17-Sep-2026

ବିନିକା(ହିମାଂଶୁ ଶେଖର ପୁଟେଲ) ସୁବର୍ଣ୍ଣପୁର ଜିଲ୍ଲା ବିନିକା ଥାନା କୌଡିଆମୁଣ୍ଡା କେନାଲ ବ୍ରିଜ ନିକଟରେ ଏକ ଲତାବୁଦା ମୂଳରୁ ନବଜାତ ଶିଶୁ କନ୍ୟା ଉଦ୍ଧାର ହୋଇଛି l ପ୍ରାପ୍ତ ସୂଚନା ଅନୁଯାଇ କୌଡିଆମୁଣ୍ଡା ଗ୍ରାମର ରବି ନାରାୟଣ ସାହୁ ସକାଳୁ ନିଜ ବିଲକୁ କାମରେ ଯାଇଥିଲେ l ଦିନ ପ୍ରାୟ ୧୧ ଟା ସମୟରେ ଘରକୁ ଫେରୁଥିଲେ l  ଆଜି ବିଶ୍ୱକର୍ମା ପୂଜା ସେଥିପାଇଁ ସେ ତାଙ୍କ ମଟର ସାଇକେଲକୁ ଧୁଆଧୋଇ କରି ସଫା କରିବା ପାଇଁ କେନାଲ ନିକଟରେ ଅଟକିଥିଲେ l ଏହି ସମୟରେ ଏକ ନବଜାତ ଶିଶୁର କାନ୍ଦିବା ଶୁଣାଗଲା  ସେ ତତକ୍ଷଣାତ୍ ଚାରିପଟେ ଦେଖିଲେ ହେଲେ କେହି ଦେଖା ଯାଉନଥିଲେ l ଶିଶୁର କନ୍ଦନକୁ ଅନୁଶରଣ କରି ଦେଖିଲେ ଯେ,ଏକ ଲତାବୁଦା ଭିତରୁ କନ୍ଦନ ଶୁଭୁଛି ।ତ୍ୱରିତ ସେ ସେହି ଲତାବୁଦା ମୂଳକୁ ଯାଇ ନବଜାତ ଶିଶୁ କନ୍ୟାଟି ପଡିଛି ଓ ତା ଦେହରେ ପିମ୍ପୁଡି ଲାଗିଯାଇଛି । ତାର ନାଭି ମଧ୍ୟ ଲମ୍ବିଛି l ଠିକ ଏହି ସମୟରେ ଜଣେ ବାଟୋଇ ସେହି ରାସ୍ତା ଦେଇ ଯାଉଥିଲେ l ସେ ସେହି ବାଟୋଇକୁ ଡାକି ଏଠାରେ ଟିକେ ଦେଖୁଥାଅ ମୁଁ ମୋ ପତ୍ନୀଙ୍କୁ ଘରୁ ଡାକି ଆଣୁଛି କହି ତାଙ୍କ ପତ୍ନୀ ଗୀତାଞ୍ଜଳି ସାହୁଙ୍କୁ ଘରୁ ଡାକି ଆଣିଲେ l ଉଭୟେ ମିଶି ସେହି ଶିଶୁ କନ୍ୟା ଟିକୁ ଲତାବୁଦା ମୂଳରୁ ଉଦ୍ଧାର କରି ନିଜ ଘରକୁ ଆଣିଥିଲେ l ସେଠାରୁ ସେ, ତାଙ୍କ ପତ୍ନୀ ଓ ତାଙ୍କ ପୁଅ ସୁମିତ କୁମାର ସାହୁ ମିଶି ଶିଶୁ କନ୍ୟାର ଚିକିତ୍ସା ପାଇଁ ବିନିକା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ l ବିନିକା ସ୍ୱାସ୍ଥ୍ୟ କେନ୍ଦ୍ରର ମହିଳା ଓ ଶିଶୁ ବିଭାଗ ଡାକ୍ତର ସତ୍ୟନାରାୟଣ ପାଣିଗ୍ରାହୀ ଶିଶୁଟିର ଚିକିତ୍ସା କରିଥିଲେ l ବର୍ତମାନ ଶିଶୁଟିର ସ୍ୱାସ୍ଥ୍ୟବସ୍ଥା ଭଲ ଥିବା ଜଣାପଡିଛି l ଘଟଣାଟି ପ୍ରଚାରିତ ହେବା ପରେ ଶିଶୁ କନ୍ୟାକୁ ଦେଖିବା ପାଇଁ ଡାକ୍ତରଖାନାରେ ଲୋକଙ୍କ ଭିଡ ଜମିଥିଲା l କିଏ ସେ ନିର୍ଦୟୀ ମହିଳା କେଉଁ ପରିସ୍ଥିତିରେ ଶିଶୁ କନ୍ୟାକୁ ନିଜେ ଜନ୍ମ ଦେବାପରେ ଏଭଳି ଫିଙ୍ଗି ଦେଇଛି ବୋଲି ସମସ୍ତେ ସେହି ମହିଳାକୁ ଛି ଛି ଥୁ ଥୁ କରିବା ସହିତ କରୁଛନ୍ତି l ସେପଟେ ଶିଶୁ କନ୍ୟାକୁ ଉଦ୍ଧାର କରିଥିବା ରବି ନାରାୟଣ ସାହୁଙ୍କ ପରିବାରକୁ ସାଧାରଣରେ ଭୁରିଭୁରି ପ୍ରଶଂସା କରୁଛନ୍ତି l ଶ୍ରୀସାହୁ ଏବେ ତାଙ୍କ ପରିବାର ସମସ୍ତ ସଦସ୍ୟ ଶିଶୁ କନ୍ୟାର ଲାଳନ ପାଳନ କରି ନିଜ ଝିଅ ପରି ରଖିବାକୁ ଇଚ୍ଛା ପ୍ରକାଶ କରିଛନ୍ତି l ତେଣୁ ଶିଶୁ କନ୍ୟାଟିକୁ ତାଙ୍କୁ ହସ୍ତାନ୍ତର କରାଯାଉ ବୋଲି ଶ୍ରୀ ସାହୁ ସରକାର ତଥା ପ୍ରଶାସନଙ୍କୁ ନିବେଦନ କରିଛନ୍ତି l ଏନେଇ ବିନିକା ଆଇ ଆଇ ସି ଅନିତା କିଡୋଙ୍କୁ ପଚାରିବାରୁ ସେ ଚାଇଲଡ ହେଲ୍ପ ଲାଇନ ଡି ପି ସି ସୁଜିତ ମିଶ୍ରଙ୍କୁ ଫୋନ ଯୋଗେ ଜଣାଇଥିଲେ ପରେ ସୁଜିତ ମିଶ୍ର ଓ ତାଙ୍କ ଟିମ ସୋନପୁରରୁ ଆସି ଶିଶୁ କନ୍ଯାର ସ୍ୱାସ୍ଥ୍ୟ ଅବସ୍ଥା ଠିକ ନ ଥିବାରୁ ମୁଖ୍ୟ ଚିକିତ୍ସାଲୟକୁ ପଠାଇଥିବା ସୂଚନା ଦେଇଛନ୍ତି l  ସ୍ୱାସ୍ଥ୍ୟ ଅବସ୍ଥା ଠିକ ହେବାପରେ ପୌଷ୍ୟ ପୁତ୍ର କେନ୍ଦ୍ର ସୁବର୍ଣ୍ଣପୁରକୁ ହସ୍ତାନ୍ତର କରାଯିବ  ବୋଲି ଜଣାପଡ଼ିଛି।