11-Jun-2021

ବିନିକା (ହିମାଂଶୁ ଶେଖର ପୁଟେଲ): ସଂପ୍ରତି ସୋନପୁର ଜିଲ୍ଲା ବିନିକା ଅଞ୍ଚଳର ସହରାଞ୍ଚଳ ଓ ଗ୍ରାମାଞ୍ଚଳରେ ରାସ୍ତା ଗୁଡ଼ିକ ଦିନକୁ ଦିନ ସଙ୍କୁଚିତ ହେବାରେ ଲାଗିଛି l କେତେକ ସ୍ଥଳରେ ଓସାରିଆ ରାସ୍ତାକୁ ଲୋକେ ବେଖାତିର ଭାବରେ ଜବରଦଖଲ କରିବାରେ ଲାଗିଛନ୍ତି l ସହରାଞ୍ଚଳ ସମେତ ଗ୍ରାମାଞ୍ଚଳରେ ମଧ୍ୟ ଏହା ଦେଖିବାକୁ ମିଳିଛି l ପ୍ରଶାସନର କୌଣସି ସଚେତନତା ଓ କଟକଣା ନିୟମକୁ ବୋଧେ କେହି ଖାତିର କରୁ ନ ଥିବା ଜଣାପଡିଛି l ରାସ୍ତାକୁ ଜବରଦଖଲ କରି କେଉଁଠି କାନ୍ଥ ନିର୍ମାଣ ତ ଆଉ କେଉଁଠି ପିଣ୍ଡା ନିର୍ମାଣ ହୋଇଥିବାରୁ ଜରୁରୀ ସମୟରେ ଦମକଳ କିମ୍ବା ଆମ୍ବୁଲାନ୍ସ ଗାଡ଼ି ଯିବା ଆସିବାରେ ଅନ୍ତରାୟ  ସୃଷ୍ଟି କରୁଛି l  ଏହି ସମସ୍ୟା ଯୋଗୁଁ ଅନେକଙ୍କ ଧନ ଜୀବନ ନଷ୍ଟ ହୋଇଥିବାର ନଜିର ରହିଛି l ସମସ୍ୟା ସମ୍ପର୍କରେ ସଂପୃକ୍ତ ବିଭାଗ ଓ ପ୍ରଶାସନ ଜାଣୁ ଥିଲେ ମଧ୍ୟ ନ ଜାଣିଲା ପରି ଅଭିନୟ କରୁଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି l ତେଣୁ ବେଳ ଥାଉଁ ଥାଉଁ ତଦାରଖ ବ୍ୟବସ୍ଥା କରାଗଲେ ସହରାଞ୍ଚଳ ହେଉକି ଗ୍ରାମାଞ୍ଚଳରେ ଜବରଦଖଲ ବଢ଼ି ନ ପାରନ୍ତା ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି l ତେଣୁ ଏହି ସମସ୍ୟା ପ୍ରତି ବିଭାଗୀୟ କର୍ତୁପକ୍ଷ ଦୃଷ୍ଟି ଦେବା ଜରୁରୀ ହୋଇପଡିଛି l