13-Dec-2025

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ଜିଲ୍ଲା ସମେତ ପଶ୍ଚିମଓଡିଶାର କପାଚାଷୀଙ୍କ ସମସ୍ୟାକୁ ନେଇ ପର୍ଲାମେଣ୍ଟରେ ଉଠିଛି ପ୍ରଶ୍ନ ।କେନ୍ଦ୍ରୀୟ ପିଏସୟୁ କଟନ କର୍ପୋରେସନ ଅଫ ଇଣ୍ଡିଆ ଚାଷୀଙ୍କ କପାକୁ କିଣିବାରେ ଯେଉଁ ପଲିସି କରିଛି ତାହା ଚାଷୀଙ୍କୁ ସମସ୍ୟାରେ ପକାଇଛି । ଏହାର ସମାଧାନ କରାଯାଉ ବୋଲି ବଲାଙ୍ଗୀର ସାଂସଦ ସଂଗୀତା କୁମାରୀ ସିଂଦେଓ ଲୋକସଭାର ଶୂନ୍ୟକାଳରେ ଦାବି କରିଛନ୍ତି । ସାଂସଦ ଶ୍ରୀମତୀ ସିଂଦେଓ କହିଛନ୍ତି ଯେ,ଓଡିଶାର ବଲାଙ୍ଗୀର ଜିଲ୍ଲା ସମେତ କଳାହାଣ୍ଡି, ନୂଆପଡା, ରାୟଗଡା ଜିଲ୍ଲାରେ ବିପୁଳ ପରିମାଣର ଉନ୍ନତ କପା ଉତ୍ପାଦନ ହେଉଛି । ଏହାକୁ କେନ୍ଦ୍ରୀୟ ସଂସ୍ଥା ସିସିଆଇ କିଣୁଛି ଓ ଜିନିଂମିଲକୁ ଦେଉଛି । କିନ୍ତୁ ସିସିଆଇ କରିଥିବା କପାକିଣା ପଲିସିରେ ବ୍ୟାପକ ତୃଟି ରହିଛି । ବାହାର ରାଜ୍ୟର ବ୍ୟବସାୟୀ ଆସି ଏହି ଜିଲ୍ଲା ଗୁଡିକରୁ କପା ନେଇପାରୁଥିବା ବେଳେ ଓଡିଶାରେ ଅନ୍ୟଜିଲ୍ଲା ରୁ କପା ଆଣିପାରିବେ ନାହିଁ ବୋଲି ସିସିଆଇ ନିୟମ କରିଛି । ବଲାଙ୍ଗୀର ଜିଲ୍ଲା ସମେତ ଅନ୍ୟ କିଛି ଜିଲ୍ଲା ଆକାଂକ୍ଷୀ ଜିଲ୍ଲା ହୋଇଥିବା ବେଳେ ଏହି ଜିଲ୍ଲାମାନଙ୍କରେ ଶିଲ୍ପଗୁଡିକୁ ପ୍ରୋତ୍ସାହିତ କରିବାର ନିୟମ ରହିଛି । କିନ୍ତୁ ଏହା ନକରି ସିସିଆଇ ଏହି ଜିଲ୍ଲାଗୁଡିକରୁ ଜିନିଂମିଲ ମାନେ କପା ଉଠାଇ ପାରିବେ ନାହିଁ ବୋଲି ପଲିସି କରି ଅଙ୍କୁଶ ଲଗାଇଛି । ଯାହାକି ଜିନିଂମିଲର୍ସଙ୍କୁ ଅଡୁଆରେ ପକାଇଛି । ତେଣୁ ସରକାର ସ୍ୱତନ୍ତ୍ର ଧ୍ୟାନ ଦେଇ ଏହି ସମସ୍ୟାର ସମାଧାନ କରିବାକୁ ସାଂସଦ ସଂଗୀତା କୁମାରୀ ସିଂଦେଓ ଲୋକସଭାରେ ଦାବି କରିଛନ୍ତି । ପ୍ରକାଶ ଯେ, ବଲାଙ୍ଗୀର ଓ କଳାହାଣ୍ଡି ଜିଲ୍ଲାରେ ୭୨ ହଜାର ହେକ୍ଟର ଲେଖାଏଁ ଜମିରେ କପାଚାଷ ହୋଇଛି । ଠିକ ସେହିପରି ରାୟଗଡାରେ ୪୦ହଜାର ହେକ୍ଟର ଓ ନୂଆପଡାରେ ୨୦ହଜାର ହେକ୍ଟର ଜମିରେ କପାଚାଷ ହୋଇଛି । ସିସିଆଇ ଜରିଆରେ ଚାଷୀ କପା ବିକ୍ରୀ କରୁଛନ୍ତି । ସେହି କପାକୁ ସିସିଆଇ ଠାରୁ ଜିନିଂମିଲ ମାନେ ନେଇ ଜିନିକରି ଫେରାଉଛନ୍ତି । କଳାହାଣ୍ଡି ଜିଲ୍ଲାରେ ମାତ୍ର ୯ଟି ମିଲ ଓ ନୂଆପଡା ଜିଲ୍ଲାରେ ମାତ୍ର ଗୋଟିଏ ଜିନିଂମିଲ ରହିଛି । ବଲାଙ୍ଗୀର ଜିଲ୍ଲାରେ ସର୍ବାଧିକ ୧୮ଟି ଜିନିଂମିଲ ରହିଛି। ତେଣୁ କଳାହାଣ୍ଡି, ନୂଆପଡ, ବରଗଡ ଓ ସୋନପୁର ଜିଲ୍ଲାର ଚାଷୀ ମାନଙ୍କର କପାକୁ ଉଠାଇବାକୁ ବଲାଙ୍ଗୀର ଜିନିଂମିଲର୍ସ ଅପେକ୍ଷା କରି ଚାହିଁ ବସିଥାନ୍ତି । କିନ୍ତୁ ଚଳିତବର୍ଷ ସିସିଆଇ କରିଥିବା ନୀୟମ ଯୋଗୁଁ କପାଚାଷୀ ତଥା ଜିନିଂମିଲର୍ସ ଅସୁବିଧାରେ ରହିଛନ୍ତି ।