09-Nov-2020

ବଲାଙ୍ଗୀର, (ପ୍ରେରଣା ଖବର) : ମଦ ପିଇବା ପାଇଁ ଟଙ୍କା ମାଗିବା ନ ଦେବାରୁ ଜବର ଦସ୍ତ ଦୁର୍ବୃତ୍ତ ଲୁଟ୍‍ପାଟ୍‍ କରିବା ଘଟଣା  ନେଇ ଥାନାରେ ଅଭିଯୋଗ ହୋଇଛି। ଏପରି ଏକ ଘଟଣା ବଲାଙ୍ଗିର କଂସାରୀପଡ଼ା ଅଞ୍ଚଳରେ ଘଟିଥିବା ଦେଖାଯାଇଛି।  
ଉତ୍ତରପ୍ରଦେଶ ଅଞ୍ଚଳରୁ ଦୀର୍ଘ ବର୍ଷ ହେଲା ବଲାଙ୍ଗିର ଆସି ଏଠାରେ ସିଲିଂ ମିସ୍ତ୍ରୀ ଭାବେ କାମ କରନ୍ତି ବିରେନ୍ଦ୍ର କୁମାର। ଶ୍ରୀ କୁମାର କଂସାରୀପଡ଼ା ନିକଟ ଧୋବା ପଡ଼ାରେ ଘର କରି ପରିବାର ସହ ରହୁଛନ୍ତି। ସେ ବର୍ତ୍ତମାନ ବଲାଙ୍ଗିରର ବାସିନ୍ଦା ହେଇ ସାରିଲେଣି। ଶୁକ୍ରବାର ସେ ରାମେଶ୍ୱର ନଗରକୁ ବକେୟା ଟଙ୍କା ଆଣିବାକୁ ଯାଇଥିଲେ। ତାଙ୍କ ପର୍ସରେ ୨୫ ହଜାର ଟଙ୍କା ରହିଥିଲା। ରାତି ପ୍ରାୟ ସାଢେ ୭ଟା ବେଳେ ବଜାରରୁ କାମ ସାରି ସେ ଘରେ ପହଞ୍ଚିଥିଲେ। ତାଙ୍କ ପୁଅ, ଝିଅ ଖାଇବା ପାଇଁ କିଛି ବଜାରରୁ ଆଣିବା ପାଇଁ ଶ୍ରୀ କୁମାରଙ୍କ ନିକଟରେ ଅଳି କରିବାରୁ ସେ ଘର ଭିତରକୁ ନଯାଇ ବାହାରୁ ବାହାରୁ ବଜାରକୁ ପୁଣି ଆସୁଥିଲେ। ନିକଟରେ ଥିବା ଏକ ବନ୍ଧରେ କିଛି ଯୁବକ ବସିଥିଲେ। ଜଣେ ଯୁବକ ତାଙ୍କ ପାଖକୁ ଆସି ମଦ ପିଇବା ପାଇଁ ଖର୍ଚ୍ଚ ଦେବାକୁ କହିଥିଲେ। ପାଖରେ ଟଙ୍କା ନାହିଁ, ୨/୩ ଦିନ ପରେ ଦେବି ବୋଲି ଶ୍ରୀ କୁମାର କହିବା ପରେ ଯୁବକଜଣଙ୍କ ଅନ୍ୟ ୪/୫ଜଣ ସହଯୋଗୀଙ୍କୁ ଡାକିଥିଲେ। ସେମାନେ ଲୁହା ପାଇପରେ ପିଟିଥିଲେ। ସେ ନାଳରେ ପଡ଼ିଯିବା ପରେ ତାଙ୍କ ପର୍ସ ଓ ବେକରେ ପିନ୍ଧିଥିବା ଲକେଟ ଲୁଟି ନେଇ ଚାଲି ଯାଇଥିଲେ ଯୁବକମାନେ। ଏସଂପର୍କରେ ଶ୍ରୀ କୁମାର ଟାଉନ୍‍ ଥାନାରେ ଅଭିଯୋଗ କରିଥିଲେ। ଆକ୍ରମଣକାରୀ ଯୁବକଙ୍କୁ ଖୋଜିବାକୁ ପୁଲିସ ଆସିଥିଲା। କାହାକୁ ନପାଇ ଫେରି ଯାଇଥିଲା। ଏହି ଲୁଟ୍‍ରେ ସଂପୃକ୍ତ ଯୁବକମାନଙ୍କୁ ଗିରଫ କରିବା ସହ ତାଙ୍କୁ ଟଙ୍କା ଓ ସୁନା ଲକେଟ ଫେରାଇବାକୁ ପୁଲିସକୁ ଅନୁରୋଧ କରିଛନ୍ତି ଶ୍ରୀ କୁମାର। ଟାଉନ୍‍ ଥାନା ଆଇଆଇସି ସଂଗ୍ରାମ ପଟ୍ଟନାୟକ ସୂଚନା ଦେଇଛନ୍ତି ଯେ, ପୁଲିସ ଅଭିଯୋଗର ସତ୍ୟତା ଯାଞ୍ଚ କରିବା ସହ ଲୁଟ୍‍ପାଟ କରିଥିବା ଯୁବକଙ୍କୁ ନେଇ ଉପଯୁକ୍ତ ତଦନ୍ତ ଆରମ୍ଭ କରିଛନ୍ତି