30-May-2022

ବୌଦ୍ଧ(ଅକୃର ସାହୁଙ୍କ ରିପୋର୍ଟ) : ବୌଦ୍ଧର ଐତିହାସିକ ଜିଲା ସଂଗ୍ରହାଳୟ ମଧ୍ୟରେ ଖୋଲା ଆକାଶ ତଳେ ପଡିଥିବା ଏକ ଲୁହା ସିନ୍ଧୁକରୁ ୧୩ କିଲୋ ୨୩୨ ଗ୍ରାମ ରୁପା ଓ ୮ ଗ୍ରାମ ଓଜନର ଅଷ୍ଟଧାତୁ ଅଳଙ୍କାର ଉଦ୍ଧାର କରାଯାଇଥିବା ଜଣାଯାଇଛି । ରାଜାଙ୍କ ସମୟର ପ୍ରାୟ ଦୁଇଶହ ବର୍ଷ ପୂରାତନ ଏହି ଅଳଙ୍କାର ବୋଲି କୁହାଯାଉଥିବାବେଳେ ଏହାର ରେକର୍ଡପତ୍ର କାହା ପାଖରେ ନଥିବା ସମସ୍ତଙ୍କୁ ବିସ୍ମିତ କରିଛି ।  ସୂଚନା ମୁତାବକ ଗତ ଦୁଇବର୍ଷ ତଳେ ବୌଦ୍ଧ ଟ୍ରେଜେରୀ କାର୍ଯ୍ୟାଳୟ ପରିଦର୍ଶନ ସମୟରେ ଜିଲାପାଳ ଲଲାଟେନ୍ଦୁ ମିଶ୍ର ତିନୋଟି ଲୁହା ସିନ୍ଧୁକ ପରିତ୍ୟକ୍ତ ଅବସ୍ଥାରେ ପଡିଥିବା ଦେଖିବାକୁ ପାଇଥିଲେ । ସେତେବେଳେ ତିନୋଟି ଲୁହା ସିନ୍ଧୁକ ମଧ୍ୟରୁ ଗୋଟିଏ ସିନ୍ଧୁକରେ ତାଲା ପଡିଥିବାବେଳେ ଗୋଟିଏ ଖାଲିଥିଲା ଏବଂ ଆଉ ଗୋଟିଏ ସିନ୍ଧୁକର ଉପର ଢାଙ୍କୁଣି ନଷ୍ଟ ହୋଇଯାଇଥିଲା ଯାହାକୁ ଟ୍ରେଜେରୀ କର୍ମଚାରୀମାନେ ଡଷ୍ଟବିନ ଭାବରେ ବ୍ୟବହାର କରୁଥିଲେ । ସେହି ସମୟରେ ଜିଲା ସଂଗ୍ରାହାଳୟ ପାଇଁ ଯୋଜନା ଚାଲିଥିବାବେଳେ ଶାସକ ରାଜାଙ୍କ ସନ୍ତକ ହିସାବରେ ଉକ୍ତ ଲୁହା ସିନ୍ଧୁକ ତିନୋଟିକୁ ସଂଗ୍ରହାଳୟ ମଧ୍ୟରେ ରଖିବାର ନିଷ୍ପତି ନେଇ ଜିଲାପାଳ ଶ୍ରୀମିଶ୍ର ତାହାକୁ ଉଦ୍ଧାର କରି ସଂଗ୍ରହାଳୟ ମଧ୍ୟକୁ ଅଣାଇଥିଲେ । ସଂଗ୍ରହାଳୟ ମଧ୍ୟରେ ଅନ୍ୟାନ୍ୟ ସାମଗ୍ରୀ ସଜାଇ ରଖାଯାଇଥିବାବେଳେ ସିନ୍ଧୁକ ତିନୋଟି ବହୁତ ଭାରି

ଥିବାରୁ ସଂଗ୍ରହାଳୟ ପରିସରରେ ବାହାରେ ପଡି ରହିଥିଲା । ପ୍ରାୟ ଏକବର୍ଷ ସଂଗ୍ରହାଳୟ ମଧ୍ୟରେ ପଡିରହିବାପରେ ରବିବାର ଜିଲାପାଳଙ୍କ ନିର୍ଦ୍ଦେଶକ୍ରମେ ଶିକ୍ଷକ ବସନ୍ତ କୁମାର ସାହୁ, ସଂସ୍କୃତି ଅଧିକାରୀ ଶୁକ୍ରୁ ସ୍ୱାଇଁ ଓ ସହକାରୀ କୋଷାଗାର ଅଧିକାରୀଙ୍କ ଉପସ୍ଥିତିରେ  ଜଣେ ତାଲା ତିଆରିବାଲାକୁ ଡାକି ବନ୍ଦ ହୋଇ ରହିଥିବା ସିନ୍ଧୁକର ତାଲା ଖୋଲାଯାଇଥିଲା । ବନ୍ଦ ଥିବା ସିନ୍ଧୁକ ମଧ୍ୟରୁ ମଳିନ ଦେଖାଯାଉଥିବା କିଛି ଅଳଙ୍କାର ଦେଖାଯିବା ପରେ ତୁରନ୍ତ ଏ ସଂପର୍କରେ ଜିଲାପାଳଙ୍କୁ ସୂଚନା ଦିଆଯାଇଥିଲା । ଜିଲାପାଳଙ୍କ  ଉପସ୍ଥିତିରେ ସମସ୍ତ ପୂରାତନ ଅଳଙ୍କାର ସିନ୍ଧୁକରୁ ଉଦ୍ଧାର କରାଯାଇ ଦୁଇଜଣ ସୁନାରୀଙ୍କ ଦ୍ୱାରା ତାହାକୁ ସଫା କରାଯାଇଥିଲା । ଉଦ୍ଧାର କରାଯାଇଥିବା ଅଳଙ୍କାର ଗୁଡିକୁ ଓଜନ କରାଯିବାପରେ ୧୩ କିଲୋ ୨୩୨ ଗ୍ରାମ ର ରୁପା ଅଳଙ୍କାର ଓ ୮ ଗ୍ରାମର ଏକ ଅଷ୍ଟଧାତୁ ଅଳଙ୍କାର ମିଳିଥିବା ଜଣାଯାଇଛି । ଅଳଙ୍କାର ଗୁଡିକ ମଧ୍ୟରେ ୫୯ଟି ଛତ୍ର,୪୩ ଟି ନାଗ,୮ ଟି ମୁକୁଟ, ୨ ଟି ଚାମର ବେ,୮ ଗୋଟି ଗଦା,୭ ଗୋଟି ଥାଳି ଗିନା,୩ ଟି ଖଗଳା,୪୭ ଟି ପତ୍ର,୧୫ଟି ମାଳା ପଦକ,୨୨ ଟି ବିନ୍ଦି ସମେତ ଅନେକ ଭଙ୍ଗା ଅଳଙ୍କାର ଉଦ୍ଧାର କରାଯାଇଛି । ଅଳଙ୍କାର ଗୁଡିକ ରାଜା ରାଜୁଡା ସମୟର ହୋଇଥିବାବେଳେ ସେଥିରେ ୧୯୦୬ ମସିହାର କିଛି ରୁପା ମୁଦ୍ରା ରହିଥିବା ଜଣାଯାଇଛି । ଉଦ୍ଧାର କରାଯାଇଥିବା ପୂରାତନ ଅଳଙ୍କାରର ମୂଲ୍ୟ ବର୍ତମାନ ବଜାର ଦର ହିସାବରେ ୮ ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ ବୋଲି ଆକଳନ କରାଯାଇଛି । ଉଦ୍ଧାର କରାଯାଇଥିବା ଅଳଙ୍କାର ଗୁଡିକୁ ଉପଜିଲାପାଳ ସନତ କୁମାର ନାଏକ,ତହସିଲଦାର ଦେବୀପ୍ରସାଦ ଦାଶଙ୍କ ଉପସ୍ଥିତିରେ ଏକ ଟିଣ ବାକ୍ସରେ ସିଲ କରାଯିବା ସହିତ ଟ୍ରେଜେରୀ ମଧ୍ୟରେ ରଖାଯାଇଥିବା ଜଣାଯାଇଛି । ପରର୍ବି ସମୟରେ ଉକ୍ତ ଅଳଙ୍କାର ଗୁଡିକୁ ଜିଲା ସଂଗ୍ରହାଳୟ ମଧ୍ୟରେ ସ୍ଥାନ ଦିଆଯିବ ବୋଲି ଜଣାପଡିଛି । ତେବେ ଏହି ଘଟଣା ପରେ ବୌଦ୍ଧ ଟ୍ରେଜେରୀ ପରିଚାଳନା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ଟ୍ରେଜେରୀ ମଧ୍ୟରେ ଅନେକ ମନ୍ଦିରର ଅଳଙ୍କାର ସହିତ ସରକାରୀ ସମ୍ପତି ରହିଥିବାବେଳେ ଏତେ ମାତ୍ରାରେ ଅଳଙ୍କାର ଥିବା ଲୁହା ସିନ୍ଧୁକ କିଭଳି ବାହାରେ ପଡି ରହିଥିଲା । ଯଦି ଟ୍ରେଜେରୀ ରେକର୍ଡରେ ଉକ୍ତ  ସିନ୍ଧୁକ ନାହିଁ ତାହେଲେ ଏହା କେବେ ଅଣାଯାଇଥିଲା ଏବଂ କିଏ ଆଣିଥିଲା ତାହା ମଧ୍ୟ ତଦନ୍ତ ସାପେକ୍ଷ । ତେବେ କିଛି

ଅଳଙ୍କାରରେ ବୌଦ୍ଧ ରାଜମାତା ବୋଲି ଉଲ୍ଲେଖ ରହିଥିବା ସଫେଇ ପରେ ଜଣାପଡିଛି । ତେଣୁ ସ୍ୱାଧୀନତା ପରେ ଏହି ଲୁହା ସିନ୍ଧୁକ ଗୁଡିକୁ ଆଣି ଟ୍ରେଜେରୀରେ ରଖାଯାଇଥିବା ଅନୁମାନ କରାଯାଉଅଛି । ଦୁଇ ଗୋଟି ଲୁହା ସିନ୍ଧୁକ ଖାଲି ପଡିଥିବାବେଳେ ତାହାରି ମଧ୍ୟରେ କଣ ରହିଥିଲା ଏବଂ କେବେ ଖୋଲାଗଲା ତାହାର ମଧ୍ୟ କୌଣସି ରେକର୍ଡ ନଥିବା ଜଣାଯାଇଛି । ଜୈନିକ ଟ୍ରେଜେରୀ କର୍ମଚାରୀଙ୍କ ସୂଚନା ଅନୁଯାୟୀ ଲୁହା ସିନ୍ଧୁକ ତିନୋଟି ପୁରୁଣା ଟ୍ରେଜେରୀ କାର୍ଯ୍ୟାଳୟ ବାରଣ୍ଡାରେ ପଡି ରହିଥିଲା । ନୂତନ କୋଠାକୁ ଟ୍ରେଜେରୀ କାର୍ଯ୍ୟାଳୟ ଉଠିଯିବାପରେ ଲୁହା ସିନ୍ଧୁକ ତିନୋଟିକୁ ବହୁ କଷ୍ଟରେ ସେଠାକୁ ନିଆଯାଇଥିଲା ଏବଂ ସେହିଦିନଠାରୁ ସେସବୁ ଟ୍ରେଜେରୀ ପରିସରରେ ପରିତ୍ୟକ୍ତ ଅବସ୍ଥାରେ ପଡି ରହିଥିଲା । ତେବେ ସିନ୍ଧୁକ ମଧ୍ୟରୁ ରୁପା ଅଳଙ୍କାର ବାହାରିବା ପରେ ତାହାକୁ ଦେଖିବା ପାଇଁ ସାଧାରଣ ଲୋକଙ୍କ ମଧ୍ୟରେ ଉତ୍କଣ୍ଠା ବୃଦ୍ଧି ପାଇଛି । ତୁରନ୍ତ ସେଗୁଡିକୁ ସଂଗ୍ରହାଳୟ ମଧ୍ୟରେ ସ୍ଥାନ ଦେବାକୁ ସାଧାରଣରେ ମତପ୍ରକାଶ ପାଉଅଛି । ଅଳଙ୍କାର ଗୁଡିକ ସଫେଇ କାର୍ଯ୍ୟରେ ସଂଜିବ କୁମାର ସାହୁ ,ଦତାଦ୍ରୟ ସାହ,ନିଳଲୋହିତ ମହାପାତ୍ର,ସ୍ୱାଧୀନ କୁମାର ପରିଡା ପ୍ରମୁଖ ସହଯୋଗ କରିଥିଲେ ।