06-Mar-2021

ବୌଦ୍ଧ, (ପ୍ରେରଣା ଖବର ବ୍ୟୁରୋ): ବୌଦ୍ଧ ଜିଲ୍ଲା ହରଭଙ୍ଗା ଥାନା ଅନ୍ତର୍ଗତ ଧଳପୁର ପଞ୍ଚାୟତର ଶାକୁସିଙ୍ଗା ଠାରେ ଚାଲିଥିବା ନିର୍ମାଣଧିନ  ଧଳପୁର – ଆଠମଲ୍ଲିକ ମହାନଦୀ ସେତୁରେ ଗୁରୁବାର ରାତି କାମ କରୁଥିବା ଜଣେ ଶ୍ରମିକ ସେତୁ ଉପରୁ ପଡି  ମୃତ୍ୟୁବରଣ କରିଥିବା ଜଣାପଡିଛି l ମୃତକ ଜଣକ ହେଲେ ପଶ୍ଚିମବଙ୍ଗ ମଲଦା ଜିଲ୍ଲା ପୂର୍ବ ସଇଦୁର ଗ୍ରାମର ପ୍ରଭାସ ଘୋଷଙ୍କ ପୁଅ ସମୀର ଘୋଷ (୨୦)। ଏ ନେଇ ହରଭଙ୍ଗା ଥାନାରେ ଏକ ମାମଲା ରୁଜ୍ଜୁକରି ପୋଲିସ ଦୁର୍ଘଟଣାର କାରଣ ତଦନ୍ତ କରୁଥିବା ଜଣାପଡିଛି।ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାଇ ଗୁରୁବାର ରାତିରେ ଶ୍ରମିକ ମାନେ କାମକରି ରାତିପ୍ରାୟ ସାଢେ ୯ଟା ସମୟରେ ତଳକୁ ଓଲ୍ହାଉଥିବା ବେଳେ ଅସାବଧାନତା ଯୋଗୁଁ ଖସିପଡିବାରୁ ମୃତ୍ୟୁ ହୋଇଛି କୁହାଯାଉଛି।ତେବେ ଶ୍ରମିକ ମାନେ ସିଡି ଜରିଆରେ ଉପରକୁ ଯିବା ଆସିବା କରି କାମ କରୁଥିବା ଘଟଣାକୁ ବିଭିନ୍ନ ମହଲରେ ପ୍ରଶ୍ନ ଉଠୁଛି।ଗତ ଜାନୁଆରୀ ମାସ ୧୬ ତାରିଖରେ ଢିଲା ସୁରକ୍ଷା ବ୍ୟବସ୍ଥା ଯୋଗୁଁ ଏହି ସେତୁରୁ ପଡି ଜଣେ ଅଣଓଡ଼ିଆ ଶ୍ରମିକଙ୍କ ଶୋଚନୀୟ  ମୃତ୍ୟୁ ଘଟିଥିଲା।ସେତୁ ନିର୍ମାଣ ବେଳେ ଆକସ୍ମିକ ଦୁର୍ଘଟଣାକୁ ଏଡାଇବା ପାଇଁ ସେତୁ ଉପରେ ବିପଦ ସଙ୍କୁଳ ଭାବେ ରହି କାର୍ଯ୍ୟ କରୁଥିବା ଶ୍ରମିକଙ୍କ ସୁରକ୍ଷା ପାଇଁ ସେପ୍ଟି ବେଲ୍ଟ ଓ ହ୍ୟାଲମେଟ ଯୋଗାଇ ଦେବାର କଡାକଡି ପ୍ରାବଧାନ ରହିଛି।ହେଲେ  ଠିକାସଂସ୍ଥା ସେପ୍ଟି ଦିଗ ପ୍ରତିବେପରୁଆ ମନୋଭାବ ଯୋଗୁଁ ଉଭୟ ଦୁର୍ଘଟଣା ର ଶିକାର ହୋଇ ମୃତ୍ୟୁବରଣ କରିଥିବା ଶ୍ରମିକ ସେପ୍ଟି ବେଲ୍ଟ ଓ ହ୍ୟାଲମେଟ ନଥିବା କାରଣରୁ ହିଁ ଘଟିଥିବା ଅଭିଯୋଗ ହେଉଛି।ତେବେ ଦୁର୍ଘଟଣା ଜନିତ ଶ୍ରମକ ମୃତ୍ୟୁ ଭଳି ସ୍ପର୍ଶକତାର ପ୍ରସଙ୍ଗକୁ ଜିଲ୍ଲା ଶ୍ରମ ବିଭାଗ ଉଦ୍ଦେଶ୍ୟ ମୂଳକ ଭାବେ ଅଣଦେଖା କରିବା ଯୋଗୁଁ ଅନ୍ୟ ରାଜ୍ୟରୁ କାମ ଅନ୍ୱେଷଣ ପାଇଁ ଆସିଥିବା ନିରୀହ ଶ୍ରମିକଙ୍କର ଜୀବନ ଅକାଳରେ ହରାଉଥିବା ବୁଦ୍ଧିଜୀବି ମହଲରେ ଅଭିଯୋଗ ହେଉଛି।ବାରମ୍ବାର ଦୁର୍ଘଟଣା ଜନିତ ମୃତ୍ୟୁ ର ପ୍ରକୃତ କାରଣ ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ମୃତକ ପରିବାରଙ୍କୁ କ୍ଷତିପୂରଣ ରାଶି ଯୋଗାଇ ଦେବାକୁ ସାଧାରଣରେ ଦାବି ହେଉଛି।