12-Jul-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ବଲାଙ୍ଗୀର କେନ୍ଦୁପତ୍ର ସର୍କଲର ଡିଭିଜନ୍ ଗୁଡିକରେ ଚଳିତବର୍ଷ କେବଳ ଡ୍ରାଇଂ ଆଣ୍ଡ୍ ଷ୍ଟୋରେଜ୍ ରେ କୋଟି କୋଟି ବାଟମାରଣା ହେଉଥିବାର ଚର୍ଚ୍ଚା ହେଉଛି । କିଛିଦିନ ତଳେ ଟିଟିଲାଗଡ ଡିଭିଜନର ତୁଷରା ରେଞ୍ଜ୍ ର ଅର୍ଜୁନପୁର ସମେତ ଅନ୍ୟାନ୍ୟ ସେକ୍ ସନ୍ ରେ ରଚେଇ ଓ ଅନ୍ୟାନ୍ୟ ଗରନା ବା ସାମଗ୍ରୀ କିଣାଦି ବାବଦରେ ଗଣମାଧ୍ୟମରେ ବାରମ୍ବାର ଲୋକଲୋଚନକୁ ଆସିଥିବା ଶ୍ରମିକଙ୍କ ଅଭିଯୋଗକୁ ଭିତ୍ତିକରି ପ୍ରକାଶିତ ତଥ୍ୟରୁ କେବଳ ସେହି ଗୋଟିଏ ରେଞ୍ଜ୍ ରେ ଏବର୍ଷ  ୬ ଲକ୍ଷରୁ ଅଧିକ ଟଙ୍କାର ଦୁର୍ନୀତି ହୋଇଥିବା ଜଣାପଡିଛି ।  ତେଣୁ ବଲାଙ୍ଗୀର ସର୍କଲ ଅଧୀନସ୍ଥ ବଲାଙ୍ଗୀର , ପାଟଣାଗଡ , ଟିଟିଲାଗଡ ଏବଂ ଅନ୍ୟାନ୍ୟ ଡିଭିଜନରେ କେବଳ ଏହିବାବଦର ଗୋଟିଏ ବର୍ଷର ବାଟମାରଣା କୋଟିଏରୁ ଉର୍ଦ୍ଧ୍ବ ହେବା ଆଶଙ୍କାକୁ ଏଡାଇ ଦିଆଯାଇ ନପାରେ ।  

କେବଳ ଗୋଛାକଟେଇ ଓ  ପତ୍ରତୋଳାରେ ଅନ୍ ଲାଇନ୍ ଆକାଉଣ୍ଟ୍ ପେମେଣ୍ଟ୍ କରାଯାଉଥିବାବେଳେ , ଡ୍ରାଇଂ ଆଣ୍ଡ୍ ଷ୍ଟୋରେଜ୍  ସହ ଅନ୍ୟାନ୍ୟ ହେଡ୍ ରେ ନଗଦ ଟଙ୍କାର ମଜୁରୀ ବି ବ୍ୟୟ କରାଯାଉଛି ।  ଏଣୁ ରଚେଇ ଶ୍ରମିକଙ୍କ ମଜୁରୀ ୯୭୦ଟଙ୍କାରୁ କାଟି ସେଢେ ଚାରିଶହ ବା ପାଞ୍ଚଶହ ଟଙ୍କା ଦିଆଯାଉଥିବା ତୁଷରା ରେଞ୍ଜ୍ ରେ ଅଭିଯୋଗ ପ୍ରକାଶ ପାଇଥିଲେ ହେଁ, ବିଭାଗୀୟ ସ୍ପଷ୍ଟୀକରଣ ଦିଆଯାଇନାହିଁ । ଏଣୁ ଏହି ସତ ବୋଲି ଧରିନିଆଯାଇଛି । ଏହି ରେଞ୍ଜ୍ ର ରେଞ୍ଜର ପ୍ରକାଶ କରୀଥିଲେ ଯେ, ସବୁ ରେଞ୍ଜ୍ ରେ ଏପରି ଟଙ୍କା କାଟି ରଖାଯାଇ ଅନ୍ୟାନ୍ୟ ଖର୍ଚ୍ଚ ଆଡଜଷ୍ଟ୍ କରାଯାଏ । ସେହିପରି ଅର୍ଜୁନପୁର ସେକ୍ ସନର ଫରେଷ୍ଟର ସାମଗ୍ରୀ ନିମନ୍ତେ ଏହି  ରଚେଇ ଶ୍ରମିକଙ୍କ ମଜୁରୀରୁ ଟଙ୍କା କଟାଯାଉଥିବା ପ୍ରକାଶ ପାଇଥିଲା । ଏହି ପରିପ୍ରେକ୍ଷୀରେ ବଲାଙ୍ଗୀର ସର୍କଲର ୭ ଟି ଡିଭିଜନ ଅନ୍ତର୍ଗତ ବଲାଙ୍ଗୀର, ପାଟଣାଗଡ, ଟିଟିଲାଗଡ, ପଦ୍ମପୁର, ନବରଙ୍ଗପୁର, ଜୟପୁର,  ଭବାନୀପାଟଣା ଆଦି ଡିଭିଜନକୁ ମିଶାଇଲେ, ଏହି ବିପୁଳ ପରିମାଣରେ ଆର୍ଥିକ ଅନିୟମିତତା ପ୍ରତି ସରକାର ବା ବନବିଭାଗ ଉଦାସୀନତାର କାରଣ କଣ ହେଇପାରେ  ?

ଟିଟିଲାଗଡ ଡିଭିଜନର ବନ୍ଧପଡା, ଟିକ୍ରାପଡା, ସଇଁତଳା, ଗୁଡିଘାଟ, ବଙ୍ଗୋମୁଣ୍ଡା, ବେଲଗାଁ' ହେଉ ବା ପାଟଣାଗଡ ଡିଭିଜନର ଭୁତିଆରବାହାଲ, ପାଟଣାଗଡ, ଖପ୍ରାଖୋଲ,  ଧଣ୍ଡାମୁଣ୍ଡା, କଣ୍ଟାବାଞ୍ଜି (ବେଲପଡା), ଘସିଏନ୍, ବଲାଙ୍ଗୀର ଡିଭିଜନର ବଲାଙ୍ଗୀର, ଲୋଇସିଂହା, ଝାରବନ୍ଧଲି, ଖଲିଆପାଲି, ଖାରୀ ଇତ୍ୟାଦି ରେଞ୍ଜ୍ ରେ ଏହି ରଚେଇ ଶ୍ରମିକଙ୍କ ପାଉଣା ବା ଡ୍ରାଇଂ ଆଣ୍ଡ୍ ଷ୍ଟୋରେଜ୍ ର ନଗଦ ମଜୁରୀ ଓ ଖର୍ଚ୍ଚରେ ଯଦି ଏହି ସମାନ ଧରଣର ଆର୍ଥିକ ଅନିୟମିତତା କରାଯାଇଥାଏ, ଏହାର ଅଧିକ ତଦନ୍ତ ଜରୁରୀ   ବୋଲି ମତପ୍ରକାଶ ପାଉଛି । ବଲାଙ୍ଗୀର କଞ୍ଜରଭେଟରଙ୍କ ଅଧନରେ ରହିଥିବା ଏହି ଡିଭିଜନର ରେଞ୍ଜ୍ ଗୁଡିକରେ ବର୍ଷ ବର୍ଷ ଧରି ଚାଲିଥିବା ଏତେ ବଡ ଆର୍ଥିକ ଅନିୟମିତତାର ଅଭିଯୋଗ ପ୍ରତି ଦୃଷ୍ଟି ଦେବ କିଏ, ଏହା ହିଁ ସବୁଠାରୁ ବଡ ପ୍ରଶ୍ନ ।