20-Mar-2021

ବଲାଙ୍ଗୀର(ପ୍ରେରଣା ଖବର ବ୍ୟୁରୋ)- ଜିଲ୍ଲାର ବିଭିନ୍ନ ରେଳ ସମସ୍ୟା ଓ ପ୍ରକଳ୍ପ ନେଇ ବଲାଙ୍ଗୀର ସାଂସଦ ସଙ୍ଗୀତା କୁମାରୀ ସିଂଦେଓ ଦାବି କରିବା ସହ ରେଳ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି । ସାଂସଦ ପ୍ରଥମେ ବଲାଙ୍ଗୀର-ଖୋର୍ଦ୍ଧା ରେଳ ପ୍ରକଳ୍ପକୁ ୧ଠ୫ଠ କୋଟି ଟଙ୍କା ବଜେଟରେ ବ୍ୟୟବରାଦ କରାଯାଇଥିବାରୁ କେନ୍ଦ୍ର ସରକାରଙ୍କୁ ଧନ୍ୟବାଦ ଜ୍ଞାପନ କରିଥିଲେ ।  ବଲାଙ୍ଗୀର ଜିଲ୍ଲାରେ ଖାଲି ପଡିଥିବା ରେଳବାଇର ୭୫ଠ ଏକର ଜମି ବ୍ୟବହାର ଉପରେ ସେ ଗୁରୁତ୍ୱ ଦେଇଛନ୍ତି । ଏଥିସହ ବଲାଙ୍ଗୀର-ନୂଆପଡା ଭାୟା ପାଟଣାଗଡ଼ ରେଳପଥ କାମକୁ ତ୍ୱରାନ୍ୱିତ କରିବା ପାଇଁ ଶ୍ରୀମତୀ ସିଂଦେଓ ଦାବି କରିଛନ୍ତି । କରୋନା ପରଠୁ ବନ୍ଦ ହୋଇଯାଇଥିବା ହାୱାଡା-ଟିଟିଲାଗଡ଼ ଇସ୍ପାତ ଏକ୍ସପ୍ରେସ୍ ଓ ସମଲେଶ୍ୱରୀ ଏକ୍ସପ୍ରେସ୍ କୁ ତୁରନ୍ତ ଚାଲୁ କରିବା ପାଇଁ ସେ ଦାବି କରିଛନ୍ତି । ସେହିପରି ଇସ୍ପାତ ଏକ୍ସପ୍ରେସକୁ କଂଟାବାଂଜି ପର୍ଯ୍ୟନ୍ତ, ଜାମ୍ମୁ-ତାୱି ଏକ୍ସପ୍ରେସକୁ ସମ୍ବଲପୁରରୁ ଟିଟିଲାଗଡ଼ ପର୍ଯ୍ୟନ୍ତ, ସମ୍ବଲପୁର-ପୁରୀ ଇଣ୍ଟରସିଟିକୁ ବଲାଙ୍ଗୀର ପର୍ଯ୍ୟନ୍ତ, ଭୁବନେଶ୍ୱର-ବଲାଙ୍ଗୀର ଇଣ୍ଟରସିଟିକୁ ଟିଟିଲାଗଡ଼ ପର୍ଯ୍ୟନ୍ତ ସଂପ୍ରସାରଣ କରିବା ପାଇଁ ଦାବି କରିଛନ୍ତି । ଏଥିସହ ହୀରାକୁଦ ଏକ୍ସପ୍ରେସକୁ ତିନିଦିନ ବଦଳରେ ପ୍ରତିଦିନ ଚଳାଇବାକୁ ଦାବି କରିଛନ୍ତି । ପୁଣି ସମତା ଏକ୍ସପ୍ରେସକୁ ୫ ଦିନ ବଦଳରେ ୭ ଦିନ ଚଳାଚଳ କରିବାକୁ କେନ୍ଦ୍ର ରେଳମନ୍ତ୍ରୀଙ୍କ ଠାରେ ଦାବି କରିଛନ୍ତି । ସମଲେଶ୍ୱରୀ ଏକ୍ସପ୍ରେସ୍‌କୁ ଲୋଇସିଂହା ରେଲୱେ ଷ୍ଟେସନ ଠାରେ ଓ ଦୁର୍ଗ-ପୁରୀ ଏକ୍ସପ୍ରେସକୁ ଲୋଇସିଂହା ଓ ଦେଓଗାଁ ରେଲୱେ ଷ୍ଟେସନ ଠାରେ ରହଣୀ ପାଇଁ ସାଂସଦ ଶ୍ରୀମତୀ ସିଂଦେଓ ଦାବି କରିଛନ୍ତି । ରେଳ ବିଭାଗରେ ଖାଲି ପଡିଥିବା ଜମିରେ ମେନୁଫେକ୍‌ଚରିଂ ପାର୍କ କରା ଗଲେ ତାଙ୍କ ନିର୍ବାଚନମଣ୍ଡଳୀର ଦାଦନ ଶ୍ରମିକ ଚାଲାଣ ସମସ୍ୟା ଦୂର ହୋଇପାରିବ ବୋଲି ସାଂସଦ ଶ୍ରୀମତୀ ସିଂହଦେଓ ଯୁକ୍ତି ଉପସ୍ଥାପନ କରିଛନ୍ତି l