09-Mar-2021

ବଲାଙ୍ଗୀର(ପ୍ରେରଣା ଖବର ବ୍ୟୁରୋ): ବଲାଙ୍ଗୀର ଜିଲ୍ଲାର ଜଙ୍ଗଲମାନଙ୍କରେ ବ୍ୟାପକ ପରିମାଣରେ ନିଆଁ ଲାଗି ବନସଂପଦ କ୍ଷତି ହେଉଛି । ଏହା ସହିତ ସବୁଆଡେ ଧୂଆଁମୟ ହୋଇ ପରିବେଶ ପ୍ରଦୁଷିତ ହେଉଛି । ଆଜି ଖପ୍ରାଖୋଲ ବ୍ଲକ ନାନ୍ଦୁପଲା ରାସ୍ତାରେ ଗଲାବେଳେ ଜଙ୍ଗଲରେ ନିଆଁଲାଗିଥିବା ଦେଖି ଦିଲ୍ଲୀରେ ରହୁଥିବା ପ୍ରଫେସର ସୁଜିତକୁମାର ପୃଷେଠ ଗଭୀର ଉଦବେଗ ପ୍ରକାଶ କରିଥିଲେ । ମହିଳା ଦିବସ ପାଳନ କାର୍ଯ୍ୟକ୍ରମରେ ଯୋଗଦେବାକୁ ଯାଉଥିବା ବେଳେ ସାଙ୍ଗରେ ଯାଉଥିବା ଭେଟନାରୀ ଅଫିସର ଡ.ସୁଜିତ ଶତପଥିଙ୍କ ସାଥିରେ ଓହ୍ଲାଇ ନିଆଁକୁ ଲିଭାଇଥିଲେ । ନିଜେ ପ୍ରଥମେ ଗଛର ଡାଳ ଭାଙ୍ଗି ଜଳୁଥିବା ନିଆଁକୁ ବାଡେଇ ଲିଭାଇଥିଲେ । ଏହା ସହିତ ଗାଡିରେ ଥିବା ପାଣି ନେଇ ବୋଟଲରେ ଜଳୁଥିବା ପତ୍ର ରେ ପକାଇଥିଲେ । ତଥାପି ସବୁ ନିଆଁ ଆୟତ ହୋଇନଥିବାରୁ ସ୍ଥାନୀୟ ଗାଁଲୋକ ଓ ଜଙ୍ଗଲ ବିଭାଗର ଫରେଷ୍ଟରଙ୍କୁ ଡାକି ବାଲଟି ଅଣାଇ ପାଣି ବୋହି ନିଆଁକୁ ଲିଭାଇଥିଲେ । ଲୋକଙ୍କର ମିଳିତ ଉଦ୍ୟମରେ ନିଆଁକୁ ଆୟତ୍ତ କରାଯାଇ ପାରିଥିଲା । ପ୍ରଫେସର ଓ ଭେଟେନାରୀ ଡାକ୍ତରଙ୍କ ଉଦ୍ୟମକୁ ସ୍ଥାନୀୟ ଅଧିବାସୀ ପ୍ରଶଂସା କରିବା ସହିତ ନିଜେ ସମ୍ମିଳିତ ହୋଇ ନିଆଁ ଲିଭାଇବାରେ ସାହାର୍ଯ୍ୟ କରିଥିଲେ । ରାସ୍ତାକଡରେ ଥିବା ପତ୍ରା ଜଙ୍ଗଲରୁ ନିଆଁ ଲାଗିବା ଆରମ୍ଭ କରି ସଂରକ୍ଷିତ ଜଙ୍ଗଲକୁ ବ୍ୟାପୁଛି । ଫଳରେ ଜଙ୍ଗଲର ଔଷଧିୟ ବୃକ୍ଷ,ବନ୍ୟଜନ୍ତୁ,ସରୀସୃପ ନିଆଁରେ ପୋଡି ନଷ୍ଟ ହେଉଛନ୍ତି । ଏମାନଙ୍କୁ ରକ୍ଷାକରିବା ଆମ ସମସ୍ତଙ୍କର ଦାୟୀତ୍ବ ରହିଛି । ସ୍ଥାନୀୟଲୋକ ଓ ଜଙ୍ଗଲ ବିଭାଗର ସମ୍ମିଳିତ ଉଦ୍ୟମ ହେଲେ ଜଙ୍ଗଲ ନିଆଁକୁ ଆୟତ୍ତ କରିହେବ ବୋଲି ପ୍ରଫେସର ଡ.ସୁଜିତ କୁମାର କହିଛନ୍ତି ।