03-Apr-2026

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ବିଗତ ବିଜେଡି ସରକାରର ସର୍ବାଧିକ ଦୁର୍ନୀତି ହୋଇଛି ମନରେଗାରେ । ଏବେ ରାଜ୍ୟରେ ବିଜେପି ଶାସନ ବା କେନ୍ଦ୍ରରେ ମଧ୍ଯ ବିଜେପି କ୍ଷମତାରେ ଥାଇ ଡବଲଇଞ୍ଜିନ୍ ସରକାର ବଦଳିଲାପରେ ଏହି କେନ୍ଦ୍ରୀୟ ଦୀର୍ଘମିଆଦୀ ଗ୍ରାମୀଣ ନିଶ୍ଚିତ ଶ୍ରମଭିତ୍ତିକ ଯୋଜନାର ରୂପରେଖ ଓ ନାଁ' ବଦଳି ବିଭି-ଜିରାମଜି ହେଲା ପରେ ପୂର୍ବ ସରକାରଙ୍କର ଏହି ମନରେଗା ଯୋଜନାର ପୁଳା ପୁଳା ଭୁଲ୍ ତ୍ରୁଟି ବା ଅନିୟମିତତା ଏବେ ଲୋକଲୋଚନକୁ ଆସିବାରେ ଲାଗିଛି ।  ବଲାଙ୍ଗୀର ଜିଲ୍ଲାର ବ୍ଲକ୍ ଗୁଡିକରେ ଏହି ଦୁର୍ନୀତି ସୀମାଲଙ୍ଘନ କରିଥିବା ଅଭିଯୋଗରୁ ପ୍ରକାଶ  । ଏଥିମଧ୍ୟରେ ପୋଖରୀ ବା ଜଳାଶୟ ଖନନ , ମାଟିଖୋଳା ବା ଖାଲଖୋଳା, ବୃକ୍ଷରୋପଣ , ଚାରାରୋପଣ, ରାସ୍ତାକାମ, ବନୀକରଣ , ସୋକ୍ ପିଟ୍ ପରି ବିଭିନ୍ନ ଛୋଟବଡ ପ୍ରକଳ୍ପରେ ଗ୍ରାମସାଥୀଙ୍କ ଦ୍ବାରା ଆବେଦନକ୍ରମେ ଶ୍ରମିକ ଯୋଗାଡରେ ଜାଲିଆତିର ଅଭିଯୋଗ ପରିଲକ୍ଷିତ । ବିଗତବର୍ଷ ଖପ୍ରାଖୋଲ ବ୍ଲକର ଭାନପୁର , ମହରାପଦର ଓ ଅନ୍ଯାନ୍ଯ ପଞ୍ଚାୟତରୁ ଆରମ୍ଭ କରି ମୁରିବାହାଲ ବ୍ଲକ, ବଙ୍ଗୋମୁଣ୍ଡା ବ୍ଳକ, ପାଟଣାଗଡ ବ୍ଲକ, ବେଲପଡା ବ୍ଲକ ଓ ସଇଁତଳା ବ୍ଳକର କେତେକ ପଞ୍ଚାୟତର ଘଟଣା ଅନ୍ତର୍ଭୁକ୍ତ  । ସଦ୍ୟତମ ଉଦାହରଣ ରୂପେ ଲୋକଙ୍କ ଅଭିଯୋଗ ଆଧାରରେ ସଇଁତଳା ବ୍ଳକର ଯୁରାବନ୍ଧ ପଞ୍ଚାୟତର ଯୁରାବନ୍ଧ ପଞ୍ଚାୟତର ଗ୍ରାମସାଥୀଙ୍କୁ ବହିଷ୍କାର କରାଯିବା ପରେ ଡୁକେରଚଚରା ପଞ୍ଚାୟତର ଗ୍ରାମସାଥୀ ସତ୍ଯବନ୍ତ ତାଣ୍ଡିଙ୍କ ବିରୁଦ୍ଧରେ ତଦନ୍ତପୂର୍ବକ କାର୍ଯ୍ୟାନୁଷ୍ଠାନ ଅପେକ୍ଷାରେ ରହିଥିବା ପ୍ରକାଶ । କିନ୍ତୁ ବେଲପଡା ବ୍ଲକର ୨୪ ଟି ପଞ୍ଚାୟତରୁ ଘାଗୁର୍ଲି, ମଣ୍ଡଳ , ସୁଲେକେଲା , ଧୁମାଭଟା, କପାଣି ଓ ଅନ୍ଯାନ୍ଯ କେତେକ ପଞ୍ଚାୟତର ଗ୍ରାମସାଥୀଙ୍କ ବିରୁଦ୍ଧରେ ଉଠିଥିବା ମଧ୍ଯରେ ଘାଗୁର୍ଲି ପଞ୍ଚାୟତର ଜଣେ ଗ୍ରାମସାଥୀଙ୍କ ବିରୁଦ୍ଧରେ ସବୁଠୁଁ ବେଶି ଅଭିଯୋଗ ରହିଛି ।  ଉକ୍ତ ଅଭିଯୁକ୍ତ ଅଭିଯୁକ୍ତ ଗ୍ରାମସାଥୀଙ୍କ ବିରୁଦ୍ଧରେ ଗତ କିଛିବର୍ଷ ଧରି ସୋକ୍ ପିଟ୍ ଓ ଅନ୍ଯାନ୍ଯ ମନରେଗା ପ୍ରକଳ୍ପରୁ ବାଟମାରଣା କରି ସେହି ଅନ୍ଯାୟୋପାର୍ଜିତ ଅର୍ଥରେ ଜମି କିଣି ଓ ବିଭିନ୍ନ ସରକାରୀ ଯୋଜନାର କୋଟି କୋଟି ଟଙ୍କାର ବ୍ୟାଙ୍କ ଋଣର ମାର୍ଜିନ ମନି ଦାଖଲ କରି ଆଖିଦୃଶିଆ ହେବାରୁ  ସ୍ଥାନୀୟ ଲୋକଙ୍କ ଦୃଷ୍ଟିକଟୁ ହୋଇପଡିଥିବା ପ୍ରକାଶ । ଏଣୁ ଅନ୍ତତଃ ପ୍ରଥମରେ ବେଲପଡା ବ୍ଲକର ଏହି ଘାଗୁର୍ଲି ପଞ୍ଚାୟତର ଉପରୋକ୍ତ ମନରେଗା ପ୍ରକଳ୍ପର ଅନିୟମିତତାର ଏକ ପୁଙ୍ଖାନୁପୁଙ୍ଖ ଭିଜିଲାନ୍ସ ତଦନ୍ତ କରାଯିବାକୁ ଲୋକେ ପ୍ରଶାସନ ଓ ସରକାରଙ୍କ ଦୃଷ୍ଟିଆକର୍ଷଣ କରିଛନ୍ତି ।