25-Aug-2026

ବିନିକା(ହିମାଂଶୁ ଶେଖର ପୁଟେଲ)ସରକାରଙ୍କ ଅଧିନରେ କାର୍ଯ୍ୟ କରୁଥିବା କର୍ମଚାରୀ ଓ କଲେଜରେ ଅଧ୍ୟୟନରତ ଛାତ୍ରଛାତ୍ରୀ ମାନଙ୍କ ଦୃଷ୍ଟି ଶକ୍ତିର ସୁରକ୍ଷା ପାଇଁ ମଙ୍ଗଳବାର ବିନିକା ସ୍ଥିତ ସିଦ୍ଧାର୍ଥ ମହାବିଦ୍ୟାଳୟ ପରିସରରେ ଏକ ମାଗଣା ଚକ୍ଷୁ ପରୀକ୍ଷା ଶିବିର ଅନୁଷ୍ଠିତ ହୋଇଥିଲା।ଯୁବ ରେଡକ୍ରସ ବିଭାଗର ପରୋକ୍ଷ ତତ୍ତ୍ୱାବଧାନରେ ସିଦ୍ଧାର୍ଥ ସ୍ନାତକ ଓ ସିଦ୍ଧାର୍ଥ ଉଚ୍ଚ ମାଧ୍ୟମିକ ବିଦ୍ୟାଳୟ ଏବଂ ପଣ୍ଡାପାଲି ମହାନଦୀ ନେତ୍ର ଚିକିତ୍ସାଳୟର ମିଳିତ ଆନୁକୂଲ୍ୟରେ ଅନୁଷ୍ଠିତ ଏହି ମାଗଣା ଚକ୍ଷୁ ଚିକିତ୍ସା ଶିବିରର ପ୍ରାରମ୍ଭରେ ଡିଗ୍ରୀ କଲେଜ ଅଧ୍ୟକ୍ଷ ଡ଼ ଧୀରେନ୍ଦ୍ର କୁମାର ନାୟକ,ଜୁନିଅର କଲେଜ ଅଧ୍ୟକ୍ଷା ରେଖା ପ୍ରଧାନ,ସୁବର୍ଣ୍ଣପୁର ଜିଲ୍ଲା ଯୁବ ରେଡକ୍ରସ ସଂଯୋଜକ ବିଶ୍ୱନାଥ ମିଶ୍ର, କାଉନସିଲର ଧନେଶ୍ୱର ସାହୁ,ନାରାୟଣ ଚୌଧୁରୀ,ଗରିବ ସେଲମା,ପ୍ରେମାନନ୍ଦ ପୂଜାରୀ,ଦେବାଶିଷ ମେହେର ପ୍ରମୁଖ ଉପସ୍ଥିତ ରହି ସରକାର ଆରମ୍ଭ କରିଥିବା ଵିଦ୍ୟାର୍ଥୀ ଦୃଷ୍ଟି ସୁରକ୍ଷା ଯୋଜନାର ଉପକାରିତା ଉପରେ ଆଲୋକପାତ କରିଥିଲେ। ପରେ ଉଭୟ କଲେଜର ସମସ୍ତ ଅଧ୍ୟାପକ, ଅଧ୍ୟାପିକା,କର୍ମଚାରୀ ଏବଂ ଅଧ୍ୟୟନରତ ଛାତ୍ରଛାତ୍ରୀ ମାନେ ନିଜ ନିଜର ଚକ୍ଷୁ ପରୀକ୍ଷା କରିଥିଲେ ।ଆବଶ୍ୟକ ସ୍ଥଳେ ଆଖିର ସୁରକ୍ଷା ଏବଂ କମ ଦୃଷ୍ଟି ସମ୍ପନ୍ନ ବ୍ୟକ୍ତି ବିଶେଷଙ୍କୁ ନେତ୍ର ଚିକିତ୍ସାଳୟ ତରଫରୁ ଚଷମା ବଣ୍ଟନ କରାଯାଇଥିଲା ।