13-Feb-2026

ସିନାପାଲି ( ଚିନ୍ତାମଣି ନେତାମ ) ନୂଆପଡ଼ା ଜିଲ୍ଲା ସିନାପାଲି ବ୍ଲକ୍ ଅନ୍ତର୍ଗତ ଗୋର୍ଲା ସରକାରୀ ଆଶ୍ରମ ବିଦ୍ୟାଳୟ ପରିସରରେ ଅଭୂତପୂର୍ବ ଉଲ୍ଲାସ ଓ ଉତ୍ସାହରେ ଭରି ଉଠିଥିଲା  ୨୦୨୫-୨୬ ଶିକ୍ଷାବର୍ଷର ବାର୍ଷିକ ଉତ୍ସବ ମହାଆଡ଼ମ୍ବର ସହିତ ପାଳନ କରାଯାଇଥିଲା। ଏହି ଉତ୍ସବ କେବଳ ଏକ ସାଧାରଣ କାର୍ଯ୍ୟକ୍ରମ ନ ଥିଲା, ବରଂ ଛାତ୍ରଛାତ୍ରୀଙ୍କ ପ୍ରତିଭା, ଶିକ୍ଷକମାନଙ୍କ ନିଷ୍ଠା ଏବଂ ସମଗ୍ର ସମାଜର ସହଯୋଗର ଏକ ସୁନ୍ଦର ପ୍ରତୀକ ହୋଇ ପଡ଼ିଥିଲା।ଏହି ଅବସରରେ ବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀଯୁକ୍ତ  ବିପିନ ବିହାରୀ ନାଏକଙ୍କ ସଭାପତିତ୍ୱରେ କାର୍ଯ୍ୟକ୍ରମ ଆରମ୍ଭ ହୋଇଥିଲା। ମୁଖ୍ୟ ଅତିଥି ଭାବରେ  ନୂଆପଡା ଜିଲ୍ଲା  ଅତିରିକ୍ତ ମଙ୍ଗଳ ସମ୍ପ୍ରସାରଣ ଅଧିକାରୀ  ଶ୍ରୀଯୁକ୍ତ ସଞ୍ଜୟ ଭୋଇ, ମୁଖ୍ୟ ବକ୍ତା ଭାବରେ କଳାହାଣ୍ଡି ଜିଲ୍ଲା ଶିକ୍ଷା ନିରୀକ୍ଷକ  ଶ୍ରୀଯୁକ୍ତ  ଉଦୟସିଂ ମାଝୀ,ବିଶିଷ୍ଟ ଅତିଥିଭାବରେ  ସିନାପାଲି ମଙ୍ଗଳ ସମ୍ପ୍ରସାରଣ ଅଧିକାରୀ ଶ୍ରୀଯୁକ୍ତ ସୁନୀଲ କୁମାର ସାମଲ ,ସମ୍ମାନିତ ଅତିଥି ଭାବରେ ଗୋର୍ଲା ସରପଞ୍ଚ ଶ୍ରୀମତୀ  ଦମୟନ୍ତୀ ଦଣ୍ଡସେନା,  ଖଇର ପଦର ଆଶ୍ରମ ବିଦ୍ୟାଳୟ ର ପ୍ରଧାନ ଶିକ୍ଷକ ଶ୍ରୀଯୁକ୍ତ  ଗଙ୍ଗାରାମ ବାଗ, ପତିଆଳପଡା କ୍ଲଷ୍ଟର ସିଆରସିସି ଶ୍ରୀଯୁକ୍ତ ଖଗେଶ୍ୱର ବାଗ,  ଖିପ୍ରିମାଲ ଉ :ପ୍ରା ବିଦ୍ୟାଳୟ ର ପ୍ରଧାନ ଶିକ୍ଷକ ଶ୍ରୀଯୁକ୍ତ ଶୋଭାରାମ ଜଗତ, ଟିମନପୁର ଆଶ୍ରମ ବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀଯୁକ୍ତ ପୁସ୍ତମ ନାଏକ,  ଗୋର୍ଲା ପଂଚାୟତ କାର୍ଯ୍ୟନିର୍ବାହ ଅଧିକାରୀ  ଶ୍ରୀଯୁକ୍ତ  ଚଳାନ  ଏବଂ ବିଦ୍ୟାଳୟ ପରିଚାଳନା କମିଟିର ସଭାପତି ଶ୍ରୀଯୁକ୍ତ ଯୋଗୀନ୍ଦ୍ର ନାଗ ମଞ୍ଚାସୀନ ଥିଲେ।  ଶ୍ରୀଯୁକ୍ତ  ମିନିକେତନ ହଂସ  ମଞ୍ଚପରିଚାଳନା କରିଥିଲେ ।
ବିଦ୍ୟାଳୟର ଛାତ୍ରଛାତ୍ରୀମାନେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଯୋଗେ ସମଗ୍ର ପରିସରକୁ ଉତ୍ସାହରେ ଭରି ଦେଇଥିଲେ। ନୃତ୍ୟ, ଗୀତ, ନାଟକ, ବକ୍ତୃତା ଓ ବିଭିନ୍ନ ପ୍ରତିଯୋଗିତାରେ ସେମାନଙ୍କର ଅନନ୍ୟ ପ୍ରତିଭା ଦର୍ଶକମାନଙ୍କୁ ମୁଗ୍ଧ କରିଦେଇଥିଲା। ଦର୍ଶକମାନେ ଝୁମି ଉଠିଥିଲେ ଏବଂ ପ୍ରତ୍ୟେକ ପ୍ରଦର୍ଶନ ପରେ ତାଳିର ଗୁଞ୍ଜନରେ ପରିବେଶ ଉଲ୍ଲାସ ମୟ ହୋଇଥିଲା।
ଉତ୍ସବର ଶେଷ ଭାଗରେ କ୍ରୀଡ଼ା, ଗୀତ, ବକ୍ତୃତା ତଥା ବିଭିନ୍ନ କ୍ଷେତ୍ରରେ ଉତ୍କୃଷ୍ଟ ପ୍ରଦର୍ଶନ କରିଥିବା ଛାତ୍ରଛାତ୍ରୀମାନଙ୍କୁ ପୁରସ୍କାର ବିତରଣ କରାଯାଇଥିଲା । ବିଦ୍ୟାଳୟର ସମସ୍ତ ଶିକ୍ଷକ ଓ ଶିକ୍ଷୟିତ୍ରୀମାନେ ଏହି କାର୍ଯ୍ୟକ୍ରମକୁ ସଫଳ କରିବାରେ ଅକ୍ଳାନ୍ତ ପରିଶ୍ରମ କରିଥିଲେ। ଶେଷରେ  ଆଶ୍ରମ ବିଦ୍ୟାଳୟ ର  ସହ ଶିକ୍ଷକ ଶ୍ରୀଯୁକ୍ତ ଲଷ୍ମୀକାନ୍ତ ମାଝୀ ସମସ୍ତଙ୍କୁ ଧନ୍ୟବାଦ ଜଣାଇ କାର୍ଯ୍ୟକ୍ରମକୁ ସମାପ୍ତ କରିଥିଲେ।
ଏହି ବାର୍ଷିକ ଉତ୍ସବ ଗୋର୍ଲା ସରକାରୀ ଆଶ୍ରମ ବିଦ୍ୟାଳୟର ଏକ ନୂତନ ଅଧ୍ୟାୟର ସମାରୋହ ଭାବରେ ଚିହ୍ନିତ ହୋଇଛି। ଏହା ପ୍ରମାଣ କରିଛି ଯେ ଗ୍ରାମାଞ୍ଚଳର ଏହି ସରଳ ବିଦ୍ୟାଳୟ ମଧ୍ୟ ଅନ୍ୟାନ୍ୟ ବିଦ୍ୟାଳୟଙ୍କ ପରି ପ୍ରତିଭା ଓ ଉତ୍ସାହରେ ପରିପୂର୍ଣ୍ଣ। ଏହି ଉତ୍ସବ ଛାତ୍ରଛାତ୍ରୀମାନଙ୍କ ପାଇଁ ଏକ ପ୍ରେରଣାସ୍ରୋତ ହୋଇ ରହିବ ଏବଂ ସମଗ୍ର ସମାଜକୁ ଶିକ୍ଷା ଓ ସଂସ୍କୃତିର ମହତ୍ତ୍ୱ ବୁଝାଇବ l