମ କରିବାକୁ ମନା କରିବାରୁ ତାଙ୍କୁ ଜୀବନରେ ମାରିଦେବାକୁ ଧମକ ଦିଆଯାଇଥିବା ଶ୍ରୀ ବର୍ଦ୍ଧନ ତାଙ୍କ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି । କିନ୍ତୁ ଏହି ଅଭିଯୋଗ ନେଇ କନକବର୍ଦ୍ଧନ ସିଂଦେଓଙ୍କୁ ପଚାରିବାରୁ ସେ କୋର୍ଟ ନିର୍ଦ୍ଦେଶର ଉଲଂଘନ କରିନାହାଁନ୍ତି ବରଂ ଶ୍ରୀବର୍ଦ୍ଧନ କୋର୍ଟର ଷ୍ଟାଟସକୋ ସତ୍ୱେ ଅନେକ ଜମି ବିକ୍ରୀ କରିଦେଇଛନ୍ତି । ସେ କେବଳ ପ୍ୟାଲେସର କିଛି ଅଂଶକୁ ମରାମତି କରାଉଛନ୍ତି । ଘରଗୁଡିକ ନଷ୍ଟ ନହେବାକୁ କେବଳ ମରାମତି କରାଉଛି ଯାହାକୁ କୋର୍ଟ ନିର୍ଦ୍ଦେଶର ଉଲଂଘନ ନୁହେଁ ବୋଲି କନକ ବର୍ଦ୍ଧନ ସିଂଦେଓ କହିଛନ୍ତି । ରାଜପରିବାରର ଏହି ବିବାଦ ଦିନକୁ ଦିନ ଘନେଇବାରେ ଲାଗିଛି । କେବଳ ସମ୍ପତ୍ତି ନୁହେଁ ରାଜନୈତିକ କ୍ଷେତ୍ରରେ ମଧ୍ୟ କନକବର୍ଦ୍ଧନ ଓ ତାଙ୍କ ଭାଇ ଶ୍ରୀ ବର୍ଦ୍ଧନଙ୍କ ପତ୍ନୀ ପ୍ରକୃତୀଦେବୀଙ୍କ ମଧ୍ୟରେ ପାଟଣାଗଡ ନିର୍ବାଚନମଣ୍ଡଳିରେ ପ୍ରତିଦ୍ୱନ୍ଦିତା ହୋଇଥିଲା । ସେହିପରି କନକବର୍ଦ୍ଧନଙ୍କ ପତ୍ନୀ ସଂଗୀତା କୁମାରୀ ସିଂଦେଓ ଓ ଅନଙ୍ଗଉଦୟ ସିଂଦେଓଙ୍କ ପୁଅ କଳିକେଶ ନାରାୟଣ ସିଂଦେଓଙ୍କ ମଧ୍ୟ ଗତ ୩ଟି ସାଧାରଣ ନିର୍ବାଚନରେ ସାଂସଦ ପଦବୀ ପାଇଁ ପ୍ରତିଦ୍ୱନ୍ଦିତା ହୋଇଛି ।