23-Nov-2020

ବରଗଡ଼(ପ୍ରେରଣା ଖବର)- କିଏ କହେ ଜଣେ ମହିଳା ଜୀବନବ୍ୟାପୀ କେବଳ ଘରର ଚାରିକୋଣ ମଧ୍ୟରେ ଆବଦ୍ଧ ହୋଇ ଜଣେ ପତ୍ନୀ, ବୋହୁ ଓ  ମାଁ ର ଭୂମିକା ତୁଲାଉ ଥିବା । କେବଳ ସେବାକାରିଣୀ ନୁହେଁ   ପରିବର୍ତ୍ତନର ଧାରାରେ ନିଜକୁ ସାମିଲ କରି ସେ ସମାଜକୁ ଏକ ନୂତନ ଦିଗ୍‌ଦର୍ଶନ ଦେଇପାରେ । ସୁଯୋଗ ମିଳିଲେ ଜଣେ ମହିଳା ବି ଯେକୌଣସି କ୍ଷେତ୍ରରେ ସଫଳତାର ଶୀର୍ଷ ସୋପାନରେ ପହଂଚି ପାରିବ । ଏହି ପୁରୁଷ କେନ୍ଦ୍ରୀକ ସମାଜରେ ନାରୀ ଅବଳା କି ଦୁର୍ବାଳ ନୁହେଁ । ଏହି କଥାକୁ ପ୍ରମାଣ କରି ଦେଇଛନ୍ତି ବରଗଡର ବିବାହିତା ଝିଅ  ସ୍ୱାତୀ କୌର । ସ୍ୱାତୀଙ୍କ ବୟସ ୩୬ । ସ୍ୱାତୀ ବିବାହ ପରେ  ସମାଜରେ କିଛି କରି ଦେଖାଇବାର ଶପଥ ନେଇ ଆଗକୁ ବଢ଼ିଥିଲେ । ବାପା,ମାଁ ଓ ଦୁଇଟି ଝିଅଙ୍କୁ ନେଇ ତାଙ୍କର ଛୋଟ  ଓ ସୁଖୀ ପରିବାର ।

 ଦୃଢ଼ ମନୋବଳ ଓ ଆତ୍ମବିଶ୍ୱାସକୁ ପୁଞ୍ଜି କରି ସ୍ୱାତୀ ଆଗେଇ ଚାଲିିଲେ ନିଜ ଲକ୍ଷ୍ୟ କ୍ଷେତ୍ରରେ । ପଶ୍ଚିମ ଓଡ଼ିଶା ପାଇଁ ଗର୍ବର ବିଷୟ ହେଲା ବରଗଡ଼ର ଝିଅ ସ୍ୱାତୀ ମିସେସ୍ ଈଣ୍ଡିଆ ପ୍ରତିଯୋଗିତାରେ ଭାଗ ନେବା ପାଇଁ ଯୋଗ୍ୟ ବିବେଚିତ ହୋଇଛନ୍ତି । ସ୍ୱାତୀ ବର୍ତ୍ତମାନ ନିଜସ୍ୱ ଉଦ୍ୟମରେ ବରଗଡ଼ ସହରରେ ‘ସ୍ୱାତୀ ଦ ଫିଟ୍ ଲାଇଫ ଷ୍ଟାଇଲ୍ ଏକାଡେମୀ’ ନାମକ ଏକ ଲେଡିଜ୍ ଜିମ ପ୍ରତିଷ୍ଠା କରି ମହିଳା ମାନଙ୍କୁ ଫିଟ୍‌ନେସ ଶିକ୍ଷା ଦେଉଛନ୍ତି ।  ଏଥିସହ ସ୍ୱାତୀ ଡବ୍ଲ୍ୟୁସିଡି ଟ୍ରଷ୍ଟ ଜରିଆରେ ସେ କିଛି ସାମାଜିକ କାର୍ଯ୍ୟରେ ନିଜକୁ ନିୟୋଜିତ କରି ପାରିଛନ୍ତି । ପରିବାରରେ ବାପା, ମାଁ ଙ୍କ ଅପାର ସହଯୋଗ ବଳରେ ସେ ଏତେ ବାଟ ଆଗେଇ ପାରିଛନ୍ତି ବୋଲି କୁହନ୍ତ ସ୍ୱାତୀ । ସ୍ୱାତୀଙ୍କ ଆତ୍ମବିଶ୍ୱାସ ବହୁଗୁଣିତ ହେଉ ଓ ସେ ସଫଳତାର ସୋପାନ ଉପରେ ସୋପାନ ଚଢ଼ନ୍ତୁ, ପ୍ରେରଣା ପରିବାର ତରଫରୁ ମାଁ ସମଲେଶ୍ୱରୀଙ୍କ ଠାରେ କାମନା ।