05-Jul-2022

ବଲାଙ୍ଗୀର,(ଅନ୍ତର୍ଯ୍ୟାମୀ ସାହୁ): ବଲାଙ୍ଗୀର ଜିଲ୍ଲା ଦେଓଗାଁ ଥାନା ଅନ୍ତର୍ଗତ ଭୁତିଆରବାହାଲ ଗାଁ ନିକଟରେ ଥିବା ମାଁ ଷ୍ଟୋନକ୍ରସରରେ ଆଜି ଏକ ବଡ ଅଘଟଣ ଘଟିଯାଇଛି । କ୍ରସରରେ ନାଇଟ୍ରୋଜେନ ଗ୍ୟାସ ସିଲିଣ୍ଡର ଫିଲିଂ ବେଳେ ତାହା ବ୍ଲାଷ୍ଟ ହୋଇଯିବାରୁ ୩ଜଣ ଶ୍ରମିକ ଗୁରୁତର ଆହତ ହୋଇଯାଇଛନ୍ତି । ତାଙ୍କ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲକୁ ଅଣାଯାଇ ଭର୍ତ୍ତି କରାଯାଇଛି । ତେବେ ବାପି ବାଗଡି ନାମକ ଜଣେ ଶ୍ରମିକ ଅଧିକ ଗୁରୁତର ଥିବାରୁ ତାଙ୍କୁ ବରଗଡ ବିକାଶ ହସପିଟାଲକୁ ନିଆଯାଇ ଭର୍ତ୍ତି କରାଯାଇଛି । ଅନ୍ୟ ଦୁଇଜଣ ବିକାଶ କୁମାର ଓ ରାଜୀବ ବାଗଡି ବଲାଙ୍ଗୀରରେ ଚିକିତ୍ସିତ ହେଉଛନ୍ତି । ବାପିଙ୍କ ଦେହ ପୋଡିଯାଇଥିବା ବେଳେ ଗୋଡ ମଧ୍ୟ ଭାଙ୍ଗିଥିବା କୁହାଯାଉଛି । ସେହିପରି ବିକାଶର ହାତ ଓ ମୁହଁ ପୋଡିଯାଇଛି । ରାଜୀବଙ୍କ ଆଖିରେ ଆଘାତ ଲାଗିଛି । ସେ ଠିକରେ ଦେଖିପାରୁନଥିବା କହିଛନ୍ତି । ତେବେ ଏହି ଶ୍ରମିକମାନେ ପଶ୍ଚିମବଙ୍ଗର ହୋଇଥିବା ବେଳେ ସେମାନେ ଦୈନିକ ମଜୁରିଆ ଭାବରେ କାମ କରୁଥିଲେ ବୋଲି ଜଣାପଡିଛି । କିନ୍ତୁ ସେମାନେ ଏଭଳି ବିପଦପୂର୍ଣ୍ଣ କାମ କରୁଥିଲେ ହେଁ ଶ୍ରମିକଙ୍କ ସୁରକ୍ଷା ଉପକରଣ ଯଥା ହେଲମେଟ, ଗ୍ଲୋବସ ଓ ଜୋତା ପିନ୍ଧିନଥିବା କାରଣରୁ

ଅଘଟଣର ଶୀକର ହୋଇଥିଲେ ବୋଲି କୁହାଯାଉଛି । ମାଁ କ୍ରସରଟି ବଲାଙ୍ଗୀରର ନୀରୋଜ ଅଗ୍ରୱାଲଙ୍କ ନାମରେ ରହିଥିବା ବେଳେ ଏହା ବିନା ପଞ୍ଜିକରଣରେ ବେଆଇନ ଭାବରେ ଚାଲିଥିବା ଅଭିଯୋଗ ହେଉଛି । ପୂର୍ବରୁ ଅନେକ ଥର ଏହି କ୍ରସରକୁ ନେଇ ସ୍ଥାନୀୟ ଲୋକେ ଅଭିଯୋଗ କରିଥିଲେ ହେଁ ପ୍ରଶାସନକୁ ହାତକରି ସବୁ ତଦନ୍ତକୁ ଚପାଇଦିଆଯାଇଛି । ନୀୟମ ରହିଛି କ୍ରସର ଚଳାଇବାକୁ ହେଲେ କ୍ରସର ପଞ୍ଜିକରଣ ସହିତ ନିୟୋଜିତ ଶ୍ରମିକମାନଙ୍କ ପଞ୍ଜିକରଣ ନିତାନ୍ତ ଆବଶ୍ୟକ । କିନ୍ତୁ ଏଠାରେ ସବୁ ନୀୟମକୁ ଫୁ କରି ବେଆଇନ ଭାବରେ ବଙ୍ଗାଳି ଶ୍ରମିକଙ୍କୁ ନିୟୋଜିତ କରାଯାଇଛି । ତେବେ ସବୁଠୁ ଗୁତୁତ୍ୱପୂର୍ଣ୍ଣ ବିଷୟ ହେଲା ଦିନ ୧୦ଟାରେ ଏହି ଘଟଣା ଘଟିଥିଲେ ହେଁ ଦେଓଗାଁ ଥାନାରେ ଏନେଇ ଖବର ନାହିଁ । ଏ ବିଷୟରେ ଦେଓଗାଁ ଥାନା ଅଧିକାରୀଙ୍କୁ ପଚାରିବାରୁ ଦିନ ଅଢେଇଟାରେ ମୁଁ ଏବେ ଏବିଷୟରେ ଜାଣିବାକୁ ପାଇଛି ଓ ଷ୍ଟାଫଙ୍କୁ ପଠାଉଛି ବୋଲି କହିଛନ୍ତି । ବେଆଇନ କ୍ରସର ଓ ବେଆଇନ ଶ୍ରମିକ ନିୟୋଜନ କରାଯାଇଥିବା ବିଷୟକୁ ନେଇ ତଦନ୍ତ କରାଯିବା ସହିତ ଆହତ ଶ୍ରମିକମାନଙ୍କୁ ସହାୟତା ଯୋଗାଇ ଦେବାକୁ ଦାବି ହେଉଛି ।