08-Apr-2026

କାକଟପୁର :ପୁରୀ ଜିଲ୍ଲାର ପ୍ରସିଦ୍ଧ ଆଦ୍ୟାଶକ୍ତି ପୀଠ ମା’ ମଙ୍ଗଳାଙ୍କ ଚୈତ୍ର ଝାମୁଯାତ୍ରା ଆଜି ଶେଷ ପାଳିକୁ ପହଞ୍ଚିଛି। ଗତ କିଛି ଦିନ ଧରି ଭକ୍ତିମୟ ପରିବେଶରେ ଚାଲିଥିବା ଏହି ପାରମ୍ପରିକ ଯାତ୍ରାରେ ଆଜି ଶେଷ  ମଙ୍ଗଳବାର ଦିନରେ ହଜାର ହଜାର ଭକ୍ତଙ୍କ ଭିଡ଼ ଦେଖିବାକୁ ମିଳିଛି।ମନ୍ଦିର ପକ୍ଷରୁ ଜାରି ହୋଇଥିବା ଦିନଚର୍ଯ୍ୟା ଅନୁଯାୟୀ ପ୍ରଭାତରୁ ମନ୍ଦିରରେ ବିଭିନ୍ନ ନୀତିକାର୍ଯ୍ୟ ଆରମ୍ଭ ହୋଇଥିଲା। ଦ୍ୱାର ଖୋଲା, ମଙ୍ଗଳ ଆରତି, ସ୍ନାନ, ବେଶ ଓ ଭୋଗ ନୀତି ସମ୍ପନ୍ନ ହେବା ପରେ ଭକ୍ତମାନଙ୍କୁ ଦର୍ଶନ ଦିଆଯାଇଥିଲା। ଦିନଭରି ମା’ଙ୍କର ବିଭିନ୍ନ ବେଶ ଓ ପୂଜାରେ ଭକ୍ତମାନେ ଭାଗ ନେଇ ଆଶୀର୍ବାଦ ଗ୍ରହଣ କରିଥିଲେ |ବିଶେଷକରି ଝାମୁଯାତ୍ରାର ଶେଷ ପାଳି ଅବସରରେ ପାରମ୍ପରିକ ରୀତିନୀତି ସହ ମହାଆରତି ଓ ବିଶେଷ ପୂଜା ଆୟୋଜିତ ହୋଇଥିଲା। ଏହି ଅବସରରେ ଅଞ୍ଚଳରେ ଉତ୍ସବମୁଖର ପରିବେଶ ଦେଖିବାକୁ ମିଳିଥିଲା ଓ ଭକ୍ତମାନଙ୍କ ଭିତରେ ଭକ୍ତି ଓ ଉତ୍ସାହର ମହଲ ସୃଷ୍ଟି ହୋଇଥିଲା।ଶୃଙ୍ଖଳାବଦ୍ଧ ଦର୍ଶନ ପାଇଁ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା |ଯାତାୟାତ ଓ ଭିଡ଼ ନିୟନ୍ତ୍ରଣ ପାଇଁ ବିଶେଷ ବ୍ୟବସ୍ଥା ନେଇଯାଇଥିବାରୁ ଭକ୍ତମାନେ ସୁବିଧାର ସହ ଦର୍ଶନ କରିପାରିଥିଲେ।ମା’ମଙ୍ଗଳାଙ୍କ ଝାମୁଯାତ୍ରାର ଶେଷ ପାଳି ସଫଳ ଭାବେ ସମ୍ପନ୍ନ ହେବା ସହ କାକଟପୁର ଅଞ୍ଚଳରେ ଏକ ଧାର୍ମିକ ଓ ସାମ୍ପ୍ରଦାୟିକ ଏକତାର ଅଦ୍ଭୁତ ଚିତ୍ର ପ୍ରକାଶ ପାଇଛି।