07-Dec-2023

ଭୁବନେଶ୍ୱର/ବଲାଙ୍ଗିର(ପ୍ରେରଣା ଖବର ବ୍ୟୁରୋ ): ଶୀତକାଳୀନ ଅଧିବେଶନରେ ରାଜ୍ୟସଭାରେ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ଦ୍ୱାରା ଆଗତ ପୋଷ୍ଟ ଅଫିସ୍ ବିଲ୍ ୨୦୨୩ ରେ ସାଂସଦ ନିରଞ୍ଜନ ବିଶି ଆଲୋଚନାରେ ଅଂଶଗ୍ରହଣ କରିଥିଲେ l ନୂତନ ପୋଷ୍ଟ ଅଫିସ ବିଲ ୨୦୨୩ ଟି ୧୨୫ ବର୍ଷ ର ପୁରୁଣା ଇଣ୍ଡିଆନ ପୋଷ୍ଟ ଅଫିସ ଆକ୍ଟ ୧୮୯୮ ସଂଶୋଧନ କରୁଅଛି l ନୁଆଁ ବିଧେୟକକୁ ବିଜେଡି ତରଫରୁ ସାଂସଦ ଶ୍ରୀ ବିଶି ଡିଜିଟାଲ୍ ଯୁଗ ସହିତ ସମାନ୍ତରାଳ ଭାବେ ଡାକ ସେବାକୁ ଆଧୁନିକୀକରଣ କରିବାର ଲକ୍ଷ୍ୟ ଉପରେ ଗୁରୁତ୍ୱାରୋପ କରିଥିଲେ। ଅନଲାଇନ୍ ସପିଂ, ଇ-ବାଣିଜ୍ୟ, ଡିଜିଟାଲ୍ ପେମେଣ୍ଟ ଭଳି ସେବାକୁ ଗ୍ରାମାଞ୍ଚଳର ବିକାଶ ସହିତ ଗ୍ରାମାଞ୍ଚଳରେ ଆର୍ଥିକ  ପ୍ରଗତି କରିବା ପାଇଁ ସେ ଏହି ନିୟମ ପ୍ରଣୟନ କରିଥିବାରୁ ରେଲୱେ, ଦୂର ସଂଚାର ମନ୍ତ୍ରୀ ଶ୍ରୀ ଅଶ୍ୱିନୀ  ବୈଷ୍ଣବଙ୍କୁ ପ୍ରଶଂସା କରିଥିଲେ ।

ଏଥିସହ,ସାଂସଦ ଶ୍ରୀ ବିଶି ଦେଶର ୧ ଲକ୍ଷ ୫୬ ହଜାର  ପୋଷ୍ଟ ଅଫିସ ରେ କାର୍ଯ୍ୟରତ ୨ ଲକ୍ଷ ୭୨ ହଜାର ଜିଡିଏସ୍ (ଗ୍ରାମିନ ଡାକ ସେବକ ) ମାନଙ୍କୁ ବିଭାଗୀୟ  କର୍ମଚାରୀ ମାନ୍ୟତା ପ୍ରଦାନ, ଗୋଷ୍ଠୀ ବୀମା ୫ ଲକ୍ଷ କୁ ବୃଦ୍ଧି , ଗ୍ରାଚ୍ୟୁଇଟି ଦେଢ଼ ଲକ୍ଷ ରୁ ୫ ଲକ୍ଷ କୁ ବୃଦ୍ଧି ,୧୮୦ ଦିନ ଛୁଟି ବଦଳ ରେ ଟଙ୍କା ପ୍ରଦାନ,ସେବା ଡିସଚାର୍ଜ ସୁବିଧା ୩ % ପ୍ରତିଶତ ରୁ ୧0% କୁ ବୃଦ୍ଧି, ଚିକିତ୍ସା ସୁବିଧା, ଘର ଭଡା ଭତ୍ତା, ଟିଏ ଡିଏ ଭତ୍ତା, ପ୍ରଦାନ କରିବା ପାଇଁ ପ୍ରସଙ୍ଗ ଉପସ୍ଥାପନ କରିଥିଲେ l ଏହା ସହିତ କମଲେଶ ଚନ୍ଦ୍ର କମିଟି ରିପୋର୍ଟର ସୁପାରିଶକୁ କାର୍ଯ୍ୟକାରୀ କରିବା ପାଇଁ ଆବେଦନ କରିଥିଲେ। କମିଟି ସୁପାରିଶ ଅନୁସାରେ ଡ଼ାକ ସେବକ ମାନେ ଡାକ ବିଭାଗର ଆତ୍ମା ବା ମେରୁଦଣ୍ଡ  l  ଜିଡିଏସ୍ ମାନେ ଡାକ ବିଭାଗର ସମସ୍ତ କାର୍ଯ୍ୟକ୍ରମ ର ସଫଳ ପରିଚାଳନା କରୁଛନ୍ତି l  ବିନା ଆତ୍ମାରେ ମଣିଷ ବଞ୍ଚିବା କଷ୍ଟକର, ତେଣୁ ବିନା ଜିଡ଼ିଏସ ରେ ଡ଼ାକ ବିଭାଗ ବିକାଶ କରିବା ଅସମ୍ଭବ ବୋଲି କମିଟି ଦର୍ଶାଇଛନ୍ତି l
ଶେଷରେ ସେ ତାଙ୍କ ଦଳ ତଥା ନେତା ବିଜୁ ଜନତା ଦଳ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ତରଫରୁ ଏହି ବିଲକୁ ସମର୍ଥନ ଜଣାଇ ଡାକ ସେବାରେ ଉନ୍ନତି ଆଣିବା ଏବଂ ଗ୍ରାମାଞ୍ଚଳର ବିକାଶରେ ଏହି ବିଲ୍‌ର ମହତ୍ତ୍ୱ ଉପରେ ଗୁରୁତ୍ୱାରୋପ କରିଛନ୍ତି।