11-Oct-2026

ବଲାଙ୍ଗୀର(ପ୍ରେରଣା ଖବର): ସାହିତ୍ୟ ସର୍ବଦା ସମାଜର ଦର୍ପଣ।ଏହା ମଣିଷର ଅନୁଭୂତି, ସାମାଜିକ ବାସ୍ତବତା ଓ ଜୀବନର ବିଭିନ୍ନ ଦିଗକୁ ଶବ୍ଦରେ ରୂପ ଦେଇଥାଏ।ଲେଖକଙ୍କ ଜୀବନ, ସାହିତ୍ୟ ସାଧନା ଓ ସୃଜନଶୀଳ ଚିନ୍ତାଧାରାକୁ ନିକଟରୁ ଜାଣିବା ଉଦ୍ଦେଶ୍ୟରେ ‘ଲେଖକଙ୍କ ସହ ଭାବ ବିନିମୟ' କାର୍ଯ୍ୟକ୍ରମରେ ବିଶିଷ୍ଟ ସାହିତ୍ୟିକ ପ୍ରଦୀପ ମିଶ୍ରଙ୍କ ସହ ଏକ ଆକର୍ଷଣୀୟ ଆଲୋଚନା ଓ ଭାବବିନିମୟ ଗାଳ୍ପିକଙ୍କ ବାସଭବନ ‘ସପ୍ତପର୍ଣ୍ଣି’ ଠାରେ ଅନୁଷ୍ଠିତ ହୋଇଥିଲା।ଏହି ସାକ୍ଷାତକାରରେ ପାଠକ ରଞ୍ଜିତ ମିଶ୍ରଙ୍କ ସମେତ ଶିକ୍ଷକ ଚୂଡ଼ାମଣି ସେଠ,ମହେଶ

ମିଶ୍ର,ଦଧିବାବନ ବାଘ,ସବ୍ୟସାଚୀ ସାହୁ,ସୁବ୍ରତ ସାହୁ,ହରି ଖେତୀ ଓ ଉପଦେଷ୍ଟା ଲକ୍ଷ୍ମୀ ଖେତୀ ଲେଖକଙ୍କ ସହ ଆଲୋଚନା କରିଥିଲେ।ଲେଖକଙ୍କ ସାହିତ୍ୟିକ ଯାତ୍ରା,ଲେଖନୀର ପ୍ରେରଣା,ଗଳ୍ପ ରଚନାର ପୃଷ୍ଠଭୂମି ଓ ସାହିତ୍ୟ ସୃଷ୍ଟି ପଛରେ ରହିଥିବା ଅନୁଭୂତି ସମ୍ପର୍କରେ ଉପସ୍ଥିତ ସଦସ୍ୟମାନେ ଜାଣିବାର ସୁଯୋଗ ପାଇଥିଲେ।ଏହି ଅବସରରେ ଲେଖକ ପ୍ରଦୀପ ମିଶ୍ର ନିଜର ପ୍ରଥମ ଗଳ୍ପ ‘ଯାହା ଯେମିତି ଘଟୁଥାଏ’ ସମେତ ତାଙ୍କର ଅନ୍ୟାନ୍ୟ ଗଳ୍ପ ‘ଟ୍ରାପ୍’,‘ନାଭିନାଡ଼’,'ଅପାରମ୍ପରିକ' ଓ ‘ମୋ ବାପାଙ୍କ ଛାମୁଦାନ୍ତ’ ଆଦି ସମ୍ପର୍କରେ ଆଲୋଚନା କରିଥିଲେ।ଗଳ୍ପଗୁଡ଼ିକର ରଚନା ପଛରେ ଥିବା ଭାବନା,ଜୀବନର ଅନୁଭବ ଓ ସୃଜନଶୀଳ ଦୃଷ୍ଟିକୋଣ ସମ୍ପର୍କରେ ଲେଖକଙ୍କଠାରୁ ଶୁଣି ସଦସ୍ୟମାନେ ସାହିତ୍ୟର ଅନ୍ତରଙ୍ଗ ଦିଗକୁ ବୁଝିବାର ସୁଯୋଗ ପାଇଥିଲେ।ସାହିତ୍ୟ କେବଳ ମନୋରଞ୍ଜନର ମାଧ୍ୟମ ନୁହେଁ;ଏହା ସମାଜର ବାସ୍ତବ ଚିତ୍ରକୁ ପ୍ରତିଫଳିତ କରିବା ସହ ମାନବୀୟ ମୂଲ୍ୟବୋଧ, ନୈତିକତା ଓ ସାମାଜିକ ଚେତନାର ବିକାଶରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନିଭାଏ। ଲେଖକଙ୍କ ଅନୁଭୂତି ଓ ସୃଜନ ପ୍ରକ୍ରିୟାକୁ ନିକଟରୁ

ଜାଣିବା ଦ୍ୱାରା ପାଠକମାନେ ଗୋଟିଏ ସାହିତ୍ୟକୃତିର ଗଭୀରତା ଓ ତାହା ପଛରେ ଥିବା ଚିନ୍ତାଧାରାକୁ ଅଧିକ ଭଲଭାବେ ଅନୁଭବ କରିପାରନ୍ତି।ଏଭଳି ସାକ୍ଷାତକାର କାର୍ଯ୍ୟକ୍ରମ ଲେଖକ ଓ ପାଠକଙ୍କ ମଧ୍ୟରେ ସୁସମ୍ପର୍କ ସ୍ଥାପନ କରିବା ସହ ସାହିତ୍ୟ ଚର୍ଚ୍ଚାକୁ ଅଧିକ ଜୀବନ୍ତ କରିଥାଏ ବୋଲି ଲେଖକ ପ୍ରଦୀପ ମିଶ୍ର ଙ୍କ ଧର୍ମପତ୍ନୀ ତଥା ଲୋଇସିଂହା ଡ଼ିଗ୍ରୀ କଲେଜ ର ଶିକ୍ଷା ବିଭାଗ ର ଅଧ୍ୟାପିକା ଶାନ୍ତି ପ୍ରିୟା ହୋତା ମତବ୍ୟକ୍ତ କରିଥିଲେ।ବିଶେଷ କରି ଯୁବପିଢ଼ିଙ୍କ ମଧ୍ୟରେ ପୁସ୍ତକ ପଠନ,ଗଳ୍ପ ଲେଖନ ଓ ସୃଜନଶୀଳ ଚିନ୍ତାଧାରା ପ୍ରତି ଆଗ୍ରହ ବୃଦ୍ଧି କରିବାରେ ଏପରି ପ୍ରୟାସ ନିଶ୍ଚିତ ଭାବେ ପ୍ରେରଣାଦାୟକ ହେବ ବୋଲି ଗାଳ୍ପିକ ପ୍ରଦୀପ ମିଶ୍ର ନିଜ ବକ୍ତବ୍ୟରେ କହିଥିଲେ।