15-Jun-2021

କଳାହାଣ୍ଡି, ଧର୍ମଗଡ଼(ଜ୍ୟୋତିରଞ୍ଜନ ବେମାଲ): ଦିନ ଥିଲା ଏକାଏକା  ପ୍ରତିପୋଷଣ ଦାୟିତ୍ୱ  ନିଜ କାନ୍ଧରେ  ନେଇ ବେଶ ସୁରୁଖୁରୁରେ ଚଳାଉଥିଲେ ପରିବାର । ହେଲେ ହଠାତ ସମୟ ବଦଳିଯିବ କେବେ କଳ୍ପନା କରି ନ ଥିଲେ । ଯେଉଁ ପରିବାର ତାଙ୍କ ଅକ୍ଲାନ୍ତ ପରିଶ୍ରମର ସାହାରା ପାଲଟି ଥିଲା ଏବେ ସେ ପରିବାରରେ ବୋଝ ପାଲଟି ଗଲେ।ଏବେ ବେସାହାରା ହୋଇ ସାହାରା ଖୋଜି ବୁଲୁଛି ଦୁର୍ବଳ ।

     ଆମେ କହୁଛୁ କଳାହାଣ୍ଡି ଜିଲ୍ଲା ଧର୍ମଗଡ଼ ବ୍ଲକ ଗୋଇନ୍ଟା ପଡାର  ଦୁର୍ବଳ ଗଇତାଙ୍କ କଥା। ଗତ ବର୍ଷ ସେପ୍ଟେମ୍ବର ମାସ ୧୧ ତାରିଖ ଦିନର ଘଟଣା। ହଠାତ ପରିବାର ପାଖକୁ ଖବର ପହଞ୍ଚିଥିଲା ପଥର ବ୍ଲାଷ୍ଟିଂ ରେ ଦୁର୍ବଳ ଗୁରୁତର । ପରିବାର ଉପରେ ଚଡକ ପଡିଲା।ଏଆଡୁ ସେଆଡୁ  ଗାଡି ଯୋଗାଡ଼ କରି  ଘଟଣାସ୍ଥଳକୁ ପହଞ୍ଚି ଥିଲେ।ହେଲେ ରକ୍ତ ଜୁଡୁବୁଡୁ  ଗୁରୁତର ଅବସ୍ଥାରେ ପଡିରହିଥିବା ଦୁର୍ବଳକୁ ନିଆଗଲା ଡାକ୍ତର ଖାନା।ଧର୍ମଗଡ଼, ଭବାନୀପାଟଣା ପରେ ବୁର୍ଲା ମେଡ଼ିକାଲରେ ଭର୍ତ୍ତି କରାଗଲା।ସେଠାରେ ତାଙ୍କୁ  ଅପରେସନ କରାଯାଇ ଶେଷରେ ଗୋଡ଼ କଟା ଗଲା।ସେହି ଦିନ ଠୁ ପରିବାର ଉପରେ ବଡ଼ ଦୁର୍ଦଶା ଆରମ୍ଭ ହେଲା।ପରିବାରରେ ଏକ ମାତ୍ର ଦୁର୍ବଳ ଉପରେ ନିର୍ଭର ହୋଇ ପ୍ରତିପାଦିତ ହେଉଥିବା ବେଳେ ଏବେ ଶଯ୍ୟାଶାୟୀ ହୋଇ ଏକ ପ୍ରକାର ପଙ୍ଗୁ ପାଲଟି ଯାଇଛି ଦୁର୍ବଳ।ଦୁର୍ଦଶା ଦିନ କୁ ଦିନ ଚରମ ସୀମା ରେ ପହଂଚି ଗଲା l ଶେଷରେ ନିଜ ବଡ଼ ଝିଅ କୁ ଅର୍ଥ ଅଭାବରୁ ଚିକିତ୍ସା କରାଇ ନପାରି ହରାଇ ବସିଲେ।ଏଣେ ଜଣେ ସାଧାରଣ ଶ୍ରମିକକୁ ବେଆଇନ ଭାବେ ବ୍ଲାଷ୍ଟିଂ କାମରେ ନିୟୋଜିତ କରାଇ ଥିବା କ୍ରସରମାଲିକ ସହାୟତା ପ୍ରତିଶୃତି ଦେଇଥିଲେ ହେ ବର୍ତ୍ତମାନ ସୁଦ୍ଧା ଦେଖାଦେଉନ ଥିବା ଓ ଫୋନ କଲେ ମଧ୍ୟ ଗ୍ରହଣ କରୁନ ଥିବା ଅଭିଯୋଗ କରନ୍ତି ପରିବାର ଲୋକେ।ସୂଚନା ଯେ,ବହୁଦିନ ଧରି ଦୁର୍ବଳ ଗୋଳାମୁଣ୍ଡା ବ୍ଲକ ତୁମ୍ରା ସ୍ଥିତ ଏକ କ୍ରସରରେ ଶ୍ରମିକ ଭାବେ ନିୟୋଜିତ ହୋଇଥିଲେ। ତେବେ କ୍ରସର ମାଲିକ ରାଜ କୁମାର ନାଏକ ଗତ ସେପ୍ଟେମ୍ବର ୧୧ ତାରିଖ ରେ  ପଥର ବ୍ଲାଷ୍ଟିଂ କରିବା କାର୍ଯ୍ୟରେ ନିୟୋଜିତ କରିଥିଲେ।ତେବେ ଦୁର୍ଘଟଣା ପରେ ପରିବାର ଙ୍କୁ ସବୁ ପ୍ରକାର ସୁବିଧା ଯୋଗାଇ ଦେବାକୁ ମାଲିକ କଥା ଦେଇଥିବା ବେଳେ  ଦୀର୍ଘ ୧୦ମାସ ବିତିଯାଇଥିଲେ ହେ ମାଲିକ ଧରାଛୁଆଁ ଦେଉ ନାହାନ୍ତି l ତୁରନ୍ତ ଜିଲ୍ଲା ପ୍ରଶାସନ ଦୁର୍ବଳଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଅଂଚଳବାସୀଙ୍କ ତରଫରୁ ଦାବି ହେଉଛି।