21-Mar-2022

ବଲାଙ୍ଗୀର,(ପ୍ରେରଣା ଖବର)-ବଲାଙ୍ଗୀର ସହରରେ ରାଜୁଡା ଅମଳରୁ ୧୭ଟି ବନ୍ଧକଟା ଖୋଳାଯାଇ ଲୋକଙ୍କ ଜଳସଂକଟ ଦୂର କରାଯାଉଥିଲା । ଏହି ବନ୍ଧଗୁଡିକରେ ଲୋକମାନେ ଗାଧୁଆପାଧୂଆ କରିବା ସହିତ ସେହି ବନ୍ଧର ପାଣିକୁ ପାନୀୟଜଳ ରୂପେ ବ୍ୟବହାର କରୁଥିଲେ । କିନ୍ତୁ ସ୍ୱାଧିନତା ପରେ ଏହାର ଆଉ ରକ୍ଷଣାବେକ୍ଷଣ କରାଗଲା ନାହିଁ । ବଲାଙ୍ଗୀର ପୌରପାଳିକା ଅଧିନରେ ଥିବା ଏହି ପୁସ୍କରିଣୀ ଗୁଡିକୁ ପୁନଃରୁଦ୍ଧାର କରିବାକୁ ଅନେକଥର ଆନ୍ଦୋଳନ ହୋଇଥିଲା । ୨୦୦୦ ମସିହାରେ ବଲାଙ୍ଗୀର ବିଧାୟକ ଅନଙ୍ଗଉଦୟ ସିଂଦେଓ ମନ୍ତ୍ରୀ ହେଲାପରେ କରଙ୍ଗାକଟା ବନ୍ଧର ଉନ୍ନତି ପାଇଁ ପଦକ୍ଷେପ ନେଲେ । ପ୍ରାୟ ୨.୫କୋଟି ଟଙ୍କା ଖର୍ଚ୍ଚକରି ଏହି ବନ୍ଧର ଉନ୍ନତିକରଣ କରାଗଲା । କିନ୍ତୁ କରଙ୍ଗାକଟା ବନ୍ଧର ମାଟିଉନ୍ନତିକରଣ ଠିକରେ କରାନଯିବାରୁ ସେହି ପ୍ରକଲ୍ପ ଫେଲ ମାରିଲା । କେବଳ ବାଡଦେବା ଓ କିଛି ସୌନ୍ଦର୍ଯ୍ୟକରଣ ଗଛରେ ଏହି ପ୍ରକଲ୍ପ ସୀମିତ ରହିଲା । ପୁଣି ୨୦୦୯ ମସିହାରେ ଆରଆରଆର ଯୋଜନାରେ କ୍ଷୁଦ୍ରଜଳସେଚନ ବିଭାଗ ତରଫରୁ ପ୍ରାୟ ୭କୋଟି ଟଙ୍କା ଖର୍ଚ୍ଚ କରାଯାଇ ବନ୍ଧଗୁଡିକର ପୁନଃରୁଦ୍ଧାର କାମ କରାଯାଇଥିଲା । କିନ୍ତୁ ତାହା ମଧ୍ୟ ସଫଳ ହୋଇନଥିଲା । ଲୋକଙ୍କ ସଚେତନତା ଅଭାବ ହେଉ କି ପ୍ରଶାସନିକ ଅବହେଳା କାରଣରୁ ବନ୍ଧଗୁଡିକର ଜଳ ବ୍ୟବହାର ଉପ ଯୋଗୀ ହୋଇପାରିଲା ନାହିଁ । ଏହି ପୁନଃରୁଦ୍ଧାର କାମରେ ବ୍ୟାପକ ଅନୀୟମିତତା କରାଯାଇଥିବା ଅଭିଯୋଗ ଉଠିଲା । ଅନଙ୍ଗଉଦୟ ସିଂଦେଓଙ୍କ ସମୟରେ ଏହି ବନ୍ଧଗୁଡିକର କାମ ତ ହୋଇପାରିଲା ନାହିଁ । ତେଣୁ ସେ ଲୋକଙ୍କ ଆକ୍ରୋସର ଶୀକାର ହେଲେ ଓ ୨୦୧୪ରେ ନରସିଂହ ବିଧାୟକ ହେଲେ । କିନ୍ତୁ ନରସିଂହ ମିଶ୍ର ବିଧାୟକ ହେବାର ଇତିମଧ୍ୟରେ ୮ବର୍ଷ ହୋଇଗଲା । କିନ୍ତୁ ଏହି ସମୟରେ ମଧ୍ୟ ବଲାଙ୍ଗୀର ସହରର ୧୭ଟିୁ ବନ୍ଧ ମଧ୍ୟରୁ ଗୋଟିଏ ମଧ୍ୟ ଲୋକଙ୍କ ବ୍ୟବହାର ଉପେଯାଗୀ ହୋଇପାରିଲା ନାହିଁ । ନରସିଂହ ମିଶ୍ର ଆସିଲା ପରେ ଅନେକଗୁଡିଏ ବିକାଶମୂଳକ କାମ ହୋଇଥିବା କଂଗ୍ରେସକର୍ମି ଦାବି କରୁଥିବା ବେଳେ ସେପଟେ ବନ୍ଧଗୁଡିକର ଅଭଳି ଅବସ୍ଥା ଦେଖିଲେ  ନେତାଙ୍କ ଅପାରଗତା ସ୍ପଷ୍ଟ ବାରିହୋଇ ପଡୁଛି । ବଲାଙ୍ଗୀର ସହରରେ ନରସିଂହବନ୍ଧ,କରଙ୍ଗକଟା ସହରର ମଧ୍ୟ ଭାଗରେ ଥିବା ବେଳେ ମହାରାଣୀ ସାଗର,ପ୍ରତାପସାଗରପଡା,ଗେଟସରୋବର,କନ୍ଧପାଲିବନ୍ଧ,ଜେଲବନ୍ଧ ଇତ୍ୟାଦି ବନ୍ଧ ମଧ୍ୟ ଅବହେଳିତ ହୋଇପଡିରହିଛି । ଗତ ୨୦୧୮

ମସିହାରେ କ୍ଷୁଦ୍ରଜଳସେଚନ ବିଭାଗ ତରଫରୁ ମହାରାଣୀ ସାଗର,ବେହେରାପାଲିବନ୍ଧ ଓ ଗେଟସରୋବର ବନ୍ଧର ଉନ୍ନତିକରଣ ପାଇଁ ପ୍ରାୟ ୩.୫କୋଟି ଖର୍ଚ୍ଚ କରାଯାଇଥିଲା । ଏହି ବନ୍ଧକାମରେ ବ୍ୟାପକ ଅନୀୟମିତତା କରାଯାଇଥିବା ଅଭିଯୋଗ ଉଠିଲା । ସେ ସମୟରେ ବଲାଙ୍ଗୀର ବିଧାୟକ ବିଧାନସଭାର ପବ୍ଲିକ ଆକାଉଣ୍ଟସ କମିର ଅଧ୍ୟକ୍ଷ ରହିଥିଲେ । ସେ ସମୟରେ ଏହି ବନ୍ଧକାମର ଅନୀୟମିତତା ତଦନ୍ତ ହେବ ବୋଲି ଆଶା କରାଯାଉଥିଲା । କିନ୍ତୁ ତାହା ହେଲାନାହିଁ । ଫଳରେ ବିଧାୟକଙ୍କ ପ୍ରତି ଜନଆକ୍ରୋସ ବଢିଲା । ସେପଟେ ୭୦ଏକର  ବିଶିଷ୍ଟ ମହାରାଣୀସାଗରର ସହ ଆଉ କେତେକ ବନ୍ଧର ଜଳ ବ୍ୟବହାର ଉପଯୋଗୀ ନୁହେଁ ବୋଲିପାଣି ଟେଷ୍ଟିଂରିପୋର୍ଟ ଆସିଛି । ଏହି ରିପୋର୍ଟ ପରେ କେନ୍ଦ୍ରର ନେସନାଲଗ୍ରୀନଟ୍ର‌୍ୟୁବୁନାଲର ଛାଟ ଆସିଛି । ରାଜ୍ୟସରକାରଙ୍କୁ ଏନଜିଟି ରିପୋର୍ଟ ତଲବ କରିଛି । ଏନଜିଟିର ଏହି ଛାଟପରେ ପ୍ରଶାସନର ଚେତା ପଶିଛି । ଏବେ ମହାରାଣି ସାଗରର ଉନ୍ନତି ପାଇଁ ୨୦କୋଟି ଟଙ୍କା ମଞ୍ଜୁର କରିଥିବା ଜଣାଯାଇଛି । ଠିକ ସେହିପରି କରଙ୍ଗାକଟା ବନ୍ଧର ଉନ୍ନତିକରଣ ପାଇଁ ମଧ୍ୟ ୧କୋଟିର ଅନୁଦାନ ଆସିଥିବା ସୂଚନା ମିଳିଛି । କିନ୍ତୁ ଏହିସବୁ କାମ କେତେ ସ୍ୱଚ୍ଛ ହେବ ଓ ବନ୍ଧକଟାର ପାଣି ବ୍ୟବହାର ଉପଯୋଗୀ ହେବ ତାହା ସନ୍ଦେହ ରହିଛି ।  ଏବେ ପୌରନିର୍ବାଚନ ବେଳେ କଂଗ୍ରେସ ଶାସକ ବିଜେଡିକୁ ବନ୍ଧକଟାର ପୁନଃରୁଦ୍ଧାର ନେଇ ଟାର୍ଗେଟ କରୁଥିବା ବେଳେ ନରସିଂହ ଗତ ୮ବର୍ଷ ହେଲା ବନ୍ଧଗୁଡିକର ଜଳକୁ ବ୍ୟବହାର ଉପଯୋଗୀ କରାଇପାରୁନଥିବା ନେଇ ପ୍ରଶ୍ନ ଉଠୁଛି ।