23-Apr-2022

ବଲାଙ୍ଗୀର :(ମଳୟ ମିଶ୍ରଙ୍କ ରିପୋର୍ଟ ):  ଗତକାଲି ଦିନପ୍ରାୟ ୩ ଟାବେଳେ ବଲାଙ୍ଗୀର ଭୀମଭୋଇ ମେଡିକାଲ କଲେଜର ଇଟର୍ନ ହଷ୍ଟେଲ ସାମ୍ନା ରାସ୍ତାରେ ପଡିଥିବା ଜଣେ ପ୍ରଥମବର୍ଷର ଛାତ୍ରର ମୃତଦେହ ଉଦ୍ଧାର କରାଯାଇଛି । ମାତ୍ର ୧୦ ଦିନତଳେ ଆସିଥିବା ହରିୟାଣାର ଈଶାନ୍ତ କୁମାର ନାମକ ଏହି ଛାତ୍ରଙ୍କ ଏଭଳି ଆକସ୍ମିକମୃତ୍ୟୁକୁ ନେଇ ବିଭିନ୍ନ ଅଭିଯୋଗ ଓ ଚର୍ଚ୍ଚା ଶୁଣାଯାଇଛି । ଆଜି ହରିୟାଣାରୁ ମୃତ ଛାତ୍ରର ବାପମାଆ ପରିବାରବର୍ଗ ଏଠାରେ ଆସି ପହଞ୍ଚିଲା ପରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଥିଲା । ମୃତ ଛାତ୍ରଙ୍କ ମାଆ କାନ୍ଦି କାନ୍ଦି ତାଙ୍କ ପୁଅକୁ କଲେଜର ସିନିଅର ଛାତ୍ରମାନେ ଗତ ତିନିଦିନହେଲା ରୀତିମତ ରାଗିଂ କରୁଥିବା ଏବଂ ଏସମ୍ପର୍କରେ ତାଙ୍କ ପୁଅ ତାଙ୍କୁ ଫୋନ୍ ରେ କାନ୍ଦି କାନ୍ଦି ଗୁହାରି କରୁଥିବା ଗଣମାଧ୍ୟମରେ ପ୍ରକାଶ କରିଛନ୍ତି । ତାଙ୍କ ମାମୁଁ ମଧ୍ୟ ଏହି ସମାନ ଅଭିଯୋଗ ପ୍ରକାଶ କରିଛନ୍ତି । ତେବେ କଲେଜର ଡିନ୍ ଓ କେତେକ ସହପାଠୀ ସିନିଅର୍ ଛାତ୍ର କଲେଜରେ ରାଗିଂ ହେଉଥିବା ଅଭିଯୋଗକୁ ଖଣ୍ଡନ କରିଛନ୍ତି । ଆଜି ଜିଲ୍ଲାମୁଖ୍ୟ ଡାକ୍ତରଖାନାରେ ତାଙ୍କର ଶବବ୍ୟବଚ୍ଛେଦ କରାଯାଇଛି । ତେବେ କାହିଁକି କେଜାଣି ଶବବ୍ୟବଚ୍ଛେଦ ନ କରିବାକୁ ତାଙ୍କ ପରିବାର ଲୋକେ ଅଡି ବସିଥିବା ଦେଖାଯାଇଥିଲା । ତେବେ ସଦର ଏସଡିପିଓ , ଟାଉନ ଥାନାଧିକାରିଣୀ ଓ ମେଡିକାଲ କଲେଜର ଏଫ ଏମ ଟି ପ୍ରଫେସର ବୁଝାଇବାରୁ ସେମାନେ ଶେଷରେ ରାଜି ହୋଇଥିବା ପ୍ରକାଶ ।

ମୃତଛାତ୍ର ଜଣକ ନିଉ ବଏଜ୍ ଇଟର୍ନ ହଷ୍ଟେଲର  ୩ୟ ମହଲାରେ ୩୧୨ ନମ୍ବର ରୁମ୍ ରେ ଏକାକୀ ରହୁଥିଲେ । ଘଟଣାଦିନ ସେ ସ୍ବାଭାବିକ ଭାବେ କ୍ଲାସ୍ ସାରି ଲଞ୍ଚ୍ ଖାଇସାରି ଥିଲେ । ତେବେ କେଉଁ କାରଣରୁ ସେ ପ୍ରଚଣ୍ଡ ଖରାବେଳେ ହଷ୍ଟେଲର ପାଞ୍ଚମହଲାର ଛାତକୁ ଯାଇଥିଲେ ବା ସେ ସେଠାରେ ଚପଲ ରଖି କାହିଁକି ଚାରିଫୁଟ୍ ର ପ୍ରୋଟେକ୍ ସନ୍ ବାଡା ଡେଇଁ ତଳକୁ ଡେଇଁପଡିଲେ ବା ତାଙ୍କୁ କେହି ଠେଲିଦେଇଥିଲା ବା  ଅନ୍ୟକିଛି ଘଟିଲା , ଏହା ଅଦ୍ୟାବଧି ଜଣାପଡିପାରିନାହିଁ । ତେବେ ସେ ମୁହଁମାଡି ହଷ୍ଟେଲ ସାମ୍ନାରେ ପଡିଥିବା ଦେଖି ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା ଓ ତାଙ୍କର ମୃତ୍ୟୁ ହୋଇଥିବା ଜଣାପଡିଥିଲା । କଲେଜର କିଛି ଛାତ୍ର ଓ ମେଡିକାଲ କଲେଜ କର୍ତ୍ତୃପକ୍ଷ ତାଙ୍କୁ ଉଦ୍ଧାର କରି ଚିକିତ୍ସାପାଇଁ ନେଇଯାଇଥିଲେ । ତେବେ ଦେଖିଥିବା ଲୋକଙ୍କଠାରୁ ପ୍ରକାଶ ଯେ ତାଙ୍କର ଗୋଟିଏ ଗୋଡର ବଳାଗଣ୍ଠି ପାଖରେ ସାମାନ୍ୟ ଆଞ୍ଚୁଡାଦାଗ ବ୍ୟତୀତ ଦେହର କୌଣସିଠାରେ କିଛି ଆଘାତ ଚିହ୍ନ ଥିବା ଦେଖାଯାଉ ନଥିଲା !  ଏତେଉଚ୍ଚରୁ ପଡି ତାଙ୍କର ମୁଣ୍ଡଫୁଣ୍ଡ ଫାଟି ନଥିବା , ରକ୍ତବାହାରୁ ନଥିବା ଇତ୍ୟାଦି ସନ୍ଦେହ ସୃଷ୍ଟି କରିଛି । ତେବେ ଆଜିର ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ସବୁ ସ୍ପଷ୍ଟ ହୋଇଯିବ ବୋଲି କୁହାଯାଉଛି ।

ଉଲ୍ଲେଖନୀୟ ଯେ ଏହା ଏହି ମେଡିକାଲକଲେଜରେ ପ୍ରଥମ ଅଘଟଣ ନୁହେଁ । କିଛିମାସତଳେ ବଲାଙ୍ଗୀରର ଜଣେ ଛାତ୍ରୀ ଝର୍କାରେଲିଂରେ ବେକ ବାନ୍ଧି ନିହାତି ଅସ୍ବାଭାବିକଭାବେ ଆତ୍ମହତ୍ୟା କରିଥିବା ଘଟଣା ଘଟିଥିଲା । ଅଦ୍ୟାବଧି ଏହାର ରହସ୍ୟ ଉନ୍ମୋଚିତ ହୋଇପାରିନାହିଁ । ସେତେବେଳେ ମଧ୍ୟ ଏବେ ଦାୟିତ୍ୱରେ ରହିଥିବା ଡିନ୍ ଡା. ସବିତା ମହାପାତ୍ର କଥାରେ ତାଳମେଳ ନଥିବା ଭଳି କଥା କହିଥିଲେ । ଏହି ଘଟଣାରେ ମଧ୍ୟ ସେ ରାଗିଂ ଅଭିଯୋଗକୁ ଅସ୍ବୀକାର କରିଛନ୍ତି 

ଘଟଣାଟି ସମଗ୍ର ରାଜ୍ୟରେ  ଚର୍ଚ୍ଚାର ବିଷୟ ହୋଇପଡିଛି  । ଏହା ଆତ୍ମହତ୍ୟା , ହତ୍ୟା , ଦୁର୍ଘଟଣା ନା ଆଉକିଛି ତଦନ୍ତ ପରେ ଜଣାପଡିବ ବୋଲି କୁହାଯାଉଥିଲାବେଳେ ପୋଷ୍ଟମର୍ଟମ୍ ହାଉସ୍ ରେ ଆଜି ଘଣ୍ଟାଏକାଳ ପୁଲିସ୍ , ପରିବାରଲୋକେ ଓ ମେଡିକାଲ ଷ୍ଟାଫ୍  ଙ୍କ ମଧ୍ୟରେ ସାମ୍ବାଦିକଙ୍କ ଉପସ୍ଥିତିରେ ମସୁଧା କଲାଭଳି ଦୃଶ୍ୟ ସନ୍ଦେହ ସୃଷ୍ଟି କରିଛି ।

ଅଜବ୍ କଥା ଯେ କେତେକ ଗଣମାଧ୍ୟମରେ ସାତମହଲାକୋଠାରୁ ପଡିଥିବା ପ୍ରକାଶ ପାଇଥିଲାବେଳେ , କେତେକଥିରେ ପାଞ୍ଚମହଲା ବୋଲି ପ୍ରକାଶ ପାଇଛି ।  ସେହିପରି ଘଟଣାସମୟରେ ଡିଉଟିରେ ଥିବା ଜଣେ ସିକ୍ୟୁରିଟି ଗାର୍ଡ  ସାତମହଲାକୋଠାରୁ ପଡିଥିବା , ସେଠାରେ ତିନିଜଣ ପିଲା ଥିବା ଓ ସେ ପଡିଲା ଭଳି କିଛି ଶବ୍ଦ ଶୁଣିଥିବା ଗଣମାଧ୍ୟମରେ କହିଛି । ଉଲ୍ଲେଖନୀୟ ଯେ ମେଡିକାଲକଲେଜର କୋଠାଟି ସାତମହଲାବିଶିଷ୍ଟ ହୋଇଥିବାବେଳେ ଛାତ୍ରଜଣକ ରହୁଥିବା ଇଟର୍ନ ହଷ୍ଟେଲଟି ପାଞ୍ଚମହଲାର । ପିଲାଟି ରହୁଥିବା ରୁମ୍ ରେ ତାଲାପଡିଥିବା ଓ ଚାବି ମୃତକର ପକେଟ୍ ରୁ ମିଳିଥିଲା । ତେଣୁ ପିଲାମାନେ କୋଉ କୋଠାରେ ଲଞ୍ଚ୍ ଖାଇଲେ ଓ ଖାଇସାରି କୋଉଠି ଯାଇ ବିଶ୍ରାମ ନେଇଥିଲାବେଳେ ଏ ଅଘଟଣ ଘଟିଲା  କେହି କହିପାରୁ ନାହାଁନ୍ତି । ପ୍ରାୟ ଅପରାହ୍ନ ୩ ଟାବେଳେ ଛାତାଜଣକ ହଷ୍ଟେଲ ସାମ୍ନା ରାସ୍ତାରେ ତଳେ ମୁହଁମାଡି ଅକ୍ଷତ ଅବସ୍ଥାରେ ପଡିଥିବା ଦେଖାଯାଇଥିଲା । ଏଣୁ କେତେକ ସାମ୍ବାଦିକଙ୍କ ଅସମର୍ଥିତ ସୂତ୍ରରୁ ଅନୁମାନ କରାଯାଏ ଯେ ଛାତ୍ରଜଣକୁ ରାଗିଂ କରି ପିଟାପିଟିରେ କିଛି ଘଟିବାରୁ ତାକୁ ଆଣି ତଳେ ଶୁଆ ଦିଆଯାଇଛି କି  ?

ସେ ଯାହାହେଉ , ଏସ ପି ଘଟଣାସ୍ଥଳକୁ ଯାଇ ତଦନ୍ତର ନିର୍ଦ୍ଦେଶ ଦେଇଛନ୍ତି ଓ ଏସଡିପିଓଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ଆଇଆଇସିଙ୍କ ଦ୍ବାରା ତଦନ୍ତ ଚାଲିଛି ।