07-Feb-2023

ବଲାଙ୍ଗୀର(ପ୍ରେରଣା ଖବର)- ବେକାର ଯୁବକ ଯୁବତୀ ମାନଙ୍କ ଠାରୁ ଚାକିରୀ କରାଇ ଦେବା ନାଁ ରେ ଲକ୍ଷାଧିକ ଟଙ୍କାର ଠକେଇ ହୋଇଥିବା ଅଭିଯୋଗ ହୋଇଛି । ଟଙ୍କା ଦେବା ପରେ ମଧ୍ୟ ଚାକିରୀ ନ ମିଳିବା ପରେ ଆଶାୟୀ ଯୁବକ ମାନେ ବଲାଙ୍ଗୀର ଟାଉନ ଥାନାର ଦ୍ୱାରସ୍ଥ ହୋଇଛନ୍ତି । ଅଭିଯୋଗରୁ ପ୍ରକାଶ ଯେ, ବଲାଙ୍ଗୀର ଜିଲ୍ଲା  ଶାନ୍ତିପଡାର ରୋହନ ଦୀପ ନାମକ ଜଣେ ଯୁବକ ପ୍ରାୟ ୮ଜଣ ଯୁବକଙ୍କ ଠାରୁ ସିକ୍ୟୁରିଟି ଗାର୍ଡ ଚାକିରୀ କରାଇ ଦେବା ନାଁ ରେ୨ ଲକ୍ଷ ଟଙ୍କା  ଆଦାୟ କରିଥିଲା ।  ତେବେ ଅନେକ ଦିନ ବିତିଗଲା ପରେ ମଧ୍ୟ ଚାକିରୀ ନ ମିଳିବା ପରେ ଚାକିରୀ ଆଶାୟୀ ମାନେ ରୋହନକୁ ଟଙ୍କା ଫେରସ୍ତ କରିବା ପାଇଁ କହିଥିଲେ । ତେବେ ସେ ଟଙ୍କା ଫେରାଇବା ବଦଳରେ ସେମାନଙ୍କୁ ନାନା ପ୍ରକାରର ଧମକଚମକ ଦେଇଥିଲା । ଶେଷରେ ଏହି ଯୁବକ ମାନେ ନିରାଶ ହୋଇ ବଲାଙ୍ଗୀର ଟାଉନ ଥାନାର ଦ୍ୱାରସ୍ଥ ହୋଇଛନ୍ତି । ଏ ନେଇ ଚାକିରୀ ଆଶାୟୀ ପ୍ରାର୍ଥୀ ସାଲେପାଲିର ବେବି ଦୀପ ଆଜି ଟାଉନ ଥାନରେ ଲିଖିତ ଅଭିଯୋଗ କରି ଠକ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ।