28-Nov-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ବିଗତ ଦେଢ ଦଶନ୍ଧି ତଳେ ୨୦୦୯ ରେ ଗଣମାଧ୍ୟମର ଜାତୀୟ ଶିରୋନାମା ପାଲଟିଥିବା ଖପ୍ରାଖୋଲ ବ୍ଲକ୍ ଭାନପୁର ପଞ୍ଚାୟତ ବୁରୋମାଲର ଚାବିରିପାଲି ଗାଁ'ର ଝିଙ୍ଗଟୁ ବରିହାର ପରିବାରର ୫ ପ୍ରାଣୀଙ୍କର ଅନାହାର ମୃତ୍ୟୁ ଅଭିଯୋଗ ଘଟଣାପରେ  ଏବେ ସେହି ଆଦିବାସୀ ଅଧ୍ୟୁଷିତ ଦାଦନପ୍ରବଣ ଗାଁ'ଟି ପୁଣିଥରେ ମନରେଗା ଯୋଜନାର ତୃଣମୂଳସ୍ତରରେ ଦାଦନଶ୍ରମିକଙ୍କ ନାଁ'ରେ ଗାଁ' ସାଥିଙ୍କ ଦ୍ଵାରା ଅର୍ଥହଡପ ଅଭିଯୋଗ ନିମନ୍ତେ ଚର୍ଚ୍ଚିତ ହୋଇପଡିଛି । 

ଗତ ୬ ତାରିଖରେ ଏହିଗ୍ରାମର କେତେକ ହିତାଧିକାରୀ ଆସି ପାଟଣାଗଡ ଉପଜିଲ୍ଲାପାଳ ବିଜୟାନନ୍ଦ ସେଠୀଙ୍କୁ ଭେଟି ଏ ସମ୍ପର୍କରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଅନୁଯାୟୀ, ଚଳିତ ୨୦୨୨- ୨୦୨୩ ର ତାଙ୍କ ଭାନପୁର ପଞ୍ଚାୟତରେ କରାଯାଉଥିବା ମନରେଗା କାମରେ ଗ୍ରାମର ଜଣେ ମହିଳା ଗାଁ'ସାଥୀଙ୍କୁ ହଟାଇଦେଇ  ଗାଁ'ସାଥୀ, ଜିଆରଏସ, ସରପଞ୍ଚ ଓ ଅନ୍ୟାନ୍ୟ ଅଧିକାରୀମାନେ କାମ କରିନଥିବା ଦାଦନଶ୍ରମିକଙ୍କ ନାଁ'ରେ ଅର୍ଥ ବାଟମାରଣା କରିଆସୁଛନ୍ତି । ଏପରିକି ଅନୁପସ୍ଥିତ ଦାଦନଶ୍ରମିକ, କାମ କରି ନଥିବା ଗାଁ'ର ଶ୍ରମିକ ଓ ଅନ୍ୟାନ୍ୟ ଗ୍ରାମବାସୀଙ୍କ ନାଁ'ରେ ଆମ୍ବଚାରା ରୋପଣ ବା ଭିନ୍ନକଥା କହି  ଖାତାରେ ଟଙ୍କା ପକାଇ ୫୦୦/ ୧୦୦୦ଲେଖାଏଁ ଟଙ୍କା କମିଶନ ଧରାଇଦେଇ ସମସ୍ତେ ମିଳିମିଶି ଟଙ୍କା ଆତ୍ମସାତ୍ କରୁଛନ୍ତି । 

ସେମାନଙ୍କ ଠାରୁ ପ୍ରକାଶ ଯେ , ଏଭଳି ଅଭିଯୋଗ ଗ୍ରହଣ କଲାବେଳେ କୁଆଡେ ଉପଜିଲ୍ଲାପାଳ ଓଲଟି ସେମାନଙ୍କୁ ଧମକ ଦେଇଥିଲେ ଯେ , ତମେ ଦସ୍ତଖତ ଦେଇଛ ଯଦି , ତମକୁ ସବୁ ଟଙ୍କା ଭରିବାକୁ ପଡିବ । ' 

ତେବେ ଏହି ସମୟରେ ଭାଜପା ପକ୍ଷରୁ ଗତ ୨୨ ଓ ୨୩ ତାରିଖରେ ରାଜ୍ୟସରକାରଙ୍କ ଦୁର୍ନୀତିକୁ ବିରୋଧ କରି ଦଳୀୟ ରୁଟିନ୍ ବ୍ଲକ୍ ଘେରାଉ କାର୍ଯ୍ୟକ୍ରମରେ ଖପ୍ରାଖୋଲ ବ୍ଲକ୍ ଘେରାଉ ବେଳେ ପାଟଣାଗଡର ପୂର୍ବତନ ବିଧାୟକ ତଥା ପୂର୍ବତନ ମନ୍ତ୍ରୀ କନକବର୍ଦ୍ଧନ ସିଂଦେଓ ଏହାର ତଦନ୍ତ ଦାବି କରିଥିଲେ । ଏହାପରେ ଗତ ୨୩ ତାରିଖରେ ବିଡିଓଙ୍କ ନିର୍ଦ୍ଦେଶରେ ବ୍ଲକ୍ ଏପିଓ ପ୍ରଶାନ୍ତ ସାହୁ ଉକ୍ତ ଗ୍ରାମକୁ ଯାଇ ତଦନ୍ତ କଲାବେଳେ ଅଭିଯୋଗକାରୀ ଓ କେତେକ  ହିତାଧିକାରୀ ଦୁଇଗୋଷ୍ଠୀ ପଷରୁ ଗଣ୍ଡଗୋଳ ଘଟିବାରୁ ଣଫେରିଆସିଥିଲେ । ଏଣୁ ଏହି ଅଭିଯୋଗକୁ ଜିଲ୍ଲାସ୍ତରକୁ ଓ ଡିଆରଡିଏରୁ ଅମ୍ବୁସ୍ ପର୍ଶନ ବା ଉଚ୍ଚସ୍ତରୀୟ ତଦନ୍ତ ସକାଶେ  ପଠାଇଦିଆଯାଇଥିବା ଏପିଓ ପ୍ରକାଶ କରିଛନ୍ତି । ତେବେ ଗତ ୨୭ ତାରିଖରେ ଉକ୍ତ ଅଭିଯୋଗକାରୀଙ୍କ ପକ୍ଷରୁ ଅଭିଯୁକ୍ତମାନଙ୍କ ବିରୁଦ୍ଧରେ ଏହି ଦୁର୍ନୀତିର ତଦନ୍ତ ଓ ଏଥିପାଇଁ ସେମାନଙ୍କୁ ଧମକଚମକ ଦିଆଯାଇଥିବା ସମ୍ପର୍କରେ ଏକ ଏତଲା ମଧ୍ୟ ଦିଆଯାଇଥିଲା । ଯାହାକୁ ପୁଲିସ୍ ଏହା ଗ୍ରାମର ଗୋଷ୍ଠୀବିବାଦ ଜନିତ ଗଣ୍ଡଗୋଳ ଦର୍ଶାଇ ଅଭିଯୁକ୍ତପକ୍ଷକୁ ଥାନାକୁ ଡକାଇ ସମାଧାନ କରିଦେଇ ଏ ସମ୍ପର୍କୀୟ ଦୁର୍ନୀତି ଅଭିଯୋଗର ବ୍ଲକ୍ ପକ୍ଷରୁ ତଦନ୍ତ କରାଯିବ ବୋଲି କହି ଫେରାଇ ଦିଆଯାଇଥିବା ପ୍ରକାଶ । 

ତେବେ ଅଭିଯୋଗରୁ ପ୍ରକାଶ ଯେ , ଗାଁ'ସାଥୀ ଓ ପଞ୍ଚାୟତର ଅନ୍ୟମାନେ ମିଶି ଗତବର୍ଷଠାରୁ ଅଦ୍ୟାବଧି ପ୍ରାୟ ଦଶଲକ୍ଷରୁ ଉର୍ଦ୍ଧ୍ବ ଟଙ୍କା ଏପରି କାମକରି ନଥିବା ଲୋକମାନଙ୍କ ନାଁ'ରେ ପକାଇ ଆତ୍ମସାତ୍ କରି ଆସୁଛନ୍ତି । ମୁଖ୍ୟତଃ ଟେଗର ଟ୍ରେଞ୍ଚ୍ ବା ନାଳା ଓ ସିସିବି ବା ବନ୍ଧଖୋଳାରେ ଏଭଳି ଜାଲିଆତି କରାଯାଇଥିବା ଅଭିଯୋଗ ହେଉଛି । ତେବେ ଏ ସମ୍ପର୍କରେ ଏହି ENMS ର ମଷ୍ଟରରୋଲ୍ ଇତ୍ୟାଦି ପରିଚାଳନାର ମନରେଗା ଦାୟିତ୍ୱରେ ଥିବା ଅଧିକାରୀ ଏପିଓ ବା ଅନ୍ୟ କର୍ମଚାରୀମାନେ କିପରି ଜାଣିପାରି ନାହାଁନ୍ତି ବା ଜାଣି ଜାଣି ସବୁ କାରସାଦୀ ଚାଲିଛି, ଏହାର ଅଧିକ ତଦନ୍ତ ଜରୁରୀ ବୋଲି ମତପ୍ରକାଶ ପାଇଛି । 

ଅନୁସନ୍ଧାନରୁ ଜଣାପଡିଛି ଯେ , ବ୍ଲକ୍ , ପଞ୍ଚାୟତ ବା ଅନ୍ୟାନ୍ୟ ବିଭାଗର ମନରେଗା କାମର ଗ୍ରାଉଣ୍ଡ୍ ଜିରୋ ସ୍ତରରେ ଆଗ ନାମମାତ୍ର କାମ କରାଯାଇ ପଛେ ଫାଇଲ୍ ଖୋଲାଯିବା ଏକ ପରମ୍ପରାରେ ପରିଣତ ହୋଇଛି । ଉକ୍ତ ପଞ୍ଚାୟତର ୨୦୨୨- ୨୩ ବର୍ଷର କାମରେ ମୋଟ ପ୍ରାୟ ୨୦ ଲକ୍ଷର କାମରେ ଅଦ୍ୟାବଧି ଦୁଇଟି ଫାଇଲ୍ ର ଚଳିତବର୍ଷରେ ପ୍ରାୟ ୭ ଲକ୍ଷ , ୮ ଲକ୍ଷ ଲେଖାଏଁର ଚାବିରିପାଲି ନାଳା, କରାଡୁଙ୍ଗୁରି, ଠୁଟିଭଟା ନାଳା ଓ ହନୁପାଲି ନାଳା ଇତ୍ୟାଦିର  କାମ ଚାଲିଛି । ଏହିସବୁ କାମରେ କାମ ନକରି ଟଙ୍କା ପଡିଥିବା ଓ ଖାତାଧାରୀ ହିତାଧିକାରୀ ଦାଦନଶ୍ରମିକଙ୍କୁ କମିଶନ ଦେଇ ମିଲିଭଗତରେ ଲକ୍ଷାଧିକଟଙ୍କା ଉପରିସ୍ଥ ଅଧିକାରୀଙ୍କ ଜାଣତରେ ବାଟମାରଣା କରାଯାଇଆସୁଛି । ଟେଗର ଟ୍ରେଞ୍ଚ୍ , ଟିସିବି, ମ୍ୟାଙ୍ଗୋ ପ୍ଲାଣ୍ଟେସନ୍ ବା ଷ୍ଟପ୍ ଡ୍ୟାମ୍ ଇତ୍ୟାଦି ସବୁକାମରେ ଏପିଓ ମଷ୍ଟରରୋଲ୍ ମଞ୍ଜୁର କରି ଜିଆରଏସକୁ ଦେଲାପରେ ଗାଁ ସାଥୀ ଶ୍ରମିକ ନିୟୋଜନ କରିବାର କାମ କରିଥା'ନ୍ତି । ତେଣୁ ଅଧୁନାତନ ଇ ଏନ ଏମ ଏସ୍ ବ୍ୟବସ୍ଥାରେ ଏପିଓ ସବୁ ଜାଣିବା ଜରୁରୀ । ତେଣୁ ଏଭଳି ଅଭିଯୋଗର ପୁଣି ତାଙ୍କୁ ତଦନ୍ତ ଦାୟିତ୍ୱ ଦିଆଯିବା ଅନୁଚିତ ।

ଆହୁରି ମଧ୍ୟ ଜିଲ୍ଲାର  ୫ ଟି ଦାଦନପ୍ରବଣ ଇଣ୍ଟିଗ୍ରେଟେଡ ବ୍ଲକ୍ ମଧ୍ୟରେ ଖପ୍ରାଖୋଲ ରହିଛି । ଏସବୁ ବ୍ଲକ୍ ରେ ଶ୍ରମିକମାନଙ୍କର ଦୈନିକ ମଜୁରୀ ଦେଢଗୁଣ ଅଧିକ ଓ ଶ୍ରମଦିବସ ବି ୩୦୦ ଦିନ । ଏଣୁ ଏଭଳି ବ୍ଲକ୍ ର କିଛିବର୍ଷ ତଳର ବହୁଚର୍ଚ୍ଚିତ ଅନାହାର ମୃତ୍ୟୁର ଗାଁ'ରେ ପୁଣି ଏପରି ଏକ ସମ୍ବେଦନଶୀଳ ଅଭିଯୋଗର ଚର୍ଚ୍ଚା ସତ୍ତ୍ୱେ  ସେଠାକୁ ମାତ୍ର ପ୍ରାୟ ସାତ/ ଆଠ କିମି ଦୂରସ୍ଥ ଉକ୍ତ ଗ୍ରାମକୁ ନଯାଇ ହରିଶଙ୍କରରେ ବୈଠକକରି ପ୍ରସାଦସେବନ କରି ରାଜ୍ୟ ଖାଦ୍ୟ ସୁରକ୍ଷା ଆୟୋଗ  ଫେରି ଯାଇଥିବା , ସେହି ବ୍ଲକ୍ କୁ ବାରମ୍ବାର ଓ  ଗତ ୨୪ ତାରିଖରେ  ବ୍ଲକ୍ ଓ ହରିଶଙ୍କରକୁ ଯାଇ ୫- ଟି କାମ ଅନୁଧ୍ୟାନ କରିଥିବା ଜିଲ୍ଲାପାଳ, ତାଙ୍କରି ଅମଳରେ ଝିଙ୍ଗଟୁ ବରିହାର ଅନାହାର ମୃତ୍ୟୁ ଘଟିଥିବା ତତ୍କାଳୀନ ବିଧାୟକ ଓ ଏବେ ବ୍ଲକ୍ ଘେରାଉ ବେଳେ ଏହି ଅଭିଯୋଗ ଉଠାଇଥିବା କନକବର୍ଦ୍ଧନ, ପାଟଣାଗଡ ବିଧାୟକ ସରୋଜ ମେହେର ବା ବିଡିଓ ଆକାଶ ସାହୁ କେହି ବି ଏତେ ସତ୍ତ୍ୱେ ଉକ୍ତ ଗାଁ'କୁ ଯାଇ ଅଭିଯୋଗର ସତ୍ୟାସତ୍ୟ ଅନୁସନ୍ଧାନ କରିନାହାଁନ୍ତି  ! 

ଏ ସମ୍ପର୍କରେ ସରପଞ୍ଚ ରୀନା ଜାଲ୍, ଗାଁ'ସାଥୀ ଖଗେଶ୍ବର ଜାଲ୍, ଇଓ ମୋହନ ବେହେରା ଓ ଅନ୍ୟାନ୍ୟ ଅଭିଯୁକ୍ତମାନେ ଅଭିଯୋଗକୁ ଅସ୍ବୀକାର କରିଛନ୍ତି । ତେବେ ଅଭିଯୋଗକାରୀଙ୍କ ପକ୍ଷରୁ ଦାଖଲ ଓ ଦାବି କରାଯାଇଥିବା ହିତାଧିକାରୀଙ୍କ ତାଲିକାର ଭିଜିଲାନ୍ସ ଯାଞ୍ଚର ଆବଶ୍ୟକତା ରହିଛି । 

ତେବେ କେବଳ ଖପ୍ରାଖୋଲ ବ୍ଲକ୍ ର ଏହି ଭାନପୁର ପଞ୍ଚାୟତର ଚାବିରିପାଲି ଗାଁ' ସାଥିଙ୍କ ବିରୋଧରେ କେବଳ ଏପରି ହେରଫେରର ଅଭିଯୋଗ ଆସିନାହିଁ , ଅନ୍ୟତମ ଇଣ୍ଟିଗ୍ରେଟେଡ ବ୍ଲକ୍ ମୁରିବାହାଲର ଏକ ପଞ୍ଚାୟତରେ ମଧ୍ୟ ଜଣେ ଗାଁ'ସାଥୀଙ୍କ ଦ୍ବାରା ଜଣେ ଭିନ୍ନକ୍ଷମ ହିତାଧିକାରୀଙ୍କୁ ଏଭଳି ଜାଲିଆତିରେ ପ୍ରତାରିତ କରାଯାଇଥିବା ଗଣମାଧ୍ୟମରେ ପ୍ରକାଶ ପାଇ ଚର୍ଚ୍ଚାର ବିଷୟ ହୋଇଛି । ଏଣୁ  ଏବେ ଦାଦନଚାଲାଣ ଋତୁରେ ଦାଦନପ୍ରବଣ ବଲାଙ୍ଗୀର ଜିଲ୍ଲାରେ ମୁଖ୍ୟତଃ ଦାଦନଚାଲାଣ ରୋକିବାକୁ କାର୍ଯ୍ୟକାରୀ ହେଉଥିବା କେନ୍ଦ୍ର ଓ ରାଜ୍ୟ ସରକାରଙ୍କ ନିଶ୍ଚିତ ଗ୍ରାମୀଣ କର୍ମନିଯୁକ୍ତି ଯୋଗାଣ ଆଇନ ଅନ୍ତର୍ଗତ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାର ଏଭଳି ତୃଣମୂଳ ସ୍ତରର କୀଟଦ୍ରଂଷ୍ଟ ସଦୃଶ ଦୁର୍ନୀତିର  ସଂକ୍ରମଣ ସକାଶେ କିଏ କିଏ ଉତ୍ତରଦାୟୀ , ସରକାର ଏହାର ସମୀକ୍ଷା କରିବା ଓ ସେଇସବୁ ବିଷାକ୍ତ ରୋଗପୋକମାନଙ୍କୁ ମାରିଦେବା ଅତ୍ୟନ୍ତ ଜରୁରୀ ବୋଲି ଜନମତ ପ୍ରକାଶ ପାଇଛି ।