17-Feb-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ଜିଲ୍ଲାର ପୁଇଁନ୍ତଲା ବ୍ଲକ ଅନ୍ତର୍ଗତ ମଳମଣ୍ଡା ଗ୍ରାମ ପଞ୍ଚାୟତର ଚନ୍ଦ୍ରପୁର ଠାରେ ଚତୁର୍ଥ ମହାଶିବରାତ୍ରି ଜାଗର ମେଳା ଅବସରରେ ୫ଦିନ ଧରି ଚାଲିଥିବା ଶିବ ପୁରାଣ ତଥ୍ୟ ଆଧାରିତ ଜଳନ୍ଧର ଦରବାର ଅନୁଷ୍ଠିତ ହୋଇଯାଇଛି। ଦରବାରର ଉଦଯାପନୀ ସଂନ୍ଧ୍ୟାରେ ପୁଇଁନ୍ତଲା ବ୍ଲକ ଯାଦବ ମହାସଭାର ସଭାପତି ଅନିରୁଦ୍ଧ ବଗର୍ତ୍ତୀ ମୁଖ୍ୟ ଅତିଥି ଭାବରେ ଯୋଗଦେଇ ଶିବ ପୁରାଣର ତତ୍ୱକୁ ଦରବାର ସମସ୍ତ ଅଭିନେତା ନିଖୁଣ ଭାବରେ ନିଜ ନିଜର ଅଭିନୟ ମାଧ୍ୟରେ ଦର୍ଶକ ମାନଙ୍କୁ ବିମୋହିତ କରିଥିବାରୁ ଆୟୋଜକ କମିଟୀ ଓ ଅଭିନେତା ମାନଙ୍କୁ ପ୍ରଶଂସା କରି ଥିଲେ। ଦରବାରର ବିଭିନ୍ନ ଦିବସରେ ଜଳନ୍ଧରଙ୍କ ତ୍ରିପୁର ବିଜୟୀ ହେବାପାଇଁ ତପସ୍ୟା, ଦେବାସୁର ଯୁଦ୍ଧ ଓ ଶ୍ରୀ ନାରାୟଣଙ୍କ ଦ୍ୱାରା ବୃନ୍ଦାଦେଵୀ ସତୀତ୍ୱ ହରଣ ପରି ଦୃଶ୍ୟ ଗୁଡିକ କଳାକାର ମାନଙ୍କ ଦ୍ୱାରା ନିଖୁଣ ଭାବେ ପରିବେଷଣ ହେବା ସାଙ୍ଗକୁ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଦରବାରର ମୁଖ୍ୟ ଆକର୍ଷଣ ଜଳନ୍ଧର ଭୂମିକାରେ କଳାକାର ମାଷ୍ଟର ଶଙ୍କର କଲତା ଅଭିନୟ କରିଥିଲେ। ଶିବରାତ୍ରି ମେଳା ଓ ଜଳନ୍ଧର ଦରବାରକୁ ସଫଳ କରିବା ପାଇଁ ଆୟୋଜନ କମିଟୀର ସଭାପତି ପ୍ରେମାନନ୍ଦ, ଉପସଭାପତି ଦେବଧର ବାଙ୍କ, ପିତାମ୍ବର ବାଙ୍କ, ପଦ୍ମନାଭ ବାଙ୍କ, ଚିନ୍ତାମଣି କର୍ମୀ, କମିଟୀ ସଦସ୍ୟ ପଙ୍କଜ ବାଙ୍କ, ଶରତ ବାଙ୍କ, ପୌଲସ୍ଥି ବାଙ୍କ, ପବିତ୍ର ବାଙ୍କ, ସଙ୍ଗୀତ ବାଙ୍କ କୁଳମଣି କର୍ମୀ, ଲୋକନାଥ କର୍ମୀ, ଅଶୋକ ବାଙ୍କ, ଆନନ୍ଦ ବାଙ୍କ , ହୃଷିକେଶ ବାଙ୍କ, ସୁରେଶ ବାଙ୍କ ଓ ଗ୍ରାମବାସୀ ମାନେ ସହଯୋଗ କରିଥିଲେ।