17-Jul-2022

ଲୋଇସିଂହା (ବିନୋଦ କୁମାର ଦୀପ) ଗତକାଲି ରାତିରେ ବଲାଙ୍ଗୀର ଜିଲ୍ଲାର ବିଭିନ୍ନ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇଥିବା ଯୋଗୁଁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି l ବିଶେଷକରି ଗ୍ରାମାଞ୍ଚଳର ରାସ୍ତା ଗୁଡିକ ଜଳମଗ୍ନ ହେବା ସହିତ ଚାଷଜମି ଗୁଡିକ ପାଣି ଘେରରେ ରହିଛି l ଲୋଇସିଂହା ବ୍ଲକର ଆଭ୍ୟନ୍ତରୀଣ ରତାଖଣ୍ଡି

ପଂଚାୟତର ଦାଣ୍ଡପାଣି ଗ୍ରାମରୁ ତବଲବାଞ୍ଜି- ଗଡ଼ଶଙ୍କର ଡୁଙ୍ଗୁରିପାଲି-ବଲାଙ୍ଗୀରକୁ ସଂଯୋଗ କରୁଥିବା  ରାସ୍ତା ପ୍ରବଳ ବର୍ଷାରେ ଧୋଇ ହୋଇଯାଇଛି l ଫଳରେ ଏହି ରାସ୍ତା ଉପରେ ନିର୍ଭରଶୀଳ ଗ୍ରାମ ଗୁଡିକର ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି l ଅତି ବିପଦଶଙ୍କୁଳ ଅବସ୍ଥାରେ ସ୍ଥାନୀୟ ଲୋକେ ତଥା ଗୃହପାଳିତ ପଶୁ ଗୁଡିକ ରାସ୍ତା ପାର ହେଉଥିବା ଦେଖିବାକୁ ମିଳିଛି l ସେହିପରି ବଲାଙ୍ଗୀର ଜିଲ୍ଲା ପୂର୍ତ୍ତ ବିଭାଗ

ତରଫରୁ ଉପରବାହାଲ- ଫଲସାମାଲ ନିର୍ମାଣାଧୀନ ରାସ୍ତାରେ ଥିବା ପୋଲ ଗୁଡିକୁ ଭାଙ୍ଗି ଦିଆଯାଇଥିବାରୁ ଏବେ ବର୍ଷା ଦିନରେ ସ୍ଥାନୀୟ ବାସିନ୍ଦା ବେଶ ହଇରାଣ ହେଉଥିବା ଦେଖିବାକୁ ମିଳିଛି । ଅଧାପନ୍ତରିଆ ଅବସ୍ଥାରେ ପୁର୍ତ୍ତ ବିଭାଗ ରାସ୍ତା କାମ ବନ୍ଦ କରି ଦେଇଥିବାରୁ  ଏହି ରାସ୍ତାରେ ଚଳାଚଳ କରୁଥିବା ଏକମାତ୍ର ଘେରାଉ ବସସେବା ମଧ୍ୟ ବନ୍ଦ ହୋଇ ଯାଇଛି l ବଲାଙ୍ଗୀର ଜିଲ୍ଲାପାଳ ଏଥିପ୍ରତି ସ୍ଵତନ୍ତ୍ର ଭାବେ ଦୃଷ୍ଟିଦେଇ ପଦକ୍ଷେପ ନେବାକୁ ସାଧାରଣରେ  ଦାବି ହୋଇଛି l