16-Oct-2026

ରିପୋର୍ଟ: ମଳୟ ମିଶ୍ର 

ବଲାଙ୍ଗୀର:  ବଲାଙ୍ଗୀରର କେତୋଟି ବହୁଚର୍ଚ୍ଚିତ ଅପରାଧ ମାମଲାର ତଦନ୍ତ ଅଧାପନ୍ତରିଆ ରହିଛି ।  ଏଥିଯୋଗୁଁ  ଜନସାଧାରଣଙ୍କ ପକ୍ଷରୁ ଏଥିରେ ତଦନ୍ତକାରୀ ପୁଲିସ ଅହେତୁକ କାଳକ୍ଷେପଣ କରୁଥିବାର ଅଭିଯୋଗ ପ୍ରକାଶ ପାଇଛି ।  ଏଥିମଧ୍ୟରୁ ଗତ ଅଗଷ୍ଟ ୭ ତାରିଖ ରାତିରେ ଘଟିଥିବା ପୁଇଁନ୍ତଳା ଥାନାନ୍ତର୍ଗତ ଖମାରମୁଣ୍ଡା ଗ୍ରାମର ଜଣେ ଅବିବାହିତା ଯୁବତୀଙ୍କୁ ଜମିବାଡି ହସ୍ତାନ୍ତର ନ କରୁଥିବାରୁ ଘରେ ପଶି ଶୋଇଥିବା ଅବସ୍ଥାରେ ନିର୍ମମ ହତ୍ୟାକାଣ୍ଡ ମାମଲାରେ ଯୁବତୀର ଭାଇମାନଙ୍କମଧ୍ୟରୁ ୩ ଜଣଙ୍କୁ ଥାନାରେ ପଚରାଉଚୁରା ନିମନ୍ତେ ଦୁଇ/ ତିନିଦିନ ଅଟକ ରଖିବାପରେ , ଜଣକୁ ଗିରଫ କରି କୋର୍ଟ ଚାଲାଣ ପରେ ତାଙ୍କ ବୟାନ ଅନୁଯାୟୀ ମାରିଥିବା ଗ୍ରାମର ଫେରାର୍ ଅଭିଯୁକ୍ତ ୨ ଜଣ ଦଳିତ ଜାତିର ଜମିଦଲାଲଙ୍କୁ ଏଯାବତ୍ ଦୁଇମାସ ହେଲା ପୁଲିସ ଧରି ନପାରିବା ଓ ଘଟଣାରେ ସମ୍ପୃକ୍ତ ଅନ୍ୟମାନଙ୍କୁ ତଦନ୍ତର ପରିସରଭୁକ୍ତ କରୁ ନଥିବା ,ଅଗଷ୍ଟ ୧୪ ତାରିଖରେ ସହରର ଜଣେ ବିଶିଷ୍ଟ ହୋଟେଲ ତଥା ଜମିଜମା ଓ ଅନ୍ୟାନ୍ୟ କାରବାରର ଯୁବବ୍ୟବସାୟୀ ଗୁଣ୍ଡା ସାହୁଙ୍କୁ ଦିନ ଦ୍ବିପ୍ରହରରେ ପୁଇଁନ୍ତଳା ଥାନାନ୍ତର୍ଗତ ରଣ୍ଡାଛକରୁ ଭୁବନେଶ୍ବରକୁ ଚାରିଚକିଆ ଗାଡିରେ ବନ୍ଧୁକମୁନରେ ଅପହରଣ ପରେ ତାଙ୍କୁ ଖଣ୍ଡଗିରି ଥାନାରୁ ଉଦ୍ଧାର ପରେ ମୁଖ୍ୟଅଭିଯୁକ୍ତ ସହିତ ତାର ପୁଲିସ ଚାକିରୀ କରୁଥିବା ଭଉଣୀ , ଜଣେ ସାମ୍ବାଦିକ ଓ ଜଣେ ସ୍ଥାନୀୟ ଜମିଦଲାଲଙ୍କୁ ଗିରଫ କରି କୋର୍ଟଚାଲାଣ ସତ୍ତ୍ବେ ଅଦ୍ୟାବଧି ଏହାର ଉଦ୍ଦେଶ୍ୟ ବା କାରଣ ପୁଲିସ ସ୍ପଷ୍ଟ କରୁ ନଥିବା , ଗତ ମାସ ୨୦ ତାରିଖରେ ବଲାଙ୍ଗୀର ଲକ୍ଷ୍ମୀଯୋର ଥାନାନ୍ତର୍ଗତ ବଲାଙ୍ଗୀର ବନବିଭାଗର ବଲାଙ୍ଗୀର ରେଞ୍ଜ ର କାର୍ଯ୍ୟରତ ବରିଷ୍ଠ ରାଜ୍ୟ ଓ ଜିଲ୍ଲାସ୍ତରରେ ପୁରସ୍କୃତ ଫରେଷ୍ଟର ବ୍ୟାସଦେବ ସାହୁଙ୍କର ସରକାରୀ କ୍ବାର୍ଟରରେ ବେକରେ ରଶି ଦିଆଯାଇ କଥିତ ଆତ୍ମହତ୍ୟା ଅନ୍ତରାଳରେ ପରିବାର ପକ୍ଷରୁ ହୋଇଥିବା ବିଭାଗୀୟ ନିର୍ଯାତନା ସହ ଉପରିସ୍ଥ ଅଧିକାରୀଙ୍କ ଦ୍ବାରା ସେ କରିଥିବା ଲକ୍ଷାଧିକ ଟଙ୍କାର ସରକାରୀ କାମର ବିଲ୍ ପାଇବାରେ ଲକ୍ଷ ଲକ୍ଷ ଟଙ୍କାର ପିସି ମଗାଯାଇଥିବାର ଅଭିଯୋଗ  ଇତ୍ୟାଦିର ତଦନ୍ତର ଖୁଲାସା କରାଯାଉନାହିଁ  !  

ଉଲ୍ଲେଖଯୋଗ୍ଯ ଯେ , ଇତିମଧ୍ୟରେ ନବଅବସ୍ଥାପିତ  ସମ୍ବଲପୁର ଉତ୍ତରାଞ୍ଚଳ ଡିଆଇଜି ଚରଣ ସିଂ ମୀନା ଆସି ଜିଲ୍ଲାର ଉପରୋକ୍ତ ଅପରାଧମାମଲାଗୁଡିକର ତତ୍ତ୍ବାବଧାନ କରିଯାଇଥିଲେ ହେଁ , ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଅଗ୍ରଗତି କରିପାରୁ ନାହିଁ  ! 

ଗୀତାଞ୍ଜଳି ଷଡଙ୍ଗୀ ହତ୍ୟାକାଣ୍ଡ ଘଟଣାର ପଛରେ କୋଟି କୋଟି ଟଙ୍କାର ପୈତୃକ ଜମିବିକ୍ରିର ଝାମେଲା ମୁଖ୍ୟ ବୋଲି ଜଣାପଡିଛି । ମୃତାମହିଳା ଜଣକ ତାଙ୍କର ଅଂଶଦେବାକୁ ରାଜିହେଉ ନ ଥିବାରୁ ପ୍ରାୟ ତିନିବର୍ଷକାଳ ଗାଁ' ଉକ୍ତ ଅଭିଯୁକ୍ତ ଜମିଦଲାଲଙ୍କ ମାର୍ଫତ୍ ରେ ବଲାଙ୍ଗୀରର ଯେଉଁ କ୍ରେତାଙ୍କ ଠାରୁ ପ୍ରାୟ ଏକକୋଟି ଟଙ୍କାର ଅଗ୍ରୀମ ନେଇଥିଲେ , ସେମାନଙ୍କ ସହ ଅନ୍ୟ ଅଂଶୀଦାର ଭାଇମାନଙ୍କର ଏହି ହତ୍ୟାକାଣ୍ଡରେ କୌଣସିପ୍ରକାର ସମ୍ପୃକ୍ତି ରହିଛି କି  , ପୁଲିସ ଏ କ୍ଷେତ୍ରରେ ନୀରବତା ଅବଲମ୍ବନ କରୁଥିବା ସନ୍ଦେହ ସୃଷ୍ଟି କରୁଛି ।  ଦ୍ବିତୀୟରେ ଗୁଣ୍ଡା ସାହୁ ଅପହରଣ କାଣ୍ଡର ପ୍ରକୃତ ମୋଟିଭ୍ କ'ଣ ଥିଲା  ? ମୁଖ୍ୟ ଅଭିଯୁକ୍ତର ବୟାନ ଅନୁଯାୟୀ , ବିରଳ ହନୁମାନ ମୁଦ୍ରା କାରବାର ପାଇଁ ୨ କୋଟି ୭୦ ଲକ୍ଷ ଟଙ୍କାର ଅଗ୍ରୀମ ନା ଏହାପଛରେ ଅନ୍ୟକୌଣସି ଅବୈଧ କାରବାର , ଇତିମଧ୍ୟରେ ପୁଲିସ ମୁଖ୍ୟଅଭିଯୁକ୍ତ କ୍ଷିତୀଶ ଚନ୍ଦ୍ର ସାହୁକୁ ଜେଲ୍ ହାଜତରୁ ଦୁଇଦିନକାଳ ରିମାଣ୍ଡରେ  ଆଣି ଜେରା କରିଥିବା ସତ୍ତ୍ବେ ଅଦ୍ୟାବଧି କ'ଣ ସୂତ୍ର ପାଇଲା , ଲୋକେ ଜାଣିପାରୁ ନ ଥିବାରୁ  ଓ ଅଭିଯୁକ୍ତମାନେ କେବଳ ମୁଣ୍ଡଜାମିନ ରଖି ଅପହରଣ କରିଥିବା କାହାଣୀକୁ ବିଶ୍ବାସ କରୁନଥିବା ପ୍ରକାଶ  ।  ସେହିପରି ତୃତୀୟ ମାମଲାରେ ଫରେଷ୍ଟରଙ୍କ ଆତ୍ମହତ୍ୟାର କାରଣକୁ ଡି ଏଫ ଓ  , ଏସି ଏଫ୍ ଓ ରେଞ୍ଜରଙ୍କ ଆଡକୁ ଅଙ୍ଗୁଳିନିର୍ଦ୍ଦେଶ ହେଉଥିବା ବେଳେ , ମୃତ ଫରେଷ୍ଟରଙ୍କ ପୁଅଙ୍କୁ ଚାକିରୀ ଲୋଭ ଦେଇ ଓ ପୁଲିସକୁ ବଡଧରଣର ରାଜନୈତିକ ଚାପ ବା ଅନ୍ୟକୌଣସି ବଳରେ ପ୍ରଭାବିତ କରି ବିଭାଗୀୟ ବଡ ଆର୍ଥିକ ଅନିୟମିତତାକୁ ଚପାଇ ଦିଆଯିବାର ଷଡଯନ୍ତ୍ର ସଫଳ ହୋଇଥିବା ଲୋକଙ୍କ ଭିତରେ ଚର୍ଚ୍ଚାର ବିଷୟ ପାଲଟିଛି । 

ଜିଲ୍ଲାରେ ଆହୁରି କେତେକ ମାମଲାରେ ମଧ୍ୟ ଅନୁରୂପ ଅଧାପନ୍ତରିଆ ତଦନ୍ତର ଅଭିଯୋଗ ଉଠିଛି । ଏଥିମଧ୍ୟରେ ଦାଦନଚାଲାଣ ଧରପଗଡରେ ସର୍ଦ୍ଦାରଙ୍କୁ ଜାଣିଶୁଣି ଛାଡିଦିଆଯାଉଥିବା , ପାଟଣାଗଡ ଗଞ୍ଜେଇ ଚୋରାଚାଲାଣର ଚାଲାଣକାରୀଙ୍କୁ ଖସାଇ ଦିଆଯିବା ଓ ସଇଁନ୍ତଳାର ଜନୈକ ଠିକାଦାରଙ୍କ ଦ୍ବାରା ବନ୍ଧୁକ ଦେଖାଇ ଠିକାଦାରଙ୍କୁ ଧମକ ଅଭିଯୋଗ ଇତ୍ୟାଦି ଅନ୍ତର୍ଭୁକ୍ତ  ।  ପ୍ରକାଶଯୋଗ୍ୟ ଯେ , ବଲାଙ୍ଗୀର ଯୁବ ଆଇପିଏସ୍ ଏସ୍ ପି ଅଭିଳାଷ ଜି ଜଣେ ସୁଦକ୍ଷ ସଚ୍ଚୋଟ ଅଧିକାରୀ ହୋଇଥିଲେ ହେଁ , ଉପଖଣ୍ଡ ଓ ଥାନା , ଫାଣ୍ଡିସ୍ତରରେ ଅନେକ ତ୍ରୁଟିବିଚ୍ୟୁତି ରହୁଥିବା ଓ ପୁଲିସ୍ କେତେକକ୍ଷେତ୍ରରେ ରାଜନୈତିକ ଚାପର ସମ୍ମୁଖୀନ ହେଉଥିବା ଜନସାଧାରଣଙ୍କ ଆଲୋଚନାରୁ ପ୍ରକାଶ ।  ଟିଟିଲାଗଡ, କଣ୍ଟାବାଞ୍ଜି ,ପାଟଣାଗଡ ଓ ଖପ୍ରାଖୋଲ ଅଞ୍ଚଳର କେତେକ ମାମଲାରେ ଏହା ପରିଲକ୍ଷିତ  । ସରକାର ଏଥିପ୍ରତି ଦୃଷ୍ଟିପାତ କରନ୍ତୁ  !