13-Jun-2021

ସୋନପୁର(ମନୋରଞ୍ଜନ ତ୍ରିପାଠୀ) : ବିଶ୍ୱ ରକ୍ତଦାନ ଦିବସ ପ୍ରତିବର୍ଷ ଜୁନ ୧୪ ତାରିଖରେ ପାଳିତ ହୋଇ ଆସୁଛି l ୨୦୦୪ ମସିହାରୁ ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ଏହି ଦିନକୁ ରକ୍ତଦାନ ଦିବସ ରୁପେ ଘୋଷଣା କରାଯାଇଛି । ଏହାର ମୂଳ ଉଦ୍ଦେଶ୍ୟ ହେଉଛି ସୁରକ୍ଷିତ ରକ୍ତ ଦାନର ଆବଶ୍ୟକତା ଓ ଉପକାରିତା ବିଷୟରେ ସଚେତନତା ସହ ରକ୍ତ ଦାତା ଙ୍କୁ  ପ୍ରୋତ୍ସାହିତ ସୃଷ୍ଟି କରିବା । ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ବିଶ୍ୱ ସାର୍ବଜନିନ  ସ୍ୱାସ୍ଥ୍ୟ ରକ୍ଷା ଅଭିଯାନ ଅନ୍ତର୍ଗତ ଯେଉଁ ଆଠୋଟି କାର୍ଯ୍ୟକ୍ରମ ପାଳିତ ହେଉଅଛି, ତନ୍ମଧ୍ୟରୁ ବିଶ୍ୱ ରକ୍ତଦାନ ଦିବସ ସ୍ୱତନ୍ତ୍ର । ଅନ୍ୟ ସାତୋଟି ହେଲା .ବିଶ୍ୱ ମ୍ୟାଲେରିଆ ଦିବସ, ବିଶ୍ୱ ଟୀକାକରଣ ସପ୍ତାହ, ବିଶ୍ୱ ଯକ୍ଷ୍ମl ଦିବସ,ବିଶ୍ୱ ତମାଖୁ ଦିବସ,ବିଶ୍ୱ ହେପାଟାଇଟିସ ଦିବସ,ବିଶ୍ୱ ସ୍ୱାସ୍ଥ୍ୟ ଦିବସ ଓ ବିଶ୍ୱ ଏଡସ୍ ଦିବସ ର ମଧ୍ୟ ଅନେକ ଗୁରୁତ୍ୱ ରହି ଆସିଛି l
ଟ୍ରାନସ୍‌ଫ୍ୟୁଜନ ପ୍ରଣାଳୀରେ ରକ୍ତଦାନ ଦ୍ୱାରା ଜୀବନ ନାଶକାରୀ ଅନେକ ରୋଗରୁ ଲୋକଙ୍କୁ ରକ୍ଷା କରାଯାଇପାରୁଛି । ଅନେକ ପ୍ରକାର ଜଟିଳ ଅସ୍ତ୍ରୋପଚାର ନିମିତ୍ତ ରକ୍ତର ଆବଶ୍ୟକତା ରହିଛି  ଯାହାକି ଏହି ରକ୍ତ ଅଭାବରେ କୌଣସି  ଅସ୍ତ୍ରୋପଚାର ହୋଇପାରିବ ନାହିଁ । ପୁଣି କୌଣସି ଦୁର୍ଘଟଣା ଜନିତ ରକ୍ତସ୍ରାବ କିମ୍ବା ଶିଶୁ ପ୍ରସବ ସମୟରେ ଅତ୍ୟଧିକ ରକ୍ତସ୍ରାବ ଯୋଗୁଁ ରୋଗୀ ମୃତ୍ୟୁ ମୁଖରେ ପଡିବାର ସମ୍ଭାବନା ଥିବାରୁ ସେଭଳି ସ୍ଥଳରେ ରୋଗୀପାଇଁ ରକ୍ତ ନିତାନ୍ତ ଆବଶ୍ୟକ ହେଉଛି  l ତେବେ ସୁରକ୍ଷିତ ରକ୍ତ ସହିତ ଉପଯୁକ୍ତ ଗ୍ରୁପ ର ରକ୍ତ ନ ମିଳିଲେ ତାହା ପୁଣି ଜୀବନ ପ୍ରତି ବିପଦ ସୃଷ୍ଟି କରିଥାଏ । ମଣିଷ ଶରୀର ର ରକ୍ତର କୌଣସି ବିକଳ୍ପ ନ ଥିବାରୁ ରକ୍ତ ଦାନ ମାଧ୍ୟମରେ ଏହା ସଂଗ୍ରହ କରିବା ଜରୂରୀ ହୋଇପଡିଛି । ଏହି ଉଦ୍ଦେଶ୍ୟରେ ସବୁ ଜାଗାରେ  ନୂତନ ବ୍ଲଡ଼ ବ୍ୟାଙ୍କ ଗୁଡିକ ପ୍ରତିଷ୍ଠା କରାଯାଇ ରକ୍ତ ଦାନ ପାଇଁ ଲୋକଙ୍କୁ ଓ ରକ୍ତଦାତାଙ୍କୁ  ପ୍ରୋତ୍ସାହିତ  କରାଯାଉଛି । 

ସୁବର୍ଣ୍ଣପୁର ଜିଲ୍ଲା    ରେ କିନ୍ତୁ ଏବେ   ମଧ୍ୟ କିଛି ସମସ୍ୟା ରହିଛି  ଯାହା କି ଏ ପର୍ଯ୍ୟନ୍ତ ସମାଧାନ ହୋଇ ପାରି ନାହିଁ, ଯେପରି କି ସୁବର୍ଣ୍ଣପୁର ଜିଲ୍ଲାର ରକ୍ତ ସଂଗ୍ରହ କରିବା ସକାଶେ ଗୋଟାଏ  ବି ଭ୍ୟାନ୍,  ସ୍ବତନ୍ତ୍ର ଆଇସ ବକ୍ସ, ବିଭିନ୍ନ ଜରୁରୀ ଉପକରଣ ର ବ୍ୟବସ୍ଥା ନାହିଁ । ବୀରମହାରାଜପୁର ଉପଖଣ୍ଡ ଚିକିତ୍ସାଳୟରେ ଥିବା  ବ୍ଲଡ଼ ଷ୍ଟୋରେଜ ସେଣ୍ଟର  ଏ ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇ ପାରି ନାହିଁ ଓ ତା ଠାରୁ ଆହୁରି ଲଜ୍ଜା ଓ ଦୁଃଖର ବିଷୟ ଯେ  ସୁବର୍ଣ୍ଣପୁର ମୁଖ୍ୟ ଡାକ୍ତରଖାନାକୁ  ଅଧିକାଂଶ  ରୋଗୀ ବୌଦ୍ଧ ଜିଲ୍ଲା ରୁ ଆସୁଥିବା ସତ୍ବେ ମଧ୍ୟ    ସୁବର୍ଣ୍ଣପୁର ଜିଲ୍ଲାର ରକ୍ତ ଭଣ୍ଡାରକୁ ବୌଦ୍ଧ ଜିଲ୍ଲା ରେ ରକ୍ତ ସଂଗ୍ରହ କରିବାକୁ ପ୍ରଶାସନ ପକ୍ଷରୁ ଅନୁମତି ମିଳୁନାହିଁ । ତଥାପି ମଧ୍ୟ କରୋନା ମହାମାରୀ  ଭଳି ମହା ସଙ୍କଟ ବେଳେ ରାଜ୍ୟ ରକ୍ତ ଦାତା ସଂଘ  ସୋନପୁର ଶାଖା,  ବିଭିନ୍ନ  ସ୍ବେଛାସେବୀ ସଂଗଠନ, ସ୍ଵେଚ୍ଛାକୃତ ଯୁବ  ରକ୍ତଦାତା  ଓ  ବ୍ଲଡ଼ ବ୍ୟାଙ୍କ କର୍ମଚାରୀ ଙ୍କ ଦୃଢ଼ ଇଚ୍ଛା ଶକ୍ତି, ଉତ୍ସାହ,  ଉତ୍ସର୍ଗୀକୃତ ସେବା, ଅକ୍ଲାନ୍ତ ପରିଶ୍ରମ ଯୋଗୁଁ ଗତ ବର୍ଷ ୨୦୨୦  ରେ ସୁବର୍ଣ୍ଣପୁର ଜିଲ୍ଲାର ରକ୍ତ ଭଣ୍ଡାର ଜ଼ିଲ୍ଲା ର ବିଭିନ୍ନ ଅଂଚଳ ରେ  ୧୦୦ ଗୋଟି  ରକ୍ତଦାନ ଶିବିର ଆୟୋଜନ  କରି ୩୦୦୦ରୁ ଉର୍ଦ୍ଧ୍ୱ ୟୁନିଟ ରକ୍ତ ସଂଗ୍ରହ କରି  ଏକ ମାଇଲ ଖୁଣ୍ଟ କୁ ଅତିକ୍ରାନ୍ତ କରିଛି ଏବଂ ଦୀର୍ଘ ୧୮ ବର୍ଷ ର ରେକର୍ଡ ଭାଙ୍ଗିଛି l ଯାହାକି ଏକ  ସ୍ୱାଗତ ଯୋଗ୍ୟ ପଦକ୍ଷେପ ଅଟେ l ବର୍ତମାନ  ଅନେକ ଲୋକଙ୍କ ରକ୍ତ ହୀନତା ଓ  ରକ୍ତ ର ଅଭାବ ଏକ ଚ୍ୟାଲେଞ୍ଜ ସୃଷ୍ଟି କରିଥିବା ବେଳେ ଆଗାମୀ ଦିନରେ ଏହି  ରକ୍ତ ଦାନ କାର୍ଯ୍ୟକ୍ରମକୁ ଏକ ସ୍ବତନ୍ତ୍ର ଆନ୍ଦୋଳନ ଭାବରେ କାର୍ଯ୍ୟ କରି ଏ ଦିଗରେ ରୋଗୀ ଙ୍କ ସମ୍ପର୍କୀୟ , ଓ ସାଧାରଣ  ଲୋକଙ୍କ  ମଧ୍ୟରେ ସଚେତନତା ଓ ଉତ୍ସାହ  ବଢାଇବା ଉଦ୍ଦେଶ୍ୟରେ ଆହୁରି  ଅନେକ କାର୍ଯ୍ୟକ୍ରମ ହାତକୁ ନିଆଯିବ ଓ ଏଥି ପାଇଁ ସମସ୍ତଙ୍କ ସହଯୋଗ ଲୋଡ଼ା  ବୋଲି ରାଜ୍ୟ ରକ୍ତଦାତା ସଂଘ ଜ଼ିଲ୍ଲା କାର୍ଯ୍ୟକର୍ତ୍ତା  ସୂଚନା ଦେଇଛନ୍ତି ।