01-Sep-2025

ଭୁବନେଶ୍ୱର(ପ୍ରେରଣା ଖବର):ସ୍ୱାୟତ୍ତ ଶାସନ ଦିବସ ଅବସରରେ ଭୁବନେଶ୍ୱର ମହାନଗର ନିଗମ(ବିଏମ୍ ସି) ପକ୍ଷରୁ ବ୍ୟାପକ କାର୍ଯ୍ୟକ୍ରମ ହାତକୁ ନିଆଯାଇଛି । ଆଜି ପ୍ରତ୍ୟୁଷରୁ ବିଏମ୍ ସି ଅଂଚଳରେ ଥିବା ସମସ୍ତ ମହାମନିଷୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା । ସକାଳ 8ଟାରେ ବିଏମ୍ ସି ମୁଖ୍ୟାଳୟରେ ମାନନୀୟା ମେୟର ଶ୍ରୀମତୀ ସୁଲୋଚନା ଦାସ ଜାତୀୟ ପତାକା ଉତ୍ତୋଳନ କରିଥିଲେ । ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ଶ୍ରୀମତୀ ମଂଜୁଲତା କହଁର, କମିଶନର ଶ୍ରୀ ଚଞ୍ଚଳ ରାଣା, ଷ୍ଟାଣ୍ଡିଂ କମିଟିର ସମସ୍ତ ଅଧ୍ୟକ୍ଷ, ଅଧ୍ୟକ୍ଷା ବହୁ କର୍ପୋରେଟର, ଅତିରିକ୍ତ କମିଶନରଙ୍କ ସହ ବିଏମ୍ ସିର ସମସ୍ତ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ । ପରେ ମାନନୀୟା ମେୟର ଓ କମିଶନ ସମସ୍ତ ଷ୍ଟାଣ୍ଡିଂ କମିଟି ଅଧ୍ୟକ୍ଷ, ଅଧ୍ୟକ୍ଷା ଓ କର୍ପୋରେଟରଙ୍କ ଉପସ୍ଥିତିରେ ମୋଟ ୨୪ଟି ପ୍ରକଳ୍ପର ଉଦଘାଟନ କରାଯାଇଥିବା ବେଳେ ୨ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି । ଏହି ଅବସରରେ ବିଏମ୍ ସିରୁ ଅବସର ଗ୍ରହଣ କରିଥିବା୪ ଜଣ କର୍ମଚାରୀଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦିଆଯାଇଥିଲା । ଅପରପକ୍ଷେ, ଅଗଷ୍ଟ ୧୫ତାରିଖରୁ ଆରମ୍ଭ ହୋଇଥିବା ଗରିମା ଅଧିନରେ ଆଇନଗତ ସଫେଇ, ସୁରକ୍ଷିତ ସଫେଇ ଅଭିଯାନର ଉଦ୍ ଯାପନ ଦିବସ । ଏହି ଉଦଯାପନ ଦିବସ ଅବସରରେ ମାନନୀୟା ମେୟର, ଡେପୁଟି ମେୟର, କମିଶନର, ସମସ୍ତ କର୍ପୋରେଟର, ଉପସ୍ଥିତ ଅଧିକାରୀ ଓ କର୍ମଚାରୀମାନେ  ଶପଥ ପତ୍ର ଉପରେ ଦସ୍ତଖତ କରିଥିଲେ ।  
ସ୍ୱାୟତ୍ତ ଶାସନ ଦିବସ ଅବସରରେ ମାନନୀୟା ମେୟର, କମିଶନର, ଷ୍ଟାଣ୍ଡିଂ କମିଟିର ଅଧ୍ୟକ୍ଷ, ଅଧ୍ୟକ୍ଷା ଓ କର୍ପୋରେଟର ମାନେ  ବିଏମ୍ ସି ଡାକ୍ତରଖାନା ଓ ଆଶ୍ରୟସ୍ଥଳିରେ ଫଳ ବଣ୍ଟନ କରିଥିଲେ ।

ଅପରପକ୍ଷେ, ରାଜ୍ୟସ୍ତରୀୟ ସ୍ୱାୟତ୍ତ ଶାସନ ଦିବସ ଅବସର ରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଦ୍ୱାରା ପଳାଶୁଣିଠାରେ ଦୈନିକ ୧୫୦ଟନ୍ ବିଶିଷ୍ଟ ବର୍ଜ୍ୟ ପୁନଃଉଦ୍ଧାର କେନ୍ଦ୍ର, ଟିଟିଏସଠାରେ ଦୈନିକ ୧୦ ଟନ୍ ବିଶିଷ୍ଟ ପ୍ଲାଜ୍ ମା ପ୍ରକ୍ରିୟାକରଣ ୟୁନିଟର ଉଦ୍ଘାଟନ କରାଯାଇଛି । ଏହି ପ୍ରକାର ୟୁନିଟ୍ ଦେଶର ହାତ ଗଣତି କେତୋଟି ସହରରେ ରହିଛି ଏବଂ ଏହା ଆମ ରାଜ୍ୟରେ ପ୍ରଥମ । ଏହା ବ୍ୟତୀତ ହ୍ୱାଟ୍ସଆପ ମାଧ୍ୟମରେ ଭୁବନେଶ୍ୱର ମହାନଗର ନିଗମ ଅଂଚଳ ଲୋକଙ୍କ ଅଭିଯୋଗ ଶୁଣିବା, ସେମାନଙ୍କର ସମସ୍ୟା ସମାଧାନ କରିବା, ଲୋକେ ବିଏମ୍ ସି କାର୍ଯ୍ୟାଳୟକୁ ନ ଆସି ନିଜ ମୋବାଇଲରେ ସମସ୍ତ ପ୍ରକାର ଟାକ୍ସ ପ୍ରଦାନ କରିବା ଆଦି କାର୍ଯ୍ୟ ଘରେ ବସି କରିପାରିବେ । ଆର୍ଟିଫିସିଆଲ ଇଣ୍ଟେଲିଜେନ୍ସ ଜରିଆରେ ହୋଇଥିବା ଏହି ମୋବାଇଲ ଆପକୁ ମଧ୍ୟ ମାନ୍ୟବର ମୁଖ୍ୟମନ୍ତ୍ରୀ ଆଜି ଲୋକାର୍ପଣ କରିଛନ୍ତି ।
ଜୟଦେବ ଭବନଠାରେ ଆୟୋଜିତ ସନ୍ଧ୍ୟା ଅଧିବେଶନର  ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମାନ୍ୟବର ଗୃହ ନିର୍ମାଣ ଓ ନଗର ଉନ୍ନୟନ ଓ ସାଧାରଣ ଉଦ୍ୟୋଗ ମନ୍ତ୍ରୀ ଡାଃ  କୃଷ୍ଣଚନ୍ଦ୍ର ମହାପାତ୍ର ଯୋଦେଇଥିଲେ । ଅନ୍ୟମାନଙ୍କ ମଧ୍ୟରେ ମାନ୍ୟବର ଏକାମ୍ର ବିଧାୟକ ବାବୁ ସିଂ, ମାନନୀୟା ମେୟର ଶ୍ରୀମତୀ ସୁଲୋଚନା ଦାସ, ମାନନୀୟା ଡେପୁଟି ମେୟର ଶ୍ରୀମତୀ ମଞ୍ଜୁଲତା କହଁର, ସାଂସ୍କୃତିକ ଷ୍ଟାଣ୍ଡିଂ କମିଟିର ଅଧ୍ୟକ୍ଷ ରାମଚନ୍ଦ୍ର ରଣସିଂହ ପ୍ରମୁଖ ମଞ୍ଚାସୀନ ଥିଲେ । ଅନ୍ୟମାନଙ୍କ ମଧ୍ୟରେ ଅନ୍ୟ ଷ୍ଟାଣ୍ଡିଂ କମିଟିର ଅଧ୍ୟକ୍ଷ, ଅଧ୍ୟକ୍ଷା, ସମସ୍ତ କର୍ପୋରେଟର, ବିଏମ୍ ସିର ସମସ୍ତ ଅଧିକାରୀ ଓ କର୍ମଚାରୀ ଯୋଗଦେଇଥିଲେ । 
୮ ଶହ ଏକର ଜମି ଉପରେ ନୂତନ ଭୁବନେଶ୍ବର ଗଠନ ହେବ। ୩ଶହ କୋଟି ଟଙ୍କା ବ୍ୟୟରେ ନିକୋପାର୍କର ନବିକରଣ କରାଯିବ ବୋଲି ମାନ୍ୟବର ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଘୋଷଣା କରିଛନ୍ତି। ଏହାସହ ବିଏମସିର କର୍ମଚାରୀ ସଂଖ୍ୟା ବୃଦ୍ଧି କରିବା ଏବଂ ମଧ୍ୟବିତ୍ତ ପରିବାରର ଲୋକଙ୍କୁ ସ୍ଵଳ୍ପ ମୂଲ୍ୟରେ ଘର ଯୋଗାଇ ଦେବାକୁ ସେ କହିଛନ୍ତି ।

ଏହି ଅବସରରେ ଭୁବନେଶ୍ୱର ଅଂଚଳରୁ ପଦ୍ମଶ୍ରୀ ପୁରସ୍କାର ପ୍ରାପ୍ତ ପଦ୍ମଶ୍ରୀ ପ୍ରଫେସର ଡକ୍ଟର ଅଶୋକ କୁମାର ମହାପାତ୍ର, ପଦ୍ମଶ୍ରୀ ଅଦ୍ୱୈତ ପ୍ରସାଦ ଗଡନାୟକ, ପଦ୍ମଶ୍ରୀ ଦୁର୍ଗାଚରଣ ରଣବୀର, ପଦ୍ମଶ୍ରୀ ଡକ୍ଟର ପ୍ରତିଭା ଶତପଥୀଙ୍କୁ ସମ୍ମାନିତ କରାଯାଇଥିଲା । ସେହିପରି ଚଳିତ ବର୍ଷ ଅରୁଣ କୁମାର ମହାନ୍ତି, ନିରାକାର ସାହୁ, ମନୋରଂଜନ ମହାନ୍ତି, ସୁନାରମ ସିଂ, ଗିରିଜା ନନ୍ଦନ ମହାନ୍ତି, ରୋହିତାସ୍ୱ ଦଳାଇଙ୍କୁ ନଗର ବନ୍ଧୁ ସମ୍ମାନ ପ୍ରଦାନ କରାଯାଇଥିଲା । ଏହା ବ୍ୟତୀତ ଫାଲକନ ରେସିଡେନ୍ସି, ବାଲାଜୀ ରେସିଟେଣ୍ଟସ ଓ୍ୱେଲଫେୟାର ସୋସାଇଟ୍, ଶ୍ରୀକ୍ଷେତ୍ର ଗ୍ରୀନଉଡ୍ ଆବାସିକ ସଂଗଠନକୁ ମଧ୍ୟ ସେମାନଙ୍କର ସେବାମୂଳକ କାର୍ଯ୍ୟକଳାପ ପାଇଁ ସମ୍ମାନିତ କରାଯାଇଛି ।  ବିଏମ୍ ସି ଅଂଚଳରେ ଥିବା ସମସ୍ତ ବିଦ୍ୟାଳୟର ଛାତ୍ରଛାତ୍ରୀଙ୍କ ମଧ୍ୟରେ ହୋଇଥିବା ବିଭିନ୍ନ ପ୍ରତିଯୋଗରେ କୃତି ପ୍ରତିଯୋଗୀଙ୍କୁ ପୁରସ୍କାର ପ୍ରଦାନ କରାଯାଇଥିଲା । ଏହା ବ୍ୟତୀତ ବିଭିନ୍ନ ବର୍ଗରେ କୃତୀତ୍ୱ ହାସଲ କରିଥିବା ବ୍ୟକ୍ତି ବିଶେଷ, ଅନୁଷ୍ଠାନକୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ଅପରପକ୍ଷେ ସହରରେ ଥିବା ସମସ୍ତ ପାର୍କରେ, ବିଭିନ୍ନ ପ୍ରତିଯୋଗିତା, ଯୋଗାଭ୍ୟାସ, ନୃତ୍ୟ, କ୍ରୀଡା ଇତ୍ୟାଦି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।
ଏହି ସମସ୍ତ କାର୍ଯ୍ୟକ୍ରମର ସଂଯୋଜନା କରିଥିଲେ ଅତିରିକ୍ତ କମିଶନର ଶ୍ରୀ ରତ୍ନାକର ସାହୁ ଓ କୈଳାସ ଚନ୍ଦ୍ର ଦାସ ।