12-May-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ): ସଂପ୍ରତି ବଲାଙ୍ଗୀରଜିଲ୍ଲା କ୍ରାଇମ୍ ଡିଷ୍ଟ୍ରିକ୍ଟ୍ ପାଲଟିଛି ବୋଲି ଗଣମାଧ୍ୟମରେ ପ୍ରକାଶ ପାଇଛି ।  ସହରରେ ହେଉ ବା ଗ୍ରାମାଞ୍ଚଳରେ  ଏଇ ଅଳ୍ପକିଛିଦିନ ମଧ୍ୟରେ କେତେକ ବହୁଚର୍ଚ୍ଚିତ ନରହତ୍ୟା , ରାଗିଂ ଜନିତ ଆତ୍ମହତ୍ୟା , ରାଜ୍ୟବାହାରକୁ ଯାଇ ଶୋଷଣ ଓ ନିର୍ଯାତନାର ଅଭିଯୋଗ ହେଉଥିବା ଦାଦନଶ୍ରମିକ ଶବ ହୋଇ ଫେରିବା ବା ଅନ୍ୟାନ୍ୟ ଅପରାଧ ଘଟଣାର ତଦନ୍ତରେ  ଲୋକେ ଅନୁଭବ କରୁଥିବା ତ୍ରୁଟିବିଚ୍ୟୁତି କିମ୍ବା ଅନିୟମିତତାର ଜନଅସନ୍ତୋଷ ସତ୍ତ୍ୱେ , ଆପତ୍ତିଜନକ ଭାବରେ ଚୁପ୍ ରହିଯାଉଥିବା ଲକ୍ଷ୍ୟ କରାଯାଇଛି ।  ଏହାର କାରଣ କ'ଣ ହେଇପାରେ  ?

ଇତିମଧ୍ୟରେ  ବଲାଙ୍ଗୀର ଭୀମଭୋଇ ମେଡିକାଲ କଲେଜର ଦୁଇଜଣ ଛାତ୍ରଛାତ୍ରୀ ଏକବର୍ଷ ମଧ୍ୟରେ ରାଗିଂ ଅଭିଯୋଗରେ ମୃତ୍ୟୁବରଣ କରିଥିବା ଘଟଣା ରାଜ୍ୟବ୍ୟାପି ଚର୍ଚ୍ଚାର ବିଷୟ ହୋଇଛି । ଘଟଣାର ଦୀର୍ଘଦିନ ପରେ ବି ଏଥିରେ କାହାକୁ ଦୋଷାରୋପ ସତ୍ତ୍ୱେ  ପୁଲିସ୍ ତଦନ୍ତାଧୀନ କରାଯାଇନାହିଁ । ବହୁ ସଂଗଠନର ଦାବି ପରେ ମଧ୍ୟ ସ୍ଥାନୀୟ ନିର୍ବାଚିତ ସାଂସଦ , ବିଧାୟକଙ୍କ ପରି ଲୋକପ୍ରତିନିଧିମାନେ ମୁହଁ ଖୋଲୁ ନାହାଁନ୍ତି  !

ସେହିପରି ଗତ ୫ ତାରିଖରେ ପାଟଣାଗଡରେ ମିଥ୍ୟାବିଲ୍ କୁ ବିରୋଧ କରିବାରୁ ଜଣେ ସଚ୍ଚୋଟ ବ୍ଲକ୍ କନିଷ୍ଠଯନ୍ତ୍ରୀଙ୍କୁ ସ୍ପଷ୍ଟଦିବାଲୋକରେ ହତ୍ୟା କରାଯାଇ ତାଙ୍କ ମୃତଦେହକୁ ଫିଙ୍ଗିଦିଆଯାଇଥିଲା । ସ୍ଥାନୀୟ ରାଜନୈତିକ ଠିକାଦାରମାନେ ଏଥିରେ ସମ୍ପୃକ୍ତ ଥିବା ଖୋଲାଖୋଲି ଚର୍ଚ୍ଚା ସତ୍ତ୍ୱେ , ସେଇ ସହରର ବାସିନ୍ଦା ସାଂସଦ ବା ସ୍ଥାନୀୟ ବିଧାୟକଙ୍କ ପାଟି ଖୋଲୁନାହିଁ । ଅଧିକନ୍ତୁ ଉକ୍ତ ବ୍ଲକ୍ ର ଅଧ୍ୟକ୍ଷ ରହସ୍ୟମୟ ନୀରବତା ଅବଲମ୍ବନ କରିଆସୁଥିବା ସହିତ ବ୍ଲକ୍ ର କର୍ମଚାରୀମାନେ ଏଥିପାଇଁ କାର୍ଯ୍ୟବନ୍ଦ ଆନ୍ଦୋଳନ ପାଇଁ ଟେଣ୍ଟ୍ ପକାଇ ସାରିଥିବା ସତ୍ତ୍ୱେ , ରହସ୍ୟମୟ ଭାବେ ହଠାତ୍ ଖୋଲିନେଇ ଆନ୍ଦୋଳନକୁ ସ୍ଥଗିତ କରିଦେବା , ସମଲୋଚନା ପ୍ରକାଶ ପାଇଛି ।

ତୃତୀୟରେ ଇତିମଧ୍ୟରେ କେବଳ ବେଲପଡାବ୍ଲକ୍ ର ଯୁବା , ସୁଲେକେଲା ଓ ଧୁମାଭଟାର ୩ ଜଣ ଦାଦନଶ୍ରମିକଙ୍କର ଶବ ରାଜ୍ୟବାହାରୁ ଫେରଲାଣି ।  ଜିଲ୍ଲାର ଦାଦନଗଡ ଭାବରେ କୁଖ୍ୟାତ ଏହି ବ୍ଲକ୍ ର ନିର୍ବାଚିତ ଲୋକପ୍ରତିନିଧିମାନେ କିଏ ଓ କାହିଁକି ନୀରବ ରହିଛନ୍ତି , ଏକଥା ବୁଝାଇବାର ଆବଶ୍ୟକତା ନାଇଁ ।
ଉଦାହରଣତଃ , ଉପରୋକ୍ତ ଅପରାଧ , ବେଆଇନ୍ ମାମଲାଗୁଡିକର ତଦନ୍ତରେ ଆପତ୍ତିଜନକ କାଳକ୍ଷେପଣ , ଚପାଇଦିଆଯାଉଥିବା ଅଭିଯୋଗ ଓ ଭିନ୍ନମୋଡ ଦିଆଯାଉଥିବା ସନ୍ଦେହ ସୃଷ୍ଟି ହୋଇଛି ।

ଏହାସହିତ ଜିଲ୍ଲାର ଅନ୍ୟାନ୍ୟ ସ୍ଥାନରେ ଘଟୁଥିବା ବିଭିନ୍ନ ଅପରାଧଘଟଣାରେ ଏହି ଲୋକପ୍ରତିନିଧିମାନଙ୍କର ରହସ୍ୟମୟ ନୀରବତାର ଅର୍ଥ ଲୋକେ ଠିକ୍ ବୁଝିପାରୁଛନ୍ତି । ଏସବୁଥିରେ ହୁଏତ ସେମାନଙ୍କ ଲୋକଙ୍କର ସମ୍ପୃକ୍ତି ରହିଛି କିମ୍ବା ଗୃହବିଭାଗ ବନାମ ସରକାରଙ୍କ ବିରୋଧରେ ଯିବାକୁ ସେମାନଙ୍କର ସତ୍ ସାହସ ନାହିଁ । ତେଣୁ ଏଠାରେ ପ୍ରଶ୍ନ ଉଠୁଛି , ଏହି ନିର୍ବାଚିତ ଲୋକପ୍ରତିନିଧିମାନଙ୍କର କେବଳ ସଭାସମିତି , ଉଦ୍ ଘାଟନ , ଫେସ୍ ବୁକ୍ ରେ ଫଟୋ ପ୍ରଚାର ଓ ଭାଷଣ ଦେବା ବ୍ୟତୀତ ଏହିସବୁ ଗୁରୁତର ବହୁଚର୍ଚ୍ଚିତ ଅପରାଧମାମଲାର ତଦନ୍ତରେ ପାଟି ଖୋଲିବାର କଣ ସତରେ ଦାୟିତ୍ୱ ନଥାଏ  ?