12-May-2021

ନୂଆଦିଲ୍ଲୀ,(ପ୍ରେରଣା ଖବର ବ୍ୟୁରୋ) : କରୋନାର ୨ୟ ଲହର କେବଳ ସହରାଞ୍ଚଳକୁ ନୁହେଁ, ବରଂ ଗ୍ରାମାଞ୍ଚଳର ଲୋକଙ୍କୁ ମଧ୍ୟ ପ୍ରଭାବିତ କରିଛି । କରୋନା ନେଇ ପୂର୍ବରୁ ଯାହା ଅନୁମାନ କରାଯାଉଥିଲା, ଠିକ ସେଭଳି ହେଉଥିବା ଦେଖିବାକୁ ମିଳୁଛି । ନୋଏଡା (ପଶ୍ଚିମ)ର ଜଲାଲପୁର ଗାଁରେ ଜଣେ ପିତା ନିଜର ଦୁଇ ପୁଅଙ୍କୁ କରୋନାରେ ହରାଇଛନ୍ତି ।

ପିତା ଗୋଟିଏ ପୁଅକୁ ମୁଖାଗ୍ନି ଦେଇ ଶ୍ମଶାନରୁ ଫେରିଥିଲେ । ସେ କେବେ ବି ଭାବି ନଥିବେ ଯେ, ଅଳ୍ପ ସମୟ ପରେ ପୁଣି ଥରେ କାନ୍ଧ ଦେବାକୁ ହେବ ଏବଂ ମୁଖାଗ୍ନି ଦେବାକୁ ଶ୍ମଶାନକୁ ଯିବାକୁ ପଡ଼ିବ । ଘଟଣା କହାଣୀ ପରି ଲାଗୁଥିଲେ ମଧ୍ୟ ସତ । ଗୋଟିଏ ପରିବାର ଅଳ୍ପ ସମୟ ମଧ୍ୟରେ ୨ ଜଣ ପୁଅକୁ ହରାଇ ଭାଙ୍ଗିପଡ଼ିଛି । ଅତର ସିଂହଙ୍କ ପୁଅ ପଂକଜଙ୍କର ଅଚାନକ ମୃତ୍ୟୁ ହୋଇଥିଲା । ପୁଅକୁ ମୁଖାଗ୍ନି ଦେଇ ସମସ୍ତେ ଘରେ ପହଂଚିଥିଲେ । କିନ୍ତୁ କିଛି ସମୟ ପରେ ଦ୍ୱିତୀୟ ପୁତ୍ର ଦୀପକଙ୍କର ମୃତ୍ୟୁ ହୋଇଥିଲା । ସେ ମଧ୍ୟ କରୋନା ଭାଇସର ସହ ଲଢ଼େଇ ଜାରି ରଖିଥିଲେ । ୨ ଜଣ ଭେଣ୍ଡିଆ ପୁଅକୁ ହରାଇ ମା’ ଧୈର୍ଯ୍ୟ ହରାଇଛନ୍ତି । ଗାଁ ଲୋକଙ୍କର କହିବା ଅନୁସାରେ ଜଲାଲପୁରରେ ୧୦ ଦିନରେ ୬ ଜଣ ମହିଳାଙ୍କ ସମେତ ମୋଟ ୧୮ ଜଣଙ୍କର ମୃତ୍ୟୁ ହୋଇଛି । ଗତ ୨୮ ତାରିଖ ଠାରୁ ମୃତ୍ୟୁ ଆରମ୍ଭ ହୋଇଥିଲା ।