24-Apr-2022

ବଲାଙ୍ଗିର,(ପ୍ରେରଣା ଖବର)- ବଲାଙ୍ଗିର ଏକ ପୁରୁଣା ସହର । ଏକଦା ଏଠାରେ ଶିକ୍ଷା ବ୍ୟବସ୍ଥା ଅନ୍ୟ ଅଂଚଳ ଅପେକ୍ଷା ଉନ୍ନତମାନର ଥିଲା । କିନ୍ତୁ ବର୍ତ୍ତମାନ ଶିକ୍ଷା ବ୍ୟବସ୍ଥା ସମ୍ପୁର୍ଣ୍ଣ ବ୍ୟପର୍ଯ୍ୟସ୍ତ । ଜୁଲାଇ ୧୯୪୪ ମସିହାରେ ଖୋଲିଥିବା ରାଜେନ୍ଦ୍ର ମହାବିଦ୍ୟାଳୟ, ବହୁ ବର୍ଷ ପରେ ଡିସେମ୍ବର ୨୦୧୯ ରେ ବିଶ୍ୱ ବିଦ୍ୟାଳୟ ମାନ୍ୟତା ପାଇ ଉନ୍ନତିକରଣ କରାଯାଇଥିଲା । କିନ୍ତୁ ଦୁଃଖର ବିଷୟ ଏହି ରାଜେନ୍ଦ୍ର ବିଶ୍ୱ ବିଦ୍ୟାଳୟରେ ୧୨୬ ଟି ଅଧ୍ୟାପକ ପଦବୀରୁ ମାତ୍ର ୩୧ ଜଣ ଅଛନ୍ତି । ଏବଂ ୧୫୦ ଜଣ ଅଣ ଶିକ୍ଷକ ପଦରୁ ମାତ୍ର ୯ ଜଣରେ କାମ ଚଳାଉଛନ୍ତି । ଆଗରୁ ଭାଇସ ଚାନସେଲରମାନଙ୍କର ଅଧ୍ୟାପକ ଓ କର୍ମଚାରୀ ମାନଙ୍କୁ  ନିଯୁକ୍ତି ଦେବାର କ୍ଷମତା ଥିଲା କିନ୍ତୁ ୨୦୧୯ ରୁ ଏହି କ୍ଷମତା ସରକାର ପ୍ରତ୍ୟାହୃତ କରିବା ଫଳରେ ରାଜ୍ୟରେ କେବଳ ଏହି ବିଶ୍ୱ ବିଦ୍ୟାଳୟରେ ବିଭିନ୍ନ ପଦବିକୁ ପୂରଣ କରାଯାଇପାରୁନାହିଁ । ଫଳରେ ଏଠାରେ ଘୋର ଆଂଚଳିକ ବୈଷମ୍ୟ ସୃଷ୍ଟି

 ହୋଇଛି ବୋଲି ବୁଦ୍ଧଜୀବୀ ମହଲରେ ପ୍ରତିକ୍ରିୟା ପ୍ରକାଶ ପାଉଛି । ପଶ୍ଚିମ ଓଡିଶା ଏକ ଅନ୍ୟତମ ପୁରାତନ ମହିଳା ମହାବିଦ୍ୟାଳୟ ଯାହାକି ୧୯୬୨ ମସିହାରେ ଖୋଳାଯାଇଥିଲା ତାର ମଧ୍ୟ ଅବସ୍ଥା ସାଂଘାତିକ । ଏଠାରେ ୨୩ ଜଣ ଅଧ୍ୟାପକ ମଧ୍ୟରୁ କେବଳ ୮ଜଣରେ କାମ ଚଳାଯାଉଛି । ସେହିପରି ଆଶ୍ଚର୍ଯ୍ୟର ବିଷୟ ଯେ,   ୨୦୧୫ ରୁ ଖୋଲାଯାଇଥିବା ମହିଳା ଯୁକ୍ତ ଦୁଇ ବିଜ୍ଞାନ କଲେଜରେ ଗୋଟିଏ ମଧ୍ୟ କର୍ମଚାରୀ ଏ ପର୍ଯ୍ୟନ୍ତ ନିଯୁକ୍ତି ହୋଇନାହାନ୍ତି ।  ବିଶ୍ୱ ବିଦ୍ୟାଳୟ ଓ ମହାବିଦ୍ୟାଳୟରେ ଦେଖାଣିଆ ଭାବେ ଅତିଥି ଶିକ୍ଷକମାନଙ୍କ ଦ୍ୱାରା ପାଠ ପଢା ଯାଉଛି । 
    ସେହିପରି କଲେଜ ଅଧିନରେ ବର୍ତ୍ତମାନ ୪୨ ଏକର ଜମି ଥିବା ବେଳେ ଅବଶିଷ୍ଟ ୬୦ ଏକରରୁ ଅଧିକ ଜବରଦଖଲରେ ଥିବାରୁ କଲେଜ ନାଁ ରେ ପାର୍ଚ୍ଚା କିମ୍ବା ସରକାରୀ ମାନଚିତ୍ରଟିଏ ମଧ୍ୟ ନାହିଁ । ଏ ସମ୍ବନ୍ଧରେ

ବଲାଙ୍ଗିର ନାଗରିକ କମିଟି ତରଫରୁ ମହାମହିମ ରାଜ୍ୟପାଳ, ମୁଖ୍ୟମନ୍ତ୍ରୀ, ମହାସଚିବ, ଶିକ୍ଷା ଓ ଉଚ୍ଚ ଶିକ୍ଷା ବିଭାଗ ମନ୍ତ୍ରୀ, ଭାଇସ ଚାନ୍‌ସେଲର ଓ  ବଲାଙ୍ଗିର ଜିଲ୍ଲାର ସମସ୍ତ ବିଧାୟକ ତଥା ସାଂସଦ ପ୍ରମୁଖଙ୍କୁ ଉକ୍ତ ସମସ୍ୟା ସମାଧାନ ପାଇଁ ଦାବିପତ୍ର ପ୍ରଦାନ କରାଯାଇଛି । 
    ଆହୁରି ରାଜେନ୍ଦ୍ର ବିଶ୍ୱ ବିଦ୍ୟାଳୟର ସ୍ନାତକୋତ୍ତର ଶ୍ରେଣୀରେ ସ୍ଥାନୀୟ ଛାତ୍ର ଛାତ୍ରୀମାନଙ୍କୁ ୫୦% ନାମଲେଖା ପାଇଁ ସଂରକ୍ଷଣ ବ୍ୟବସ୍ଥା ଦାବି କରିଛି । ଫଳରେ ଭବିଷ୍ୟତରେ ଏ ଅଂଚଳରୁ ଅଧ୍ୟାପକ ତଥା ମେଧାବୀ ଛାତ୍ରଛାତ୍ରୀ ସୃଷ୍ଟି ହେଲେ, ଅଧ୍ୟାପକ ପଦବୀ ପୁରଣ କରିବା ରେ ସାହାଯ୍ୟ କରିବ ବୋଲି ନାଗରିକ କମିଟି ତରଫରୁ ସଭାପତି  ଇଂ ବେଲାର ସିଂ ଭୋଇ ଓ ସାଧାରଣ ସଂପାଦକ ମନୋରଂଜ ସାହୁ ପ୍ରକାଶ କରି ସରକାର ଓ ପ୍ରଶାସନ ଉପରେ ଦାବି ଉପସ୍ଥାପନ କରିଛନ୍ତି ।