03-Dec-2021

କଟକ: ‘ଓମିକ୍ରନ୍’କୁ ନେଇ ବିଶ୍ବବ୍ୟାପୀ ଏବେ ଆତଙ୍କ। ଏଭଳି ସମୟରେ ଗତ ୫ଦିନ ଭିତରେ କଟକ ଜିଲ୍ଲାକୁ ୧୯୨ଜଣ ବିଦେଶ ଫେରନ୍ତା ଆସିଥିବା ଜଣାପଡିଛି। ସେମାନଙ୍କ ତଥ୍ୟ ଆଜି ସଂଧ୍ୟାରେ ଜିଲ୍ଲାପ୍ରଶାସନ ପାଖରେ ପହଞ୍ଚିଥିବା ବେଳେ ସମସ୍ତ ଫେରନ୍ତାଙ୍କ ରିପୋର୍ଟ ନେଗେଟିଭ୍‌ ଥିବା ସହକାରୀ ଜିଲ୍ଲାପାଳ ଅଳକା ରାଣୀ ପଣ୍ଡା ସୂଚନା ଦେଇଛନ୍ତି। ତେବେ ଉକ୍ତ ୧୯୨ଜଣ କେଉଁ କେଉଁ ଦେଶରୁ ଆସିଛନ୍ତି ଓ ସେମାନଙ୍କ ଘର ଜିଲ୍ଲାର କେଉଁ କେଉଁ ଅଞ୍ଚଳରେ ସେ ସଂପର୍କରେ ପ୍ରଶାସନ ପକ୍ଷରୁ ତର୍ଜମା ଆରମ୍ଭ ହୋଇଛି। ଉକ୍ତ ୧୯୨ଜଣଙ୍କ ମଧ୍ୟରୁ ଦକ୍ଷିଣ ଆଫ୍ରିକାରୁ କେହି ବିଦେଶ ଫେରନ୍ତା ଆସିଛନ୍ତି ନା ନାହିଁ ସେ ସଂପର୍କରେ ପ୍ରଶାସନ ଯଦିଓ ନିର୍ଦ୍ଦିଷ୍ଟଭାବେ ସୂଚନା ଦେଇନି ତଥାପି ସମସ୍ତଙ୍କ ତଥ୍ୟ ପ୍ରଶାସନ ପାଖରେ ରହିଥିବା ସହରକାରୀ ଜିଲ୍ଲାପାଳ ସୂଚନା ଦେଇଛନ୍ତି।

୨୭ ତାରିଖରୁ ଗତକାଲି ସୁଦ୍ଧା ୧୯୨ ଜଣ କଟକ ଆସିଛନ୍ତି। ଏ ନେଇ ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ସଜାଗ ରହିଛି। ଅନ୍ୟପଟେ ଆଜି କଟକ ଜିଲ୍ଲାରୁ ୧୯ ଜଣ ସଂକ୍ରମିତ ଚିହ୍ନଟ ହୋଇଛନ୍ତି। କଟକ ଜିଲ୍ଲାରେ ୪୮୯୦ ନମୁନା ପରୀକ୍ଷା କରାଯାଇଥିଲା ଓ ଜିଲ୍ଲାର ସଂକ୍ରମଣ ହାର ୦.୩୯ ପ୍ରତିଶତ ରହିଥିବା ରାଜ୍ୟ କୋଭିଡ୍‌ ଡାଟା ବେସ୍‌ ତଥ୍ୟ କହୁଛି।