01-Mar-2022

ବଲାଙ୍ଗୀର,(ପ୍ରେରଣା ଖବର) ଗତକାଲି ସ୍ଥାନୀୟ ସରକାରୀ ବାଳିକା ଉଚ୍ଚବିଦ୍ୟାଳୟ ଠାରେ ବଲାଙ୍ଗୀର ଜିଲ୍ଲାର ପ୍ରଥମ ମହିଳା ମେଟ୍ରିକୁଲେଟ ସ୍ୱର୍ଗତ ଅଳକା ଜେନାଙ୍କ ଜନ୍ମ ଶତବାର୍ଷିକୀ ପାଳିତ ହୋଇଯାଇଛି । ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ଭାରତୀ ନନ୍ଦ ଙ୍କ ଆବାହକତ୍ୱରେ ଅନୁଷ୍ଠିତ ଏହି ଜୟନ୍ତୀ ସଭାରେ ସ୍କୁଲର ପୂର୍ବତନ ପ୍ରଧାନଶିକ୍ଷୟିତ୍ରୀ ଶ୍ରୀମତୀ ପଙ୍କଜିନୀ ବେହେରା, ସୋଭାଗିନୀ ପୂଜାରୀ, ଅବସରପ୍ରାପ୍ତ ଅଧ୍ୟକ୍ଷା ଡ. ଇତିଶ୍ରଦ୍ଧା ତ୍ରିପାଠୀ, ଅଜିତ କୁମାର ଜେନା ଓ ଶ୍ରୀମତୀ କବିତା ଜେନା ପ୍ରମୁଖ ମଂଚାସୀନ ରହି ଶିକ୍ଷା କ୍ଷେତ୍ରରେ ଅବହେଳିତ ବଲାଙ୍ଗୀର ଜିଲ୍ଲାରେ ନାରୀ ଶିକ୍ଷାର ପ୍ରସାର ପାଇଁ ସ୍ୱର୍ଗତ ଅଳକା ଜେନାଙ୍କ ମହନୀୟ ଅବଦାନ ସଂପର୍କରେ ଆଲୋକପାତ କରିଥିଲେ । ଏକଦା କେବଳ ବାଳକ ମାନଙ୍କ  ପାଇଁ ଉଦ୍ଦିଷ୍ଟ ଥିବା ପୃଥ୍ୱୀରାଜ ହାଇସ୍କୁଲରେ ଜଣେ ମାତ୍ର ବାଳିକା ଭାବରେ ଅଳକା ଜେନା ପଢ଼ିବାର ଅନୁମତି ପାଇବା ସହ ମେଟ୍ରିକ ପରୀକ୍ଷାରେ ଉର୍ତ୍ତୀର୍ଣ୍ଣ ହୋଇ ନିଜର ବିଚକ୍ଷଣ ପ୍ରତିଭାର ପରିଚୟ ଦେଇପାରିଥିଲେ ବୋଲି ବକ୍ତା ମାନେ ସ୍ମୃତିଚାରଣ କରିଥିଲେ ।କ୍ଲାସରୁମରେ ବହି ନଦେଖି ପ୍ରାଞ୍ଜଳ ଭାବରେ ପାଠପଢ଼ାଇ ପାରୁୁଥିବା ଅଳକା ଜେନା ଜଣେ ଆଦର୍ଶ ଶିକ୍ଷକ ଭବରେ 

ସବୁଦିନ ମନେ ରହିବେ । ଜଣେ ଆଦର୍ଶ ଶିକ୍ଷୟିତ୍ରୀ ଭାବେ ତାଙ୍କ ବ୍ୟକ୍ତିତ୍ୱ ସମସ୍ତଙ୍କୁ ପ୍ରଭାବିତ କରୁଥିଲା ବୋଲି ବକ୍ତା ମାନେ କହିଥିଲେ । ସ୍ୱର୍ଗତ ଅଳକା ଜେନାଙ୍କ ସାନ ଭାଇ ଅଜିତ କୁମାର ଜେନା ସ୍କୁଲ ଲାଇବ୍ରେରୀକୁ କିଛି ଉପାଦେୟ ବହି ପ୍ରଦାନ କରିବା ସହ ସ୍କୁଲ ଫଣ୍ଡକୁ ୨ଲକ୍ଷ ଟଙ୍କା ୩ଠହଜାର ଟଙ୍କାର ଏକ ଚେକ୍ ହସ୍ତାନ୍ତର କରିଥିଲେ ।  ପ୍ରତି ବର୍ଷ ମେଟ୍ରିକ ପରୀକ୍ଷାରେ ସର୍ବୋଚ୍ଚ ନମ୍ବର ରଖିଥିବା ଜଣେ ମେଧାବୀ ଛାତ୍ରୀଙ୍କ ଉଦ୍ଦେଶ୍ୟରେ ଏହି ଜମା ରାଶିର କିଛି ଅଂଶକୁ ପ୍ରୋତ୍ସାହନ ରାଶି ଭାବେ ପ୍ରଦାନ କରାଯିବ  ବୋଲି ନିଷ୍ପତ୍ତି ହୋଇଥିଲା । ସଭା ପ୍ରାରମ୍ଭରେ ଛାତ୍ରୀ ପ୍ରଶଂସା ରଣା ସ୍ୱାଗତ ସଙ୍ଗୀତ ପରିବେଷଣ କରିଥିଲେ । ସଭାକୁ ଶିକ୍ଷୟିତ୍ରୀ ନୂତନ ନାୟକ ଓ ଯାଜ୍ଞସେନୀ ମହାପାତ୍ର ସଂଯୋଜନା କରିଥିଲେ । ଶେଷରେ ଶିକ୍ଷୟିତ୍ରୀ ସୁଷମା ଉଦ୍‌ଗାତା ଧନ୍ୟବାଦ ଅର୍ପଣ କରିଥିଲେ । ଏହି ସଭାରେ ସରକାରୀ ବାଳିକା ଉଚ୍ଚବିଦ୍ୟାଳୟର ସମସ୍ତ ଶିକ୍ଷୟିତ୍ରୀ, ଛାତ୍ରୀ, ପୂରାତନ ଛାତ୍ରୀ ମାନେ ଯୋଗ ଦେଇଥିଲେ ।