10-Jun-2021

ଟିଟିଲାଗଡ଼ (ପ୍ରେରଣା ଖବର ବ୍ୟୁରୋ) : ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ଯୁବକଙ୍କୁ ଯୋଜନାବଦ୍ଧ ଭାବେ  ଆକ୍ରମଣ ସହ ଗୁରୁତର ଆହତ କରିଦେବା ନେଇ ଅଭିଯୋଗ ହୋଇଛି । ସୂଚନା ଅନୁଯାୟୀ, ସାମାନ୍ୟ କଥାକୁ ନେଇ ଟିଟିଲାଗଡ ସହର ସ୍ଥିତ ତିନି ନମ୍ବର ୱାର୍ଡ ର ଲଳିତ ସେଠ ନାମକ ଜଣେ ବ୍ୟକ୍ତି ଙ୍କ ପୁଅ ବିବେକ ସେଠ (୨୮) ଙ୍କୁ ଉକ୍ତ ପଡା ର ପାଞ୍ଚ ଜଣ ଦୁର୍ବୃତ୍ତ ମରଣାନ୍ତକ ଆକ୍ରମଣ କରି ଲହୁଲୁହାଣ କରିଦେଇଥିଲେ l ଆକ୍ରମଣରେ ବିବେକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଟିଟିଲାଗଡ଼ରୁ ବଲାଙ୍ଗୀର  ମେଡିକାଲ କଲେଜକୁ ସ୍ଥାନାନ୍ତରଣ କରାଯାଇଛି । ଗୁରୁତର ବିବେକ ସେଠଙ୍କୁ ଉକ୍ତ ଅଞ୍ଚଳର ରବି ବାଗ(୪୦),ଜଗଦୀଶ ପ୍ରଧାନୀ(୩୫), କ୍ଷୀର ପ୍ରଧାନୀ(୩୦), କେଶବ ପ୍ରଧାନୀ(୨୯) ଓ ସୁଖ ପ୍ରଧାନୀ(୩୪) ମିଳିତ ଭାବେ ଗତ ୮ ତାରିଖ ସନ୍ଧ୍ୟ। ପ୍ରାୟ ୮ଟା ସମୟ ରେ ନିଶାଗ୍ରସ୍ତ ଭାବେ ପୂର୍ବରୁ ବିବେକଙ୍କ ଘର ନିକଟରେ ଜଗି ରହିଥିଲେ l ବିବେକ ତାଙ୍କ ବାଇକରେ ନିଜ ଘରେ ପହଁଞ୍ଚିବା କ୍ଷଣି  ମିଳିତ ଭାବେ ଠେଙ୍ଗା ସାହାଯ୍ୟରେ ଆକ୍ରମଣ କରି  ବିବେକକୁ ଲହୁଲୁହାଣ କରିଦେଇଥିଲେ ଦୁର୍ବୃତ୍ତ ମାନେ। ଏପରିକି ତାଙ୍କୁ ଗୁରୁତର ଅବସ୍ଥାରେ ଡ଼ାକ୍ତଖାନା ପହଞ୍ଚାଇବାକୁ ବାରଣ କରିବା ସହ ସେ ମରିଯାଉ ବୋଲି  ସେଠାରେ ଜଗିରହିଥିଲେ l ଏପରିକି କାହାକୁ ଡ଼ାକ୍ତରଖାନା ନେବାକୁ ସୁଯୋଗ ନ ଦେଇ ପ୍ରାୟ ୨ ଘଣ୍ଟା ଜଗିରହିଥିଲେ । ତାଙ୍କର ଜଣେ ସମ୍ପର୍କୀୟ ଭାଇ ଟିଟିଲାଗଡ ଥାନାକୁ ଯାଇ ଜଣାଇବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ଗୁରୁତର ଅବସ୍ଥାରେ  ବିବେକକୁ ତୁରନ୍ତ ଟିଟିଲାଗଡ ଡାକ୍ତରଖାନାରେ ଭର୍ତ୍ତି କରାଇଥିଲେ । ହେଲେ ଅବସ୍ଥା ଗୁରୁତର ଥିବାରୁ ଡ଼ାକ୍ତର ତାଙ୍କୁ ବଲାଙ୍ଗୀର ମ୍ୟାଡିକାଲ କଲେଜ ଡାକ୍ତରଖାନାକୁ ସ୍ଥାନାନ୍ତରିତ କରିଥିଲେ । ବିବେକ ସେଠ୍ ବର୍ତ୍ତମାନ ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ବେଳେ 

 ଅଭିଯୁକ୍ତ ମାନଙ୍କ ବିରୋଧରେ ତୁରନ୍ତ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବା ବିବେକଙ୍କ ବାପା ଜିଲ୍ଲା ଆରକ୍ଷୀ ଅଧିକାରୀଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି l ତେବେ କେଉଁ କାରଣରୁ ଏପରି ଆକ୍ରମଣ କରାଯାଇଛି ସେ ନେଇ ପୋଲିସ ତଦନ୍ତ କରୁଥିବା ଜଣାପଡିଛି l ପୋଲିସ ତିନି ଜଣ ଅଭିଯୁକ୍ତଙ୍କୁ ଅଟକ ରଖି ଥିବା ବେଳେ ଦୁଇଜଣ ଫେରାର ଥିବା ବିବେକଙ୍କ ପିତା ପ୍ରକାଶ କରିଛନ୍ତି । ତେବେ ବିବେକଙ୍କ ମେରୁଦଣ୍ଡ ହାଡ ସହ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଥିବା ଡ଼ାକ୍ତର ପ୍ରକାଶ କରିଛନ୍ତି ।  ଘଟଣାର ଅନ୍ୟ ଅଭିଯୁକ୍ତ  ମାନଙ୍କୁ ଗିରଫ କରିବା ସହ ଆମ ପରିବାରକୁ ନ୍ୟାୟ ପ୍ରଦାନ କରାଯାଉ ବୋଲି ବିବେକଙ୍କ ବାପା ଜିଲ୍ଲା ଅରକ୍ଷୀଅଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି l