25-Jan-2022

ସମ୍ବଲପୁର,(ସଂଜୀବ ପାଣିଗ୍ରାହୀଙ୍କ ରିପୋର୍ଟ): ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଆଜି ପ୍ରାର୍ଥିପତ୍ର ପ୍ରତ୍ୟାହାରର ଅନ୍ତିମ ଦିବସ ରହିଥିଲା I ସମ୍ବଲପୁର ଜ଼ିଲ୍ଲା ଯୁଯୋମୁରା ବ୍ଲକ ଜ଼ିଲ୍ଲାପରିଷଦ ଜୋନ-୧ ରୁ ବିଜେପିର ବିଦ୍ରୋହୀ ପ୍ରାର୍ଥିନୀ ଅମୁଲ୍ୟ ସାହୁ ସ୍ୱାଧୀନ ଭାବରେ ପ୍ରାର୍ଥିପତ୍ର ଦାଖଲ କରିଥିଲେ I ତେବେ ଆଜି ବିଜେପିର ବିଦ୍ରୋହୀ ପ୍ରାର୍ଥିନୀ ଅମୁଲ୍ୟ ସାହୁ ତାଙ୍କର ପ୍ରାର୍ଥିପତ୍ର ପ୍ରତ୍ୟାହାର କରିନେଇଛନ୍ତି I ସ୍ୱାଧୀନ ପ୍ରାର୍ଥି ଭାବେ ନାମାଙ୍କନ ପତ୍ର ଦାଖଳ କରିଥିବା ଅମୁଲ୍ୟ ସାହୁ ଆଜି ସମ୍ବଲପୁର ସଦର ଉପ ଜ଼ିଲ୍ଲାପାଳ ତଥା ନିର୍ବାଚନ ଅଧିକାରୀ ସୂର୍ଯ୍ୟବଂଶୀ ମୟୁର ବିକାଶଙ୍କ ଠାରେ ଆସି ତାଙ୍କର ପ୍ରାର୍ଥିପତ୍ର ପ୍ରତ୍ୟାହାର କରିନେଇଛନ୍ତି I ଅନ୍ୟପକ୍ଷରେ ଏନେଇ ଆନୁଷ୍ଠାନିକ ଘୋଷଣା ପରେ ଏହି ଆସନ ପାଇଁ ଏବେ ୩ ଜଣ ପ୍ରାର୍ଥି ନିର୍ବାଚନ ମଇଦାନରେ ରହିଛନ୍ତି I ଏହି ଆସନରେ ବିଜେଡ଼ି,ବିଜେପି ଓ କଂଗ୍ରେସ ପ୍ରାର୍ଥିନୀ ମଧ୍ୟରେ ତ୍ରିମୁଖୀ ପ୍ରତିଦନ୍ଦିତା ହେବା ଏକପ୍ରକାର ସ୍ପଷ୍ଟ ହୋଇଛି I ଏହି ଜ଼ିଲ୍ଲାପରିଷଦ ଆସନଟି ସାଧାରଣ ବର୍ଗ (ଅଣସଂରକ୍ଷିତ)ଙ୍କ ପାଇଁ ଉଦ୍ଦିଷ୍ଟ ରହିଛି I ଏହି ଆସନ ପାଇଁ ବିଜେଡିରୁ କବିତା ସାହୁ, କଂଗ୍ରେସରୁ ସସ୍ମିତା ଦେହୁରୀ, ବିଜେପିରୁ ଟିକି ପ୍ରଧାନ ଏବଂ ସ୍ୱାଧୀନ ପ୍ରାର୍ଥିଭାବେ ବିଜେପି ବିଦ୍ରୋହୀ ପ୍ରାର୍ଥି ଅମୁଲ୍ୟ ସାହୁ ପ୍ରାର୍ଥିପତ୍ର ଦାଖଲ କରିଥିଲେ I ସବୁ ପ୍ରାର୍ଥିପତ୍ର କାଏମ ମଧ୍ୟ ରହିଥିଲା I ସମ୍ବଲପୁର ବିଧାୟକ ଜୟନାରାୟଣ ମିଶ୍ରଙ୍କ ରାଜନୈତିକ ଗୋଟିଚାଳନା ଯୋଗୁଁ ବିଜେପି ଵିଦ୍ରୋହୀ ସ୍ୱାଧୀନ ପ୍ରାର୍ଥିନୀ ଅମୁଲ୍ୟ ସାହୁ ପ୍ରାର୍ଥିପତ୍ର ପ୍ରତ୍ୟାହାର କରିଥିବା ଆଲୋଚନା ହେଉଛି I