12-Oct-2026

ବଲାଙ୍ଗୀର(ପ୍ରେରଣା ଖବର):ବଲାଙ୍ଗୀର ସାଂସ୍କୃତିକ ଅନୁଷ୍ଠାନ ‘ଏକତା’ ପକ୍ଷରୁ ଆୟୋଜିତ ତିନିଦିନିଆ ‘ଏକତା କଳା ଉତ୍ସବ-୨୦୨୬’ ଅକ୍ଟୋବର ୯, ୧୦ ଓ ୧୧ ତାରିଖରେ ମହାସମାରୋହରେ ଅନୁଷ୍ଠିତ ହୋଇ ଉଦ୍‌ଯାପିତ ହୋଇଯାଇଛି । ଏହି ଉତ୍ସବରେ ପଶ୍ଚିମ ଓଡ଼ିଶାର ସମୃଦ୍ଧ ଲୋକକଳା, ଲୋକନୃତ୍ୟ ଓ ଲୋକସଙ୍ଗୀତର ଅପୂର୍ବ ଝଲକ ଦେଖିବାକୁ ମିଳିଥିଲା।

ଉଦ୍‌ଯାପନୀ ସମାରୋହରେ ବ୍ଲକ୍‌ ଅଧ୍ୟକ୍ଷା ଶ୍ରୀମତୀ ସରିତା ବାଗ ମୁଖ୍ୟ ଅତିଥି ଏବଂ ନାରାୟଣ ପ୍ଲେ ସ୍କୁଲର ଅଧ୍ୟକ୍ଷ ଦିବ୍ୟନାରାୟଣ ମିଶ୍ର ମୁଖ୍ୟବକ୍ତା ଭାବେ

ଯୋଗଦେଇଥିଲେ । ଏଥିରେ ମହିଳା ସମିତିର ସଦସ୍ୟାମାନେ ମଧ୍ୟ ଅତିଥି ଭାବେ ଯୋଗ ଦେଇଥିଲେ ।ତିନିଦିନ ଧରି ଆୟୋଜିତ ଏହି କଳା ଉତ୍ସବରେ ସମ୍ବଲପୁରୀ ଲୋକନୃତ୍ୟ, ଲୋକସଙ୍ଗୀତ ଓ ପାରମ୍ପରିକ ବାଦ୍ୟଯନ୍ତ୍ରର ତାଳେତାଳେ କଳାକାରମାନେ ନିଜର କଳାନୈପୁଣ୍ୟ ପ୍ରଦର୍ଶନ କରିଥିଲେ । ଘୁକା, ଦୁଲଦୁଲି, ବଜନିଆ, ଚୁଟକୁଚୁଟା, ଡାଲଖାଇ ଓ ରସରକେଲି ଭଳି ଆଞ୍ଚଳିକ ଲୋକକଳା ଓ ଲୋକନୃତ୍ୟ ଉତ୍ସବକୁ ଅଧିକ ଆକର୍ଷଣୀୟ କରିଥିଲା। ଏହି ପାରମ୍ପରିକ କଳା ପ୍ରଦର୍ଶନ ଦର୍ଶକଙ୍କ ମନ ମୋହି ଥିଲା।

ଉତ୍ସବର ଦ୍ୱିତୀୟ ଦିନରେ ବିଦ୍ୟାଳୟ ଓ ମହାବିଦ୍ୟାଳୟର ଛାତ୍ରଛାତ୍ରୀଙ୍କୁ ନେଇ ଆମ ଲୋକକଳା ଓ ସଂସ୍କୃତି ଆଧାରିତ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇଥିଲା। ଛାତ୍ରଛାତ୍ରୀମାନେ ଏଥିରେ ଉତ୍ସାହର ସହ ଅଂଶଗ୍ରହଣ କରି ନିଜର ପ୍ରତିଭା ପ୍ରଦର୍ଶନ କରିଥିଲେ।

ଉଦ୍‌ଯାପନୀ ସମାରୋହରେ ‘ଏକତା’ ଅନୁଷ୍ଠାନର ସମ୍ପାଦକ ସୁବଳ ମହାକୁର ଧନ୍ୟବାଦ ଅର୍ପଣ କରିଥିଲେ। ଆଞ୍ଚଳିକ ଲୋକକଳା ଓ ସଂସ୍କୃତିର ସଂରକ୍ଷଣ, ପ୍ରଚାରପ୍ରସାର ଏବଂ ନୂତନ ପିଢ଼ି ମଧ୍ୟରେ ଏହା ପ୍ରତି ଆଗ୍ରହ ସୃଷ୍ଟି କରିବା ଉଦ୍ଦେଶ୍ୟରେ ଆୟୋଜିତ ଏହି ଉତ୍ସବ ସାଂସ୍କୃତିକ ଏକତାର ବାର୍ତ୍ତା ପ୍ରଦାନ କରିଥିଲା।