31-Jul-2026

ଟିଟିଲାଗଡ: ଟିଟିଲାଗଡ ବ୍ଲକ ଶିକ୍ଷା ଅଧିକାରୀ (ବିଇଓ)ଙ୍କ ସ୍ଥାୟୀ ନିଯୁକ୍ତି ନ ଥିବାରୁ କାର୍ଯ୍ୟାଳୟରେ ପ୍ରଶାସନିକ କାର୍ଯ୍ୟ ବ୍ୟାହତ ହେଉଥିବା ଅଭିଯୋଗ ଉଠିଛି।ବର୍ତ୍ତମାନ ପୁଇଁତଲା ବ୍ଲକର ବିଇଓ ଟିଟିଲାଗଡର ଇନ୍-ଚାର୍ଜ ଭାବେ ଦାୟିତ୍ୱ ତୁଲାଉଥିବା ବେଳେ, ପୁଇଁତଲା ଓ ଟିଟିଲାଗଡ ମଧ୍ୟରେ ପ୍ରାୟ ୭୦ କିଲୋମିଟର ଦୂରତା ଥିବାରୁ ଦୈନନ୍ଦିନ ପ୍ରଶାସନିକ କାର୍ଯ୍ୟରେ ବିଭିନ୍ନ ସମସ୍ୟା ସୃଷ୍ଟି ହେଉଥିବା କୁହାଯାଉଛି।
ସୂଚନା ଅନୁସାରେ,ଗୁରୁତ୍ୱପୂର୍ଣ୍ଣ ଫାଇଲରେ ଦସ୍ତଖତ କିମ୍ବା ଅନୁମୋଦନ ପାଇଁ ଟିଟିଲାଗଡ ବିଇଓ କାର୍ଯ୍ୟାଳୟର ଏବିଇଓ ଓ ଅନ୍ୟ କର୍ମଚାରୀମାନଙ୍କୁ ବାରମ୍ବାର ପୁଇଁତଲା ବିଇଓ କାର୍ଯ୍ୟାଳୟକୁ ଯିବାକୁ ପଡୁଛି।ଫଳରେ କାର୍ଯ୍ୟାଳୟର ଦୈନନ୍ଦିନ କାମ ପ୍ରଭାବିତ ହେଉଥିବା ଅଭିଯୋଗ ହେଉଛି।
କାର୍ଯ୍ୟାଳୟରେ କାର୍ଯ୍ୟରତ ଜଣେ ଚୁକ୍ତିଭିତ୍ତିକ ଡାଟା ଏଣ୍ଟ୍ରି ଅପରେଟର,ଯିଏ ଇସ୍ୟୁ ଆଣ୍ଡ ଡେସ୍ପାଚ ଶାଖାର ଦାୟିତ୍ୱ ମଧ୍ୟ ତୁଲାଉଛନ୍ତି।ସେ ନିଜର ମୂଳ କାର୍ଯ୍ୟ ସହ ବାରମ୍ବାର ପୁଇଁତଲା କାର୍ଯ୍ୟାଳୟକୁ ଯିବାକୁ ପଡୁଥିବା କହିଛନ୍ତି।ସେହିପରି ଜଣେ ଜୁନିଅର ଆସିଷ୍ଟାଣ୍ଟ ମଧ୍ୟ କାର୍ଯ୍ୟାଳୟ କାମରେ ସମୟ ସମୟରେ ପୁଇଁତଲା ଯାଉଥିବା ସୂଚନା ମିଳିଛି।
ଅନ୍ୟପକ୍ଷରେ,ସ୍ଥାୟୀ ବିଇଓ ନ ଥିବାର ସୁଯୋଗରେ କେତେକ କର୍ମଚାରୀ କାର୍ଯ୍ୟ ସମୟ ଶେଷ ହେବା ପୂର୍ବରୁ କାର୍ଯ୍ୟାଳୟ ଛାଡ଼ି ବଲାଙ୍ଗିର ଯାଉଥିବା ନେଇ ସ୍ଥାନୀୟ ସ୍ତରରେ ଚର୍ଚ୍ଚା ହେଉଛି। 
ଏହାଛଡ଼ା,କାର୍ଯ୍ୟାଳୟରେ କାର୍ଯ୍ୟରତ ଜଣେ ଚୁକ୍ତିଭିତ୍ତିକ କର୍ମଚାରୀ ବିନା ଅନୁମତିରେ ଶିକ୍ଷା ଅଧିକାରୀଙ୍କ ସରକାରୀ ଜରାଜୀର୍ଣ୍ଣ ବାସଗୃହରେ ରହୁଥିବା ଅଭିଯୋଗ ମଧ୍ୟ ସାମ୍ନାକୁ ଆସିଛି।ସମ୍ପୃକ୍ତ କର୍ମଚାରୀ ନିଜ ଖର୍ଚ୍ଚରେ ବାସଗୃହର ମରାମତି କରି ସେଠାରେ ପରିବାର ସହ ରହୁଥିବା କହିଥିବା ବେଳେ,ଯଦି ବାସଗୃହଟି ପ୍ରକୃତରେ ଜରାଜୀର୍ଣ୍ଣ ଥିଲା,ତେବେ ଏହା ବାସଯୋଗ୍ୟ ବୋଲି କୌଣସି ସୁରକ୍ଷା ପ୍ରମାଣପତ୍ର ମିଳିଥିଲା କି ନାହିଁ,ତାହା ତଦନ୍ତ ସାପେକ୍ଷ।ସେ ପ୍ରାୟ ଦୁଇ

ବର୍ଷରୁ ଉର୍ଦ୍ଧ୍ବ ସମୟ ଏହି କ୍ୱାର୍ଟର ରେ ରହୁଥିବା ବେଳେ ଘର ଭଡ଼ା,ବିଦ୍ୟୁତ୍ ବିଲ୍ ଏବଂ ପାଣି ବିଲ୍ କାହାକୁ ଦେଉଛନ୍ତି ଜଣାପଡ଼ିନାହିଁ।ଯଦି ଗୃହ ର ଭଡ଼ା ନ ଦେଇ ରହୁଛନ୍ତି ତେବେ ସରକାରୀ ରାଜସ୍ୱ କ୍ଷତି ହେଉ ନାହିଁ କି ବୋଲି ଚର୍ଚ୍ଚା ହେଉଛି।ଏ କ୍ଷତି କିଏ ବହନ କରିବ।
ସେହିପରି କାର୍ଯ୍ୟାଳୟର ଏବିଇଓ ପ୍ରତିଦିନ ନୂଆପଡ଼ା ଜିଲ୍ଲାର ସିନାପାଲି ଅଞ୍ଚଳରୁ ଯାତାୟାତ କରୁଥିବା ସୂଚନା ମିଳିଛି।ଏଭଳି ପରିସ୍ଥିତିରେ ଟିଟିଲାଗଡ ବିଇଓ କାର୍ଯ୍ୟାଳୟର ପ୍ରଶାସନିକ ପରିଚାଳନା ନେଇ ସାଧାରଣରେ ପ୍ରଶ୍ନ ଉଠୁଛି।
ସ୍ଥାନୀୟ ଶିକ୍ଷାବିତ୍ ଓ ସଚେତନ ମହଲର ମତ,ଜିଲ୍ଲା ଶିକ୍ଷା ଅଧିକାରୀ ଏହି ସମସ୍ତ ବିଷୟର ତଦନ୍ତ କରି ଆବଶ୍ୟକ ପଦକ୍ଷେପ ନେଲେ କାର୍ଯ୍ୟାଳୟର ପ୍ରଶାସନିକ ବ୍ୟବସ୍ଥାରେ ସୁଧାର ଆସିପାରିବ।ତେବେ ଏହି ଅଭିଯୋଗଗୁଡ଼ିକ ସମ୍ପର୍କରେ ସମ୍ପୃକ୍ତ ଅଧିକାରୀମାନଙ୍କ ପ୍ରତିକ୍ରିୟା ମିଳିପାରିନାହିଁ।