26-Jun-2024

ଭୁବନେଶ୍ବର (ବିଶ୍ୱରଞ୍ଜନ ବିଶ୍ଵାଳ) ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ନୂଆ ପରିକଳ୍ପନା । ଟ୍ୱିନ ସିଟି ହେବ ଟ୍ରିପଲ୍ ସିଟି । ଦ୍ୱୈତ ନଗରୀ କଟକ-ଭୁବନେଶ୍ୱର ସହ ଯୋଡ଼ି ହେବ ପୁରୀ । ସହରର ଆକାର ବଢ଼ିବ । ଗମନାଗମନ ସୁବିଧା ସହ ଅର୍ଥନୈତିକ ଅଭିବୃଦ୍ଧି ହେବ । ଆଜି ବିଭାଗ ପକ୍ଷରୁ ସମୀକ୍ଷା ବେଳେ ଏଭଳି କହିଛନ୍ତି ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ।
ଏଥିସହ ଅଫିସରଙ୍କୁ ତାଗିଦ୍ କରିଛନ୍ତି ମନ୍ତ୍ରୀ । କେବଳ ଅଫିସରେ ବସି ରୁହନ୍ତୁ ନାହିଁ, ଫିଲ୍ଡ ଭିଜିଟ କରନ୍ତୁ । ଦିନକୁ ଅନ୍ତତଃ ୩-୪ ଘଣ୍ଟା ୱାର୍ଡକୁ ଯାଆନ୍ତୁ । ଲୋକଙ୍କ ସମସ୍ୟା ବୁଝନ୍ତୁ । ଅଭିଯୋଗ ଶୁଣନ୍ତୁ । ଅଭିଯୋଗକୁ ଫାଇଲରେ ଚାପି ରଖନ୍ତୁ ନାହିଁ ବୋଲି କହିଛନ୍ତି ମନ୍ତ୍ରୀ । ଭୁବନେଶ୍ୱର ଇସ୍କନ ପାଖରେ ସବୁବେଳେ ଅଳ୍ପ ବର୍ଷାରେ ପାଣି ଜମୁଛି ।
କେଉଁ କାରଣରୁ ସେ ସମସ୍ୟା ଉପୁଜିଛି, ସେ ସମସ୍ୟାର କିଭଳି ସମାଧାନ ହୋଇପାରିବ ସେଥିପ୍ରତି ନଜର ଦେବାକୁ ମନ୍ତ୍ରୀ କହିଛନ୍ତି । ସେପଟେ ପ୍ରତିବର୍ଷ ବର୍ଷା ଯୋଗୁଁ ରାଜଧାନୀରେ ଡ୍ରେନେଜ୍ ସମସ୍ୟା ଉପୁଜୁଛି । ଏହାକୁ ଦୃଷ୍ଟିରେ ରଖି ଆକ୍ସନ ପ୍ଲାନ ପ୍ରସ୍ତୁତ କରିଛି ବିଏମସି । ଜୁଲାଇ ୧୫ ସୁଦ୍ଧା ବିଏମ୍‌ସି ଅଧିନରେ ଥିବା ସମସ୍ତ ଡ୍ରେନର ମରାମତି, ସଫେଇ ଏବଂ ଡ୍ରେନ ଚତୁର୍ପାଶ୍ୱରେ ତାରବାଡ କାମ ସାରିବାକୁ ତାଗିଦ୍ କରି

କରିଛନ୍ତି ମେୟର।ନଚେତ ସଂପୃକ୍ତ ଏଜେନ୍ସି ସମେତ ଅଧିକାରୀଙ୍କ ଉପରେ ହେବ କାର୍ଯ୍ୟାନୁଷ୍ଠାନ । ଏଭଳି ସୂଚନା ଦେଇଛନ୍ତି ମେୟର ସୁଲୋଚନା ଦାସ । ଗତକାଲି ବିଏମ୍‌ସି କାର୍ଯ୍ୟାଳୟରେ ମେୟରଙ୍କ ଅଧ୍ୟକ୍ଷତାରେ ବସିଥିବା ଡ୍ରେନ ଡିସେର୍ଲ୍ଟିଂ ବୈଠକରେ ନିଷ୍ପତ୍ତି ହୋଇଛି । ବୈଠକରେ ବିଏମସି ସମେତ ଆରଏଣ୍ଡଡି, ସମସ୍ତ ଏଜେନ୍ସି, ଷ୍ଟାଣ୍ଡିଂ କମିଟି ସଦସ୍ୟ, ଟିପିସିଓଡିଏଲ, ଇଡକୋ ଅଧିକାରୀ ଉପସ୍ଥିତ ଥିଲେ ।ପୂର୍ବରୁ ଜୁନ ୨୦ ତାରିଖ ସୁଦ୍ଧା ଭୁବନେଶ୍ୱରରେ ସମସ୍ତ ଡ୍ରେନ କାମ ସାରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ଏବେ ସମୟସୀମା ବଢାଯାଇଛି । ତେବେ ଡ୍ରେନ ସଫେଇ କାମରେ ଲାଗୁଥିବା ଲୋକଙ୍କ ଅଭାବ ପାଇଁ ସଠିକ ସମୟରେ କାମ ସରି ପାରୁନଥିବା କହିଛନ୍ତି ମେୟର । ୭୭ କିଲୋମିଟର ମେନ୍ ଡ୍ରେନ ସମେତ ୩୬୦ କିଲୋମିଟର ଆରଏଣ୍ଡଡି ଡ୍ରେନର ସମସ୍ତ କାମ ୧୫ ଜୁଲାଇ ସୁଦ୍ଧା ସାରିବାକୁ ଲକ୍ଷ୍ୟ ରଖିଛି ବିଏମସି।