08-Mar-2021

ବେଙ୍ଗାଲୁରୁ,(ପ୍ରେରଣା ଖବର ବ୍ୟୁରୋ) : ବୁଲା କୁକୁରଙ୍କୁ ଖାଇବାକୁ ଦେବା ଜଣେ ଯୁବତୀ ଏବଂ ତାଙ୍କ ବନ୍ଧୁଙ୍କୁ ମହଙ୍ଗା ପଡ଼ିଛି । ଏଥିପାଇଁ ତାଙ୍କୁ ପଥର ମାଡ଼ ସହିତ ଚପଲ ମାଡ଼ ସହିବାକୁ ପଡ଼ିଛି । ଏହି ସମୟର ଭିଡିଓ ଏବେ ଭାଇରାଲ୍‌ ହେବାରେ ଲାଗିଛି । ଏହି ଘଟଣାଟି ଗତ ଶୁକ୍ରବାର ରାତି ବେଙ୍ଗାଲୁରୁର ନଗରଭାବି ଅଞ୍ଚଳରେ ଘଟିଥିବା ଜଣାପଡ଼ିଛି ।  

ଘଟଣା ଅନୁସାରେ, ଆଇନ୍‌ ଛାତ୍ରୀ ପ୍ରିୟା ଏବଂ ତାଙ୍କ ବନ୍ଧୁ ସତ୍ୟଜିତ୍‌ ବିନାୟକ ଲେଆଉଟ୍‌ର ୩୦ କ୍ରସ୍‌ ରୋଡ୍‌ରେ ଯାଉଥିବା ସମୟରେ ଅଟକି ଥିଲେ । ରାସ୍ତାରେ ବୁଲୁଥିବା କିଛି କୁକୁରଙ୍କୁ ପ୍ରିୟା ଖାଇବାକୁ ଦେଇଥିଲେ । ସେ ସବୁଦିନ ଏହି କାମ କରୁଥିଲେ ।

କୁକୁରଙ୍କୁ ଖାଇବାକୁ ଦେବା ସମୟରେ ଜଣେ ବ୍ୟକ୍ତି, ତାଙ୍କ ପତ୍ନୀ ଏବଂ ତାଙ୍କ ପୁଅ ପ୍ରିୟାଙ୍କୁ ଏନେଇ ବାରଣ କରିଥିଲେ । ସେମାନେ ଗଳିରେ କୁକୁର ବୃଦ୍ଧି ପାଉଥିବା କହିବା ସହିତ ପ୍ରିୟାଙ୍କୁ ଗାଳି ଗୁଲଜ୍‌ କରିଥିଲେ । ଏହି ଝଗଡ଼ା ଭିତରେ ତାଙ୍କ ପଡ଼ୋଶୀ ଆସି ବୁଝାସୁଝା କରିବାରୁ ମାମଲା ଶାନ୍ତ ପଡ଼ିଥିଲା ।

ଏହି ଘଟଣାକୁ ନେଇ ପ୍ରିୟା କହିଥିଲେ ଯେ, ସେ ଦୀର୍ଘ ୩ ବର୍ଷ ଧରି ଏହି ଅଞ୍ଚଳରେ ରହିଆସୁଛନ୍ତି । ଏଥି ସହିତ ସେ କୁକୁର ମାନଙ୍କ ସେବା କରିବା ସହିତ ତାଙ୍କୁ ଓୌଷଧ ଦେଇଛନ୍ତି । ପ୍ରତ୍ୟେକ ଦିନ ପ୍ରିୟା ସେମାନଙ୍କୁ ଖାଇବାକୁ ଦେଇଥାନ୍ତି ଏବଂ ଏହା ଆଗକୁ ସେ ଜାରି ରଖିବେ ବୋଲି କହିଛନ୍ତି । ଏନେଇ ସେ ପୋଲିସ୍‌ ଥାନାରେ ମାମଲା ମଧ୍ୟ ଦାଏର୍ କରିଥିବା ଜଣାପଡ଼ିଛି ।

ତେବେ ଏହି ଘଟଣାର ଭିଡିଓ ସୋସାଲ୍‌ ମିଡିଆରେ ଭାଇରାଲ୍‌ ହେବା ପରେ ଅନେକ ଲୋକ ବିଭିନ୍ନ ମତ ଦେଇଛନ୍ତି । କିଛି ପଶୁପ୍ରେମୀ ପ୍ରିୟାଙ୍କୁ ପ୍ରଂଶସା କରିବା ସହିତ ଏହି କାମ ଜାରି ରଖିବାକୁ କହିଥିବା ବେଳେ ଅନ୍ୟ କିଛି ଲୋକ ସହରରେ ବଢ଼ୁଥିବା କୁକୁରଙ୍କ ସଂଖ୍ୟା ସମସ୍ୟ ସୃଷ୍ଟି କରୁଛି ବୋଲି ମତ ଦେଇଥିବା ଦେଖିବାକୁ ମିଳିଛି ।