02-Nov-2026

ବଲାଙ୍ଗୀର(ପ୍ରେରଣା ଖବର): କ୍ରୀଡ଼ା କ୍ଷେତ୍ରରେ ବଲାଙ୍ଗୀର ଜିଲ୍ଲାର ଏକ ସମୃଦ୍ଧ ଐତିହ୍ୟ ଓ ପରମ୍ପରା ରହିଛି। ଜିଲ୍ଲାର ଅନେକ ପ୍ରତିଭାବାନ ଖେଳାଳି ନିଜର ଦକ୍ଷତା ବଳରେ ରାଜ୍ୟ ଓ ଜାତୀୟସ୍ତରରେ ସଫଳତା ହାସଲ କରି ଜିଲ୍ଲା ପାଇଁ ଗୌରବ ଆଣୁଛନ୍ତି। ତେବେ ଖେଳାଳିଙ୍କ ପ୍ରତିଭା ଓ ଆଗ୍ରହ ଅନୁଯାୟୀ ଆବଶ୍ୟକ କ୍ରୀଡ଼ା ଭିତ୍ତିଭୂମିର ଅଭାବ ରହିଥିବାରୁ ବଲାଙ୍ଗୀର ସହର ମଧ୍ୟରେ ଏକ ଅତ୍ୟାଧୁନିକ ବହୁମୁଖୀ ଇଣ୍ଡୋର ଷ୍ଟାଡିୟମ୍ ନିର୍ମାଣ ପାଇଁ ଦାବି ଉଠିଛି।

ଏ ସମ୍ପର୍କରେ ମଧୁସୂଦନ କ୍ରୀଡ଼ା ଏବଂ ସାଂସ୍କୃତିକ ସଂଘ, ବଲାଙ୍ଗୀର ସମେତ ବିଭିନ୍ନ କ୍ରୀଡ଼ା ସଂଘ ଓ କ୍ରୀଡ଼ାପ୍ରେମୀଙ୍କ ପକ୍ଷରୁ ଜିଲ୍ଲାପାଳଙ୍କ ନିକଟରେ ଦାବି ଉପସ୍ଥାପନ କରାଯାଇଛି।

ସୂଚନାଯୋଗ୍ୟ ଯେ, ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ବଲାଙ୍ଗୀର ବ୍ଲକ୍‌ର ଦୁଡୁକାଶିରା ମୌଜାରେ ୧୦ ଏକର ଜମିରେ ଏକ ବ୍ଲକ୍‌ସ୍ତରୀୟ ଷ୍ଟାଡିୟମ୍ ନିର୍ମାଣ ପାଇଁ ପଦକ୍ଷେପ ନିଆଯାଇଥିବାରୁ ଏହାକୁ ସମସ୍ତେ ସ୍ୱାଗତ କରିଛନ୍ତି। ତେବେ ଦୁଡୁକାଶିରା ସହରଠାରୁ ଦୂରରେ ଥିବାରୁ ସହରର ବିଭିନ୍ନ କ୍ରୀଡ଼ା ସଂଘ ଓ ଖେଳାଳିମାନଙ୍କ ନିୟମିତ ଅଭ୍ୟାସ, ପ୍ରଶିକ୍ଷଣ ଓ ପ୍ରତିଯୋଗିତା ଆୟୋଜନରେ ଯାତାୟାତ ସମସ୍ୟା ଦେଖାଦେବାର ଆଶଙ୍କା ରହିଛି।

ଅନ୍ୟପକ୍ଷରେ ବଲାଙ୍ଗୀର ସହରରେ ବିଭିନ୍ନ ଇଣ୍ଡୋର କ୍ରୀଡ଼ାର ଖେଳାଳି ଓ ସଂଘ ରହିଥିଲେ ମଧ୍ୟ ସେମାନଙ୍କ ପାଇଁ ଉପଯୁକ୍ତ ଅଭ୍ୟାସ କେନ୍ଦ୍ର ଓ ଆଧୁନିକ କ୍ରୀଡ଼ା ଭିତ୍ତିଭୂମି ନାହିଁ। ଫଳରେ ଅନେକ ଖେଳାଳି ନିୟମିତ ଅଭ୍ୟାସ ଓ ଉଚ୍ଚସ୍ତରୀୟ ପ୍ରତିଯୋଗିତା ପାଇଁ ଆବଶ୍ୟକ ସୁବିଧାରୁ ବଞ୍ଚିତ ହେଉଛନ୍ତି।

ତେଣୁ ବଲାଙ୍ଗୀର ସହର ମଧ୍ୟରେ ଉପଯୁକ୍ତ ସରକାରୀ ଜମି ଚିହ୍ନଟ କରି ଏକ ଆଧୁନିକ ବହୁମୁଖୀ ଇଣ୍ଡୋର ଷ୍ଟାଡିୟମ୍ ନିର୍ମାଣ କରିବାକୁ ଦାବି ହୋଇଛି। ଏହି ଷ୍ଟାଡିୟମ୍‌ରେ ବିଭିନ୍ନ ଇଣ୍ଡୋର କ୍ରୀଡ଼ା ପାଇଁ ଅତ୍ୟାଧୁନିକ କୋର୍ଟ, ପ୍ରଶିକ୍ଷଣ କେନ୍ଦ୍ର, ଖେଳାଳିଙ୍କ ପାଇଁ ଆବଶ୍ୟକ ସୁବିଧା ସହ ଜିଲ୍ଲା, ରାଜ୍ୟ ଓ ଜାତୀୟସ୍ତରୀୟ ପ୍ରତିଯୋଗିତା ଆୟୋଜନର ବ୍ୟବସ୍ଥା ରହିବା ଆବଶ୍ୟକ ବୋଲି ମତ ପ୍ରକାଶ ପାଇଛି।

ଏଥିପାଇଁ ଜିଲ୍ଲା ପ୍ରଶାସନ ତୁରନ୍ତ ଉପଯୁକ୍ତ ଜମି ଚିହ୍ନଟ କରିବା ସହ ଏକ ସବିଶେଷ ପ୍ରକଳ୍ପ ପ୍ରସ୍ତାବ ପ୍ରସ୍ତୁତ କରି ରାଜ୍ୟ କ୍ରୀଡ଼ା ଓ ଯୁବସେବା ବିଭାଗକୁ ପଠାଇବାକୁ ଦାବି ହୋଇଛି।

ଏହି ଦାବିକୁ ସମର୍ଥନ କରି ମଧୁସୂଦନ କ୍ରୀଡ଼ା ଏବଂ ସାଂସ୍କୃତିକ ସଂଘ, ବଲାଙ୍ଗୀରର ସମ୍ପାଦକ ଆଡଭୋକେଟ୍ ସୁମିତ ରଞ୍ଜନ ପୁରୋହିତ, ବଲାଙ୍ଗୀର ବାର୍ ଆସୋସିଏସନ୍‌ର ସଭାପତି ବାସୁଦେବ ରଥ, ଚନ୍ଦ୍ରଶେଖର ମିଶ୍ର, ବିଶିଷ୍ଟ କ୍ରୀଡ଼ାବିତ୍ ଲଳିତ ଶର୍ମାଙ୍କ ସମେତ ଅନେକ କ୍ରୀଡ଼ାବିତ୍ ଓ କ୍ରୀଡ଼ାପ୍ରେମୀ ବଲାଙ୍ଗୀର ସହରରେ ଏକ ଆଧୁନିକ ଇଣ୍ଡୋର ଷ୍ଟାଡିୟମ୍ ନିର୍ମାଣ ପାଇଁ ଦାବି ଜଣାଇଛନ୍ତି।

ଦୁଡୁକାଶିରାରେ ବ୍ଲକ୍‌ସ୍ତରୀୟ ଷ୍ଟାଡିୟମ୍ ସହ ବଲାଙ୍ଗୀର ସହରରେ ଆଧୁନିକ ଇଣ୍ଡୋର ଷ୍ଟାଡିୟମ୍ ନିର୍ମାଣ ହେଲେ ଜିଲ୍ଲାର କ୍ରୀଡ଼ା ଭିତ୍ତିଭୂମି ଆହୁରି ସୁଦୃଢ଼ ହେବ। ଏହା ଖେଳାଳିଙ୍କୁ ଉନ୍ନତ ପ୍ରଶିକ୍ଷଣ ଓ ପ୍ରତିଭା ବିକାଶର ସୁଯୋଗ ଦେବା ସହ ବଲାଙ୍ଗୀରକୁ ରାଜ୍ୟର ଏକ ପ୍ରମୁଖ କ୍ରୀଡ଼ା କେନ୍ଦ୍ର ଭାବେ ଗଢ଼ି ତୋଳିବାରେ ସହାୟକ ହେବ। ଏଥିପାଇଁ ଜିଲ୍ଲାପାଳ ଓ ରାଜ୍ୟ ସରକାର ଯଥାଶୀଘ୍ର ସକାରାତ୍ମକ ପଦକ୍ଷେପ ନେବାକୁ କ୍ରୀଡ଼ାପ୍ରେମୀମାନେ ଆଶା ପ୍ରକାଶ କରିଛନ୍ତି।