11-Jun-2021

ବଲାଙ୍ଗିର,(ପ୍ରେରଣା ଖବର)- ଆଜି ପଶ୍ଚିମ ଓଡିଶା ବିକାଶ ପରିଷଦ ଅଞ୍ଚଳରେ ଥିବା ୧୧ଟି ଜିଲ୍ଲା କୋଭିଡ୍ ପରିଚାଳନା ତଥା ସଂକ୍ରମଣ ରୋକିବା ପାଇଁ ପଶ୍ଚିମ ଓଡିଶା ବିକାଶ ପରିଷଦ ତରଫରୁ ବଲାଙ୍ଗିର ପାଇଁ ୩କୋଟି ଟଙ୍କାର ବିଭିନ୍ନ ଚିକିତ୍ସା ଉପକରଣ କୋଭିଡ୍ ସହାୟତା ଭାବରେ ମାନ୍ୟବର ମୁଖ୍ୟମନ୍ତ୍ରୀ ଭିଡିଓ କନ୍‌ଫରେନ୍ସିଂ ମାଧ୍ୟମରେ ଲୋକାର୍ପଣ କରିଛନ୍ତି । ଲୋକାର୍ପଣ ଉତ୍ସବରେ ଜିଲ୍ଲାର ସମସ୍ତ ବିଧାୟକ, ସାଂସଦ ତଥା ମନ୍ତ୍ରୀ ଟୁକୁନି ସାହୁ ଉପସ୍ଥିତ ଥିଲେ । ଜିଲ୍ଲାପାଳ ଚଞ୍ଚଳ ରାଣାଙ୍କ ଉପସ୍ଥିତିରେ ଜିଲ୍ଲାପାଳ କାର୍ଯ୍ୟାଳୟର ସମ୍ମିଳନୀ କକ୍ଷରେ ବଲାଙ୍ଗିର ବିଧାୟକ ନରସିଂହ ମିଶ୍ର ଯୋଗ ଦେଇ ଏହି କାର୍ଯ୍ୟକ୍ରମକୁ କାମ କମ୍ ଆଡମ୍ବର ବେଶି ବୋଲି କହିଛନ୍ତି । ସେ ନିଜ ବକ୍ତବ୍ୟରେ କହିଛନ୍ତି ଯେ ୧୧ଟି ଜିଲ୍ଲା ପାଇଁ ୨୫କୋଟି, ଯେଉଁଥିରୁ କି ବଲାଙ୍ଗିର ପାଇଁ ୩ କୋଟି ଟଙ୍କା କୋଭିଡ୍ ସହାୟତାକୁ ମୁଖ୍ୟମନ୍ତ୍ରୀ ଏତେ ଆଡମ୍ବରପୂର୍ଣ୍ଣ ଭାବରେ ଲୋକାର୍ପଣ କରିବା ତାଙ୍କର ଗାରିମା କ୍ଷୁର୍ଣ୍ଣ କରୁଛି । ପୁଣି ଏହି ୨୫କୋଟି ଟଙ୍କା ପଶ୍ଚିମ ଓଡିଶା ବିକାଶ ପରିଷଦ ପାଣ୍ଠିର । ଯଦି ଏହି କୋଭିଡ୍ ସହାୟତା ବିକାଶ ପରିଷଦ ଅଞ୍ଚଳର ବାହାରେ ଆଉ କୌଣସି ଜିଲ୍ଲାରେ କରାଯାଉ ନାହିଁ , ତେବେ ଏହା ଆମ ଅଞ୍ଚଳ ଲୋକଙ୍କୁ କିଛି ମାତ୍ରାରେ ଅସ୍ୱସ୍ଥି ଦେଇପାରେ ଏବଂ ଯଦି ଏହି କୋଭିଡ୍ ସହାୟତା ଅନ୍ୟ ଜିଲ୍ଲା ମାନଙ୍କରେ ସରକାର ପ୍ରଦାନ କରୁଛନ୍ତି ଓ ପଶ୍ଚିମାଞ୍ଚଳରେ ପଶ୍ଚିମ ଓଡିଶା ବିକାଶ ପରିଷଦ ପାଣ୍ଠି କରୁଛି ,  ତେବେ ଏହା ଆମ ଅଞ୍ଚଳର ଲୋକଙ୍କ ପାଇଁ କ୍ଷତି ଅଟେ । କାରଣ ପଶ୍ଚିମ ଓଡିଶା ବିକାଶ ପରିଷଦ ଅଞ୍ଚଳରେ ଅନେକ ପଛୁଆ ଜିଲ୍ଲା ଅଛି , ଯେଉଁ ଠାରେ କି ଏହି ପାଣ୍ଠିରୁ ଖର୍ଚ୍ଚ ହୋଇଥାନ୍ତା ।

ତେଣୁ ରାଜ୍ୟ ସରକାର ଅଲଗା ଜିଲ୍ଲାମାନଙ୍କରେ ଯେପରି ନିଜ ପାଣ୍ଠିରୁ କୋଭିଡ୍ ପରିଚାଳନା ପାଇଁ ଅନୁଦାନ ଦେଉଛନ୍ତି ସେଭଳି ପଶ୍ଚିମାଞ୍ଚଳ ଜିଲ୍ଲାମାନଙ୍କୁ ମଧ୍ୟ ନିଜ ପାଣ୍ଠିରୁ କରୋନା ମୁକାବିଲା ପାଇଁ ଅନୁଦାନ ଦିଅନ୍ତୁ । ନିଜ ବକ୍ତବ୍ୟରେ ସେ ଆହୁରି ମଧ୍ୟ ଦାବି କରିଥିଲେ ଯେ ବର୍ତ୍ତମାନ ଜଟିଳ ଅବସ୍ଥାରେ ଥିବା କରୋନା ରୋଗୀଙ୍କ ପାଇଁ ଇକ୍‌ମୋ ମେସିନ କେବଳ ଉପକୂଳବର୍ତ୍ତି ଅଞ୍ଚଳରେ ସ୍ଥାପନ ହେବାର ବ୍ୟବସ୍ଥା ହେଉଛି । ଏହି ମେସିନ ସ୍ଥାପନ କୁ ନେଇ ପଶ୍ଚିମାଞ୍ଚଳରେ କୌଣସି ମେଡିକାଲ କଲେଜର ନାମ ନାହିଁ । ତେଣୁ ଇକ୍‌ମୋ ମେସିନ ବଲାଙ୍ଗିର ସ୍ଥିତ ଭୀମଭୋଇ ମେଡିକାଲ କଲେଜରେ ମଧ୍ୟ ସ୍ଥାପନ କରାଯାଉ ବୋଲି ବଲାଙ୍ଗିର ବିଧାୟକ ନରସିଂହ ମିଶ୍ର ଦାବି କରିଛନ୍ତି ।