12-Oct-2023

ବରଗଡ଼ (ପ୍ରେରଣା ଖବର ବ୍ୟୁରୋ ): ବରଗଡ ସହର ସ୍ଥିତ ଭଟଲି ରୋଡରେ ରହୁଥିବା ସୁନିଲ ଅଗ୍ରୱାଲଙ୍କ ଅପହରଣ ହେବାର ୧୬ ଦିନ ବିତିଯାଇଥିଲେ ମଧ୍ଯ ଟାଉନ ପୋଲିସ କିଛି କରିପାରୁ ନଥିବାରୁ ବୁଧବାର ସୁନୀଲଙ୍କ ସ୍ତ୍ରୀ ଜୋସ୍ନା ଅଗ୍ରୱାଲ ଏସପିଙ୍କୁ ଦେଖା କରିବା ସହ ଏକ ଲିଖିତ ଅଭିଯୋଗ ପତ୍ର ପ୍ରଦାନ କରିଛନ୍ତି।  ଉକ୍ତ ଅଭିଯୋଗ ପତ୍ରରେ ଦର୍ଶାଇଛନ୍ତି ଯେ, କଣ୍ଟାବାଞ୍ଜି ସହରର ହିତେଶ ଜୈନ, ସଞ୍ଜୟ ଜୈନ ଓ ସୁନିଲ ଜୈନ ମିଶି ମୋ ସ୍ବାମୀଙ୍କ ଠାରୁ ପ୍ରାୟ ଏକ କୋଟି ଟଙ୍କା ନେଇଥିଲେ। ମୋ ସ୍ବାମୀ ଜଣେ ଛୋଟିଆ କନକି (ଭଙ୍ଗା ଚାଉଳ)ର ଦଲାଲି କରି ନିଜ ପରିବାର ପୋଷଣ କରନ୍ତି । ବିଭିନ୍ନ ମିଳମାଳିକ ଓ ଉକ୍ତ କନକି କିଣୁଥିବା ବେପାରୀ ମାନଙ୍କ ସହ ସିଧାସଳଖ ଯୋଗାଯୋଗ କରି ଉକ୍ତ  କନକି ଉଠାଉଥିଲେ। ଗୋଟିଏ ଟ୍ରକ ଲୋଡ କଲେ  ସେ ବାବଦକୁ ପ୍ରାୟ ୧ ହଜାରରୁ ୧୫ ଶହ ଟଙ୍କା ମିଳିଥାଏ। କିନ୍ତୁ ସେପ୍ଟେମ୍ବର ମାସରେ ପ୍ରାୟ ଏକ କୋଟିରୁ ଉର୍ଦ୍ଧ୍ବ ଟଙ୍କାର କନକି କଣ୍ଟାବାଞ୍ଜି ସହରର ମୁରାଲୀ ଅଗ୍ରୱାଲଙ୍କୁ ଦେଇ ଥିବା ବେଳେ ପ୍ରାୟ ୬୦ଲକ୍ଷ ଟଙ୍କା ହିତେଶ, ସଞ୍ଜୟ ଓ ସୁନିଲକୁ ଦିଆଯାଇଥିବା ମୁରାଲୀ କଣ୍ଟାବାଞ୍ଜି ପୋଲିସ ଆଗରେ ସ୍ବୀକାର କରିଥିଲେ । ଆଉ ବାକିଆ ଟଙ୍କା ଗୁଡିକ ଅନଲାଇନ ମାଧ୍ୟମରେ ହିତେଶଙ୍କୁ ପ୍ରଦାନ କରିଛନ୍ତି। ଏହି ଟଙ୍କା ମାଗିବାରୁ ହିତେଶ ଦେଇ ନଥିଲେ । ଏଣୁ କୋଟି ଟଙ୍କା କାରବାର ହୋଇଥିବାରୁ ହିତେଶ ଏବେ ଫେରାର ହୋଇ ଥିବାରୁ ମୋର ସ୍ବାମୀଙ୍କୁ ଅପହରଣ କରି ତାଙ୍କ କ୍ଷତି ପହଞ୍ଚାଇ ଥିବା ସନ୍ଦେହ ହେଇଥିବା ନେଇ ଅପହରଣ ହୋଇଥିବା ସୁନୀଲଙ୍କ ସ୍ତ୍ରୀ ନିଜ ଅଭିଯୋଗ ପତ୍ରରେ ଦର୍ଶାଇଛନ୍ତି । ଏହାର ତଦନ୍ତ କରି ବିହିତ ପଦକ୍ଷେପ ଗ୍ରହଣ କରିବାକୁ ଏସପିଙ୍କୁ ନିବେଦନ କରିଥିବା ଜୋସ୍ନା ଗଣମାଧ୍ୟମ ପ୍ରତିନିଧିଙ୍କ ଠାରେ ପ୍ରକାଶ କରିଛନ୍ତି ।