16-Mar-2022

 ,ନୂଆଦିଲ୍ଲୀ: ଆସନ୍ତା ୨୫ ଜୁଲାଇରେ ରାଷ୍ଟ୍ରପତି ରାମନାଥ କୋବିନ୍ଦଙ୍କ କାର୍ଯ୍ୟକାଳ ସରୁଛି । ଏହା ପୂର୍ବରୁ କିଏ ଦେଶର ପରବର୍ତ୍ତୀ ରାଷ୍ଟ୍ରପତି ହେବେ ସେନେଇ ଚର୍ଚ୍ଚା ଆରମ୍ଭ ହୋଇଗଲାଣି । ଉତ୍ତର ପ୍ରଦେଶ ସମେତ ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ପରେ ଦେଶର ପରବର୍ତ୍ତୀ ରାଷ୍ଟ୍ରପତି ପଦବୀକୁ ନେଇ ଚର୍ଚ୍ଚା ଘନେଇବାରେ ଲଗିଛି । ବର୍ତ୍ତମାନର ନିର୍ବାଚନ ଫଳାଫଳ ମଧ୍ୟ ରାଜ୍ୟସଭାରେ ଶାସକ ଭାରତୀୟ ଜନତା ପାର୍ଟି (BJP)ର ସ୍ଥିତିକୁ ମଜବୁତ କରିଛି। ସଂଖ୍ୟା ଦୃଷ୍ଟିରୁ ଚଳିତବର୍ଷ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ​​ମଧ୍ୟ ଦଳର ସ୍ଥିତି ସୁଦୃଢ ରହିଛି। ଏହାରି ମଧ୍ୟରେ ପରବର୍ତ୍ତୀ ରାଷ୍ଟ୍ରପତି ପାଇଁ ଜଣେ, ଦୁଇ ଜଣଙ୍କର ନାମକୁ ନେଇ ବିଜେପିରେ ଚର୍ଚ୍ଚା ଚାଲିଛି। ନିର୍ବାଚନ କଲେଜ (electoral college) ମାଧ୍ୟମରେ ଭାରତର ରାଷ୍ଟ୍ରପତି ନିର୍ବାଚିତ ହୁଅନ୍ତି। ଏହି ନିର୍ବାଚନ କଲେଜରେ ଲୋକସଭା ଏବଂ ରାଜ୍ୟସଭାର ୭୭୬ ସାଂସଦ ଏବଂ ବିଭିନ୍ନ ରାଜ୍ୟରୁ ମୋଟ ୪୧୨୦ ଜଣ ବିଧାୟକ ରହିଛନ୍ତି। ମୋଟ ଭୋଟର କଲେଜର କ୍ଷମତା ୧୦,୯୮,୯୦୩ ଭୋଟ ଏବଂ ବିଜେପି ନିକଟରେ ମୋଟ କ୍ଷମତାର ୫୦ ପ୍ରତିଶତରୁ ଅଧିକ ଭୋଟ ରହିଛି। ପ୍ରତ୍ୟେକ ସାଂସଦଙ୍କ ଭୋଟର ୭୦୮ କିନ୍ତୁ ବିଧାୟକଙ୍କ କ୍ଷେତ୍ରରେ ଏହା ରାଜ୍ୟ ଅନୁଯାୟୀ ସ୍ଥିର ହୋଇଥାଏ। ଉତ୍ତର ପ୍ରଦେଶରେ ପ୍ରତ୍ୟେକ ବିଧାୟକଙ୍କ ଭୋଟ କ୍ଷମତା ୨୦୮। ଦେଶର ବୃହତ୍ତମ ରାଜ୍ୟ ୟୁପି ସମେତ ଚାରୋଟି ରାଜ୍ୟରେ ବିଜେପି କ୍ଷମତା ହାସଲ କରିଛି। ୟୁପିରେ ବିଜେପିର ରେକର୍ଡ ବିଜୟ ମାର୍ଚ୍ଚ ୩୧ରେ ହେବାକୁ ଥିବା ରାଜ୍ୟସଭା ନିର୍ବାଚନ ଏବଂ ଜୁଲାଇରେ ସମ୍ଭାବ୍ୟ ରାଷ୍ଟ୍ରପତି ନିର୍ବାଚନ ଉପରେ ପ୍ରଭାବ ପକାଇବ। ୟୁପିରେ ବିଜେପି ଏବଂ ଏହାର ସହଯୋଗୀ ଦଳ ୨୭୩ଟି ଆସନ ଜିତିଛନ୍ତି। ତେଣୁ ଆସନ୍ତା ରାଷ୍ଟ୍ରପତି ନିର୍ବାଚନରେ ​​ବିଜେପି ପ୍ରାର୍ଥୀ ଜିତିବାରେ କୌଣସି ଅସୁବିଧା ହେବ ନାହିଁ। ଉପରାଷ୍ଟ୍ରପତି ଏମ ଭେଙ୍କୟା ନାଇଡୁଙ୍କ ନାମ ଏହି ପଦବୀ ପାଇଁ ଚର୍ଚ୍ଚାରେ ରହିଛି । ବର୍ତ୍ତମାନର ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଦ୍ୱିତୀୟ କାର୍ଯ୍ୟକାଳ ପ୍ରଦାନ କରାଯିବା ଉଚିତ କି ନାହିଁ ତାହା ଉପରେ ବିଜେପି ନେତୃତ୍ୱ ନିଷ୍ପତ୍ତି ନେଇ ନାହାଁନ୍ତି। ଏହି ପ୍ରସଙ୍ଗରେ ଗଭୀର ଭାବେ ବିଚାରର ଆବଶ୍ୟକତା ରହିଛି। ରାଷ୍ଟ୍ରପତି ଭବନ ପାଇଁ କିଏ ସବୁଠାରୁ ଉପଯୁକ୍ତ ବ୍ୟକ୍ତି ହେବେ ସେ ନେଇ ଶେଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଷ୍ପତ୍ତି ନେବେ ବୋଲି ସରକାରୀ ସୂତ୍ର ସୂଚନା ମିଳଛି  
ସବୁ ଡାଳ ପଛରେ ଗୋଟେ ମୂଳ ଅଛି, ତେଣୁ ଡାଳ ଯେତେ ବଡ଼ ହେଲେ ବି ମୂଳକୁ ଭୁଲିନଯିବା ଉଚିତ। ମଣିଷ ଯେତେ ସଫଳ ହେଲେବି ମାଧ୍ୟମଟିକୁ ମନେରଖିବା ଉଚିତ । କାରଣ ପିତା, ମାତା ହୁଅନ୍ତୁ କି ଗୁରୁ, ସେମାନଙ୍କ ଋଣ ଶୁଝିହୁଏନି । ଭାରତୀୟ ଜନତା ପାର୍ଟିର ମୂଳନେତା ତଥା ପ୍ରତିଷ୍ଠାତା ଲାଲକୃଷ୍ଣ ଆଡଭାନୀ ଦେଶର ପରବର୍ତ୍ତୀ ରାଷ୍ଟ୍ରପତି ହେବାର ସମ୍ଭାବନା ଉଜ୍ଜ୍ବଳ ଦିଶୁଚି । ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁଋଣ ଶୁଝିବେ କି ନାହିଁ ତାହା ସମୟ କହିବ । ମୋଦି ବିଜେପିକୁ ଆସିବା ଗୁଜୁରାଟ ମୁଖ୍ୟମନ୍ତ୍ରୀ ହେବା ଓ ପରେ ଦେଶର ପ୍ରଧାନମନ୍ତ୍ରୀ ହେବା  ପର୍ଯ୍ୟନ୍ତ ପ୍ରଥମ ଶ୍ରେୟ ଆଡଭାନୀଙ୍କୁ ଯିବ । କାରଣ ଆଡଭାନୀ ତାଙ୍କୁ ଗୁଜୁରାଟ ଦଙ୍ଗା ପରେ ଆଗକୁ ଯିବାକୁ ଯଦି ସୁଯୋଗ ଦେଇନଥାନ୍ତେ ତେବେ ଆଜି ମୋଦି ଏହି ସ୍ଥାନରେ ପହଞ୍ଚି ପାରିନଥାନ୍ତେ । ପୂର୍ବଥର ରାଷ୍ଟ୍ରପତି ନହେବାର ଅବଶୋଷ ଆଡଭାନୀ ନକହିଲେ ବି ତାଙ୍କର ଅଛି । ଯଦି ଆଡଭାନୀ ରାଷ୍ଟ୍ରପତି ହେଲେ, ତାହେଲେ ଦେଶ ଜଣେ ପ୍ରବୀଣ ରାଷ୍ଟ୍ରନୀତିଜ୍ଞଙ୍କୁ ଏହି ପଦରେ ଦେଖିବାକୁ ପାଇବ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ଗୁରୁଦକ୍ଷିଣା ଦେଇପାରିବେ।