01-Aug-2026

ସୋନପୁର (ମନୋରଞ୍ଜନ ତ୍ରିପାଠୀ )ଭାରତ ବିକାଶ ପରିଷଦ, ସୋନପୁର ଶାଖା ପକ୍ଷରୁ ଏକ ଅଭିନବ  କାର୍ଯ୍ୟକ୍ରମର ଆୟୋଜନ କରାଯାଇ ଅବସର କାଳୀନ ସମାରୋହକୁ ପରିବେଶ ସୁରକ୍ଷା ସହ ଯୋଡ଼ାଯାଇଛି। ଶାଖାର ସକ୍ରିୟ ସଦସ୍ୟ ଶ୍ରୀ କୃଷ୍ଣଚନ୍ଦ୍ର ସେନାପତି ନିଜର ଚାକିରି ଜୀବନରୁ ଅବସର ଗ୍ରହଣ ଅବସରରେ ବୃକ୍ଷରୋପଣ କରି ଏକ ନୂତନ ସାମାଜିକ ପରମ୍ପରାର ଶୁଭାରମ୍ଭ କରିଛନ୍ତି।
ସାଧାରଣତଃ ଜନ୍ମଦିନ, ବିବାହ ବାର୍ଷିକୀ ଓ ଅନ୍ୟାନ୍ୟ ଶୁଭ ଅବସରରେ ବୃକ୍ଷରୋପଣ କରାଯାଉଥିବାବେଳେ ଚାକିରିରୁ ଅବସର ଗ୍ରହଣ ଦିବସକୁ ବୃକ୍ଷରୋପଣ ସହ ଯୋଡ଼ିବା ଏକ ନିଆରା ପ୍ରୟାସ। ଏହା କେବଳ ପରିବେଶ ସୁରକ୍ଷା ପ୍ରତି ଦାୟିତ୍ୱବୋଧର ପରିଚୟ ନୁହେଁ, ବରଂ ଆଗାମୀ ପିଢ଼ି ପାଇଁ ଏକ ସବୁଜ ବାର୍ତ୍ତା ଛାଡ଼ିଯିବାର ଉତ୍କୃଷ୍ଟ ଉଦାହରଣ।
ଭାରତ ବିକାଶ ପରିଷଦ, ଓଡ଼ିଶା ପଶ୍ଚିମ ପ୍ରାନ୍ତର ମହାସଚିବ ଶ୍ରୀ ଦୁର୍ଯ୍ୟୋଧନ ସାହୁଙ୍କ ମାର୍ଗଦର୍ଶନରେ ଆୟୋଜିତ ଏହି କାର୍ଯ୍ୟକ୍ରମରେ ଶ୍ରୀ ସେନାପତି ବୃକ୍ଷରୋପଣ କରି ସମାଜକୁ ପରିବେଶ ସୁରକ୍ଷାର ସନ୍ଦେଶ ପ୍ରଦାନ କରିଥିଲେ। ଏହି ପଦକ୍ଷେପ ମାଧ୍ୟମରେ ‘ସଂସ୍କାର’ ଓ ‘ପରିବେଶ’କୁ ଏକତ୍ରିତ କରି ସାମାଜିକ ଜୀବନରେ ଏକ ସକାରାତ୍ମକ ପରମ୍ପରାର ଭିତ୍ତି ସ୍ଥାପନ କରାଯାଇଛି।
ଏହି ଅବସରରେ ଉପସ୍ଥିତ ପରିଷଦର ସଦସ୍ୟମାନେ ଭବିଷ୍ୟତରେ ଶାଖାର ପ୍ରତ୍ୟେକ ସଦସ୍ୟଙ୍କ ଅବସର କାଳୀନ ସମାରୋହରେ ବୃକ୍ଷରୋପଣକୁ ଏକ ସ୍ଥାୟୀ ପରମ୍ପରା ଭାବେ ପାଳନ କରିବା ପାଇଁ ସଂକଳ୍ପ ଗ୍ରହଣ କରିଥିଲେ।
ଭାରତ ବିକାଶ ପରିଷଦର ଏହି ଅଭିନବ ପ୍ରୟାସ ସମାଜରେ ପରିବେଶ ସୁରକ୍ଷା ପ୍ରତି ସଚେତନତା ବୃଦ୍ଧି କରିବା ସହିତ ଅନ୍ୟ ସାମାଜିକ ଅନୁଷ୍ଠାନଗୁଡ଼ିକ ପାଇଁ ମଧ୍ୟ ଏକ ଉଦାହରଣ ଅଟେ l