16-Apr-2022

ଭୁବନେଶ୍ୱର ତା ୧୬.୦୪ : ଦୀର୍ଘ  ତିନି ଦଶନ୍ଧିରୁ ଉର୍ଦ୍ଧ୍ୱକାଳ ଧରି  ଓଡିଆ ଭାଷା, ସାହିତ୍ୟ, ସଂସ୍କୃତି ଓ ପରମ୍ପରାର ଉନ୍ନତି ଓ ପ୍ରଚାର ପ୍ରସାର କ୍ଷେତ୍ରକୁ ଉଲ୍ଲେଖନୀୟ ଅବଦାନ ପାଇଁ ଓଡିଆ ନବବର୍ଷପାଳନ ଅବସରରେ ରାଜ୍ୟର ଅଗ୍ରଣୀ ସାମାଜିକ ତଥା ସାଂସ୍କୃତିକ ଅନୁଷ୍ଠାନ ନୀଳାଦ୍ରୀ ବିହାର ଯୁବ ଓ ସାସ୍କୃତିକ ସଂଘର ସଭାପତି ଡଃ ପ୍ରକାଶ ଚନ୍ଦ୍ର ପାଣିଗ୍ରାହୀଙ୍କୁ “ଓଡିଆ ସଂସ୍କୃତି ପୁରୁଷ” ସମ୍ମାନରେ ସମ୍ମାନିତ କରାଯାଇଛି । ଏହି ଉପଲକ୍ଷେ ଓଡିଶା ନାଗରିକ ମହାମଞ୍ଚ ତଥା ଓଡିଆ ସଂସ୍କୃତି ଓ ପରମ୍ପରାର ଜାଗ୍ରତ ପ୍ରହରୀ ନମାମି ମନ୍ଦାକିନୀ ଅନୁଷ୍ଠାନ ତରଫରୁ ରବିନ୍ଦ୍ର ମଣ୍ଡପ ଠାରେ ଆୟୋଜିତ ଏକ ବର୍ଣ୍ଣାଢ୍ୟ ଉତ୍ସବରେ ଶତାୟୁ ସ୍ୱାଧୀନତା ସଂଗ୍ରାମୀ ଶ୍ରୀ ହଟ୍ଟନାଥ ମଙ୍ଗରାଜ, ପୁର୍ବତନ ମନ୍ତ୍ରୀ ଡଃ ଦାମଦୋର ରାଉତ, ଶ୍ରୀ ବିଜୟ ମହାପାତ୍ର, ବରିଷ୍ଠ ବିଧାୟକ ଶ୍ରୀ ପ୍ରଫୁଲ୍ଲ ସାମଲ, ସାରସ୍ୱତ ସାଧକ ଜିତେଦ୍ର ନାରାୟଣ ଦାସ, ଲୋକସଭା ଆୟୋଗ ସଦସ୍ୟ ସାହିତ୍ୟିକ ନିରଞ୍ଜନ ସାହୁ, ପ୍ରଫେସର କୈଳାଶ ଚନ୍ଦ୍ର ଟିକାୟତ୍‌, ବରିଷ୍ଠ ପ୍ରଜ୍ଞାଚାର୍ଯ୍ୟ ଆର୍ଯ୍ୟ କୁମାର ଜ୍ଞାନେନ୍ଦ୍ର, ବିଶିଷ୍ଟ ସ୍ତମ୍ଭକାର ତଥା ଶିଶୁ ସାହିତ୍ୟିକ ଦାସ ବେନୁହୁର ପ୍ରମୁଖଙ୍କ ସଦୟ ଉପସ୍ଥିତିରେ ଡଃ ପ୍ରକାଶଙ୍କୁ ଉପୋଢୌକନ, ସ୍ମୃତିଫଳକ, ମାନପତ୍ର ଓ ପୁଷ୍ପଗୁଚ୍ଛ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା । ପ୍ରକାଶ ଥାଉକି, ଯୁବଗୋଷ୍ଠୀଙ୍କୁ ଏକାଠି କରିବା ତଥା ସେମାନଙ୍କୁ କୁସଙ୍ଗ ଓ ଅନ୍ୟାନ୍ୟ ଅହିତକର ସାମାଜିକ କାର୍ଯ୍ୟକଳାପରୁ ଦୂରେଇ ରଖି ଗଠନ ମୂଳକ କାର୍ଯ୍ୟକ୍ରମରେ ନିୟୋଜିତ କରିବା ଲକ୍ଷ୍ୟରେ ୧୯୯୪ ମସିହାରେ ଏହି ଅନୁଷ୍ଠାନ ପ୍ରତିଷ୍ଠା କରି ସାସ୍କୃତିକ ଜାଗରଣ ଓ ସେବାକାର୍ଯ୍ୟ କରିବା ସହ ରାଜ୍ୟର ବିଭିନ୍ନ ପ୍ରାନ୍ତରେ  ସାମାଜିକ ତଥା ସାଂସ୍କୃତିକ ଅନୁଷ୍ଠାନ ଗଠନ ତଥା କାର୍ଯ୍ୟକ୍ରମକୁ ଉତ୍ସାହ ପ୍ରଦାନ କରି ଓଡିଆ ଭାଷା, ସାହିତ୍ୟ, ସଂସ୍କୃତି ଓ ପରମ୍ପରାର ଉନ୍ନତି କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ଦେଇ ଅସୁଛନ୍ତି । ଦୀର୍ଘ ୨୭ ବର୍ଷରୁ ଉର୍ଦ୍ଧ୍ୱକାଳ ଧରି ନିରବଚ୍ଛିନ୍ନ ଭାବେ ଦୁଇଟି ଅହୋରାତ୍ର ସାମାଜିକ ନାଟକ ପରିବେଷଣ କରି ଏକ ନିଆରା ପରମ୍ପରା ସୃଷ୍ଟି କରିପାରିଛନ୍ତି । ଡଃ ପ୍ରକାଶ ଡି.ଏ.ଭି ଅନୁଷ୍ଠାନ ସହ ମଧ୍ୟ ସେହି ସମୟରୁ ଜଡିତ ରହି ଡି.ଏ.ଭି ଚନ୍ଦ୍ରଶେଖରପୁର ଠାରେ ୨୩ ବର୍ଷ କାର୍ଯ୍ୟକରି ସମ୍ପ୍ରତି ଡି.ଏ.ଭି କଳିଙ୍ଗ ନଗରଠାରେ ବରିଷ୍ଠ ଶିକ୍ଷକ ଭାବେ କାର୍ଯ୍ୟରତ ଅଛନ୍ତି । ସମ୍ବର୍ଦ୍ଧନାର ଉତ୍ତରରେ ଡଃ ପ୍ରକାଶ ଭାଷା, ସାହିତ୍ୟ, ସଂସ୍କୃତି ଓ ପରମ୍ପରା ବଞ୍ଚିରହିଲେ ଜାତିର ଉନ୍ନତିରେ ସହାୟକ ହୋଇପାରିବ ବୋଲି ମତବ୍ୟକ୍ତ କରିବା ସହ ଏହାର ଶ୍ରେୟ ଅନୁଷ୍ଠାନର ସମସ୍ତ ସଦସ୍ୟଙ୍କୁ ପ୍ରଦାନ କରିବା ସହ ଏତେ ଦୀର୍ଘ ସମୟ ଧରି ସାଙ୍ଗରେ ରହିଥିବାରୁ ଧନ୍ୟବାଦ ଦେଇଥିଲେ । ଏହିପରି କାର୍ଯ୍ୟକ୍ରମ ଆଗକୁ ମଧ୍ୟ ଚାଲୁରହିବ ବୋଲି ମତବ୍ୟକ୍ତ କରିବା ସହ ସମସ୍ତଙ୍କ ସହଯୋଗ କାମନା କରିଥିଲେ । ଡଃ ପ୍ରକାଶ ତଥା ଅନୁଷ୍ଠାନର ଏହି ସଫଳତା ଓ କାର୍ଯ୍ୟକ୍ରମ ପାଇଁ ସ୍ଥାନୀୟ ବୁଦ୍ଧିଜୀବି ମହଲରେ ପ୍ରଶଂସା କରାଯାଇଛି ।