23-Dec-2024

ବୌଦ୍ଧ/ହରଭଙ୍ଗା(ଦେବବ୍ରତ ଦାଶ ଙ୍କ ରିପୋର୍ଟ):- କୃଷି ଭିତ୍ତିକ ବୌଦ୍ଧଜିଲ୍ଲାରେ ଧାନ ଚାଷ ସହିତ ଅଣଧାନ ଫସଲ   ରବିଜାତୀୟ ଫସଲର ଏକ ବିରାଟ ସମ୍ଭାବନା ରହିଛି  । ବିଗତ କିଛି ବର୍ଷ ହେଲା ରାଜ୍ୟ ସରକାରଙ୍କ ପ୍ରୋତ୍ସାହନରେ ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ କ୍ଷୁଦ୍ର ଶସ୍ୟର ଚାଷ ବୃଦ୍ଧି ପାଇବାରେ ଲାଗିଛି  । ମୁଗ, ବିରି, କୋଳଥ, ମାଣ୍ଡିଆ,ଯନା,କାଙ୍ଗଲା ଭଳି ରବି ଫସଲ ତଥା କ୍ଷୁଦ୍ର ଶସ୍ୟ ସମେତ କପା ଚାଷ କରି ଚାଷୀ ବେଶ ଆର୍ଥିକ ସ୍ୱାବଲମ୍ବୀ ହୋଇପାରୁଛନ୍ତି  । ଚଳିତବର୍ଷ ଏଭଳି କ୍ଷୁଦ୍ର ଶସ୍ୟ, ରବି ଫସଲ ତଥା କପାର ଉପଯୁକ୍ତ ମୂଲ୍ୟ ଚାଷୀ କିଭଳି ପାଇବେ ସେନେଇ ଜିଲ୍ଲା ପ୍ରଶାସନ ତଥା କୃଷି ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଥିବା ସୂଚନା ମିଳିଛି  । ଏନେଇ ଶନିବାର ଜିଲ୍ଲାପାଳଙ୍କ କାର୍ଯ୍ୟାଳୟ ଠାରେ ଜିଲ୍ଲାପାଳ ସୁବ୍ରତ କୁମାର ପଣ୍ଡାଙ୍କ ସଭାପତିତ୍ୱରେ ଏକ ସ୍ୱତନ୍ତ୍ର ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ଅତିଥି ରୂପେ କଣ୍ଟାମାଳ ବିଧାୟକ କହ୍ନେଇ ଚରଣ ଡାଙ୍ଗ, ଅତିରିକ୍ତ ଜିଲ୍ଲାପାଳ ଅନିରୁଦ୍ଧ ପ୍ରଧାନ, ସାଂସଦ ପ୍ରତିନିଧି ଯୁଗଳ କିଶୋର ସାମଲ , ଜିଲ୍ଲା ମୁଖ୍ୟ କୃଷି ଅଧିକାରୀ ତଥା ସମସ୍ତ ବିଭାଗୀୟ ଅଧିକାରୀ ଯୋଗ ଦେଇଥିଲେ  । ଅନୁଷ୍ଠିତ ଏହି ସ୍ୱତନ୍ତ୍ର ବୈଠକରେ ଚାଷୀଙ୍କ ଆର୍ଥିକ ଅଭିବୃଦ୍ଧି ପାଇଁ ଉଦ୍ଦିଷ୍ଟ ବିଭିନ୍ନ ଯୋଜନା ସଂପର୍କରେ ଆଲୋଚନା କରାଯାଇଥିଲା  ।